Bbayibbili lizibikka aantanganana kuti Jehova ulakonzya kwaamba zintu ziyoochitika kunembo. (Is. 45:21) Pesi talipandululi pe kuti uzichita biyeni, ndiilili nasala kuzichita naakuti nzyiingi biyeni nzyasala kuziba. Tatuzizi pe zyoonse Jehova nzyasala kuziba. Nikuba oobo, atulange twaambo tuche.

Jehova ulakonzya kuchita kufumbwa nzyayanda pesi chimwi chiindi usala kutachita zimwi. Jehova ubelesya busongo bwakwe butagoli kuti aambe kufumbwa nchasala. (Rom. 11:33) Akaambo kakuti ulalinyona, ulakonzya kusala kutaziba zimwi zintu.—Yezyanisya aa Isaya 42:14.

Jehova upa kuti kuyanda kwakwe kuchitwe. Eezi zyaambaanzi kuli ndiswe atala ankani yazintu nzyaamba kuti zizoochitika kunembo? Isaya 46:10 ipandulula kuti: “Kuzwa kumatalikilo ndaambila limwi ciyoocitika kumbele, alimwi kuzwa kaindi ndaambila limwi zintu zitanacitika. Ndime ndaamba kuti, ‘Makanze aangu ayoozwidilila, alimwi zyoonse nzyondiyanda ndiyoozicita.’”

Kamwi kaambo kapa kuti Jehova aambe zintu zizoochitika kunembo nkakuti uli aamanguzu aakupa kuti zintu zichitike. Jehova tasaanguni kuyanduula kubona kuti kunembo kuyoochitikaanzi mbuli mbutuchita nitweebela muuvi kayilikumana kuti tuzoojate kuti muuvi eeyo yaambuula atalaanzi. Pesi Jehova usala kuti chimwi chintu chizoochitike aachiindi chacho akupa kuti chizoochitike chiindi eecho nichazoosika.—Kul. 9:​5, 6; Mt. 24:36; Mil. 17:31.

Eezi nzizyo zipa kuti muBbayibbili kubelesegwe mabala aaya aakuti ‘kubamba,’ ‘kuchita’ ‘akukanza’ kuti apandulule nzyachita Jehova natubuzya atala azintu ziyoochitika kunembo. (2 Bam. 19:25; Is. 46:11) Mabala aaya akasandululwa kuzwa kubbala lyachiHebberu lyeendelana aabbala lyakuti “mubumbi.” (Jer. 18:4) Mbuli mbachita mubumbi uuli aaluzibo, ulakonzya kubumba chintu chibotu. Mbukubede akuli Jehova, ulakonzya kuchincha zintu kuti zizuzikizye kuyanda kwakwe.—Ef. 1:11.

Jehova ulachilemeka chipo chakulisalila nchitulaacho. Tabambili muntu umwi awumwi kuti buumi bwakwe buzooba biyeni naakuti kupa kuti bantu balikabotu bachite zintu zibanjizya mumapenzi. Pesi ulabalekela bantu kuti balisalile nzibayanda. Alubo ubasungwaazya kuti basale munzila iilikabotu.

Atubone zikozyano zibili. Chikozyano chakusaanguna nchabantu bakuNiniva. Jehova wakali waamba kuti wakali kuzoonyonyoona muunzi waNiniva akaambo kabubi bwakali bwavula mumuunzi ooyo. Chiindi bantu bamumuunzi ooyu nibakasanduka, Jehova “wakacinca mizeezo kujatikizya mapenzi ngaakaambide kuti ulabaletela, aboobo tanaakaaleta pe.” (Jon. 3:​1-10) Jehova wakachincha mizeezo yakwe akaambo kakuti bantu bakuNiniva bakasala kusiya zibi zyabo chiindi nibakamvwa mulumbe waJehova wanchenjezyo.

Chikozyano chachibili chili atala abupolofita buli atala aKkoresi, ooyo wakali kuzoogwisya maJuda mubuzike akulayilila kuti tempele lyaJehova liyakululwe. (Is. 44:26–45:4) Mwaami Kkoresi waPesiya wakazuzikizya bupolofita oobu. (Ezr. 1:​1-4) Nikuba oobo, Kkoresi taakali kukomba Leza wakasimpe pe. Jehova wakabelesya Kkoresi kuti azuzikizye bupolofita oobu alubo wakamulekela kuti alisalile ngwayanda kukomba.—Tus. 21:1.

Twalanga-langa zintu ziche loko nzyalanga Jehova chiindi nasala kutubuzya zintu zizoochitika kunembo. Nichoonzyo, taakwe muntu pe uukonzya kumvwisisisya nzila zyaJehova. (Is. 55:​8, 9) Pesi zintu nzyachita Jehova zisimya lusyomo lwesu alubo ziswaanizya zintu nzyatubuzya ziyoochitika kunembo.