Bhibhiliya yari khiyo Jehovha a na ni makodzelo nya guti esi si na giregago mindru watshigu. (Isa. 45:21) Iyo kha yi tshamuseyi edzi Jehovha a girago khidzo isoso mwendro tepo yakone ni edzi a vbwetago gu siti khidzo. Khu kharato, ethu kha hi pwisisi satshavbo si pategago avba nya makodzelo ya Jehovha nya guti esi si na giregago mindru watshigu. Ganiolu, hi yede gu tiyisega khu silo nyo khaguri.

Jehovha a nga gira satshavbo a si vbwetago, ganiolu dzimbe dzitepo a nga hatha gu mba gira silo nyo khaguri. Khu gu ba Jehovha ari ni guti nya mba hegedwa, uye a nga ganeya silo a si vbwetago na si si dugeleyi. (Rom. 11:33) Ganiolu, Jehovha a nga hatha gu mbati silo si na giregago mindru watshigu, kholu a ngu kodza gu dzi woneleya khu gu vbeleya. — Fananisa ni Isaya 42:14.

Jehovha a gu tumbisa gu tadzisa gugola gwaye. Isoso sa gu gimbeleyana kharini ni makodzelo a gu nawo nya guti esi si na giregago mindru watshigu? Isaya 46:10 a gu tshamuseya gu khuye: “Eni nya gu tivisa esi si giregidego gukhugela guhegulani, gukhugela dzinango dzi vbindridego nidzo dzi nga gutago. Nyi ngu ganela, kheni: ‘Makungo yangu ma na tiya, gambe nyi na gira satshavbo nyi si golago.’”

Gimwegyo nya sighelo si girago Jehovha a manega ni makodzelo nya gu ganeye esi si na giregago mindru watshigu, khu gu uye a na ni tshivba nya gu gire satshavbo si kodzega. Uye kha vbweti gu wona esi si na giregago mindru watshigu nga khatshi silo si giregidego — gu fana ni muthu nyo khaguri a lerigo pajina nyo hegise nya libhuku gasi gu wona mahegiso nya mahungu a lerigo. Wulangani nya isoso, Jehovha a nga hunga makungo nyo khaguri gasi ma girega ga tepo a yi vbwetago, nigu uye a ngu tiyisega gu khuye isoso si na girega ga tepo a yi vegisidego. — Ekiso. 9:5, 6; Mat. 24:36; Mith. 17:31.

Khu gighelo gegi, Bhibhiliya ya gu thumisa malito nya nga gu “dongiseya,” “gu wumba,” ni “makungo” gasi gu tshamuseya esi Jehovha a girago maningano khesi si na giregago mindru watshigu. (2 Dzipf. 19:25; nota; Isa. 46:11, NM) Malito yaya, ma vbindrugedzedwe avba nya lito li gimbeleyanago ni lito li tshamuseyago gu khilo “Muwumbi.” (Jer. 18:4) Gu fana ni muwumbi a thumisago makodzelo yaye gasi gu vbindrugedza libumba li khala vhazo nyo mbure, Jehovha a nga vbindrugedza silo gasi si tadzisa gugola gwaye. — Efes. 1:11.

Jehovha a ningide vathu vatshavbo gutshulega nya gu dzi hatheye nigu a ngu yeyedza githawo giningwa gegi. Uye kha hungi esi si na giregago womini ga moyo ni moyo wathu. Nigu uye kha giri gu vathu nya vadi va gira silo si na vegago womi wavo mhangoni. Uye a ngu dzumeleya vathu gu hatha ndziya va vbwetago gu gimbiya khiyo, nigu uye a gu va kutsa gu gimbiya ndziyani nya gululame.

Wona siyeyedzo sivili. Giyeyedzo nyo pheye khya vathu va nga ba va vbanya Ninivha. Jehovha a di va embeya gu khuye a na tshungunula lidhoropa khu kotani nya wuvivbi va nga ba va gira. Ganiolu, tepo Vaninivhi va nga dzi laya, Jehovha “a di dzi laya khu guvivba a nga vbweta gu va girela, a si va mbembisi kha nga a nga bani na ganede.” (Jona 3:1-10) Jehovha a di vbindrugedza makungo yaye kholu Vaninivhi va di thumisa gutshulega gwawe nya gu dzi hatheye gasi gu dzi laya ni gu dzumeya gigengedzo va ningidwego khu Jehovha.

Giyeyedzo nya wuvili, giprofeto gi ganeyago khu mwama moyo nyo pwani khu Kiro, a nga hadzi gu tshula Vajudha wugumbini a bwe a ninga gileletelo nya gu vbahedze tempele ya Jehovha. (Isa. 44:26–45:4) Kiro, Pfhumu ya Perisiya yi tadziside giprofeto gegi. (Ezira 1:1-4) Ambari ulolo, Kiro kha nga ba a khozeya Nungungulu nya lisine. Jehovha thumiside Kiro gasi gu tadzisa giprofeto gegi, ganiolu kha mu gurumedza gasi gu mu khozeya. — Mav. 21:1.

Khu lisine, esi silo nyo khaguri basi Jehovha a si wonago tepo a vbwetago gu ganeya khu wumindru. Gasi gu ganeya lisine, a mwalo muthu a nga pwisisago dzindziya dza Jehovha khu gu vbeleya. (Isa. 55:8, 9) Ganiolu, satshavbo esi a hi embeyago si ngu tiyisa gukhodwa gwathu nya gu khethu tepo yatshavbo a gu gira esi nya sadi, ngudzu-ngudzu a gu ba a ganeya khu wumindru.