Bibele yi swi veka erivaleni leswaku Yehovha u kota ku vula leswi nga ta endleka enkarhini lowu taka. (Esa. 45:21) Kambe a yi hi byeli leswaku sweswo u swi endla njhani, u swi endla hi nkarhi wihi kumbe ndlela leyi a swi tivaka hayona. Hikwalaho, a hi tivi swilo hinkwaswo hi vuswikoti bya Yehovha byo tiva swilo swa le nkarhini lowu taka. Kambe ku ni swilo swi nga ri swingani leswi hi nga kotaka ku swi twisisa.

Yehovha a nga na swipimelo handle ka leswi a tivekeleke swona. Leswi a nga ni vutlhari lebyi nga pimekiki, u kota ku profeta hi nchumu wun’wana ni wun’wana lowu a wu lavaka. (Rhom. 11:33) Leswi a kotaka ku tikhoma, a nga kota ku hlawula leswaku hi swihi leswi a nga laviki ku swi tiva hi leswi nga ta endleka enkarhini lowu taka.—Ringanisa Esaya 42:14.

Yehovha u endla leswaku ku rhandza kakwe ku endleka. Xana leswi swi fambisana njhani ni vuswikoti byakwe byo kota ku vula leswi nga ta endleka enkarhini lowu taka? Esaya 46:10 yi ri: “Ku sukela eku sunguleni ndzi boxa leswi nga ta humelela swi nga si humelela, ni leswi nga si humelelaka ndzi swi vule khale. Ndzi ri, ‘Xikongomelo xa mina xi ta humelela, ndzi ta endla ku rhandza ka mina.’”

Xivangelo xin’wana lexi endlaka Yehovha a kota ku vula swa le nkarhini lowu taka hi leswi a nga ni matimba yo endla leswaku swilo swi endleka. A nga boheki ku hatlisisa swilo leswaku a kota ku vona swa le nkarhini lowu taka, onge hi loko a hlometela swilo leswi se swi endlekeke. Ku ri na sweswo, loko Yehovha a kunguhata ku endla nchumu wo karhi hi nkarhi wo karhi, wa tiyiseka leswaku wa endleka loko nkarhi wa kona wu fika.—Eks. 9:​5, 6; Mat. 24:36; Mit. 17:31.

Hikwalaho ka xivangelo lexi, Bibele yi tirhisa swiga swo fana ni leswi nge, “hlele” na “tiyimiserile” ku hlamusela leswi Yehovha a swi endlaka hi swilo swa le nkarhini lowu taka. (2 Tih. 19:25; Esa. 46:11) Swiga leswi swi hundzuluxeriwe ku suka eka rito ra ririmi ro sungula leri fambisanaka ni rito leri vulaka “muvumbi.” (Yer. 18:4) Ku fana ni muvumbi loyi a kotaka ku endla xibya xo saseka hi vumba, Yehovha a nga vumba kumbe ku endla swilo leswaku a hetisisa ku rhandza kakwe.—Efe. 1:11.

Yehovha wa yi xixima nyiko yo kota ku tihlawulela. A nga kunguhati leswi nga ta endleka evuton’wini bya vanhu kumbe a kongomisa vanhu lava nga ni timbilu letinene leswaku va endla swilo leswi nga ta va endla va lovisiwa. U nyika vanhu tshunxeko wo hlawula ndlela leyi va yi lavaka kambe u va khutaza ku hlawula leyinene.

Xiya swikombiso swimbirhi. Xikombiso xo sungula i xa vanhu va le Ninivha. Yehovha u profete leswaku muti a wu ta lovisiwa hikwalaho ka vaaki va wona vo homboloka. Kambe loko vaaki va wona va hundzukile, Yehovha u “tshik[e] ku tisa khombo leri [a] vuleke leswaku [u] ta va tisela rona.” (Yon. 3:​1-10) Yehovha u cince miehleketo loko Vaninivha va tisorile endzhaku ka loko a va lemukisile.

Xikombiso xa vumbirhi i vuprofeta lebyi vulavulaka hi Korexe, loyi a a ta tshunxa Vayuda evuhlongeni leswaku va kota ku pfuxeta tempele ya Yehovha. (Esa. 44:26–45:4) Hosi Korexe wa le Peresiya u hetisise vuprofeta byebyo. (Ezra 1:​1-4) Hambiswiritano, Korexe a a nga gandzeli Xikwembu xa ntiyiso. Yehovha u tirhise Korexe leswaku a hetisisa vuprofeta lebyi hambileswi a a nga n’wi gandzeli naswona a nga n’wi sindzisanga leswaku a n’wi gandzela.—Swiv. 21:1.

I ntiyiso leswaku leswi a hi swona ntsena swivangelo leswi endlaka Yehovha a tirhisa vuswikoti byakwe byo tiva swa le nkarhini lowu taka. Kahlekahle, a ku na munhu loyi a kotaka ku twisisa tindlela ta Yehovha hilaha ku heleleke. (Esa. 55:​8, 9) Kambe leswi hi swi tivaka hi Yehovha swi hi tiyisa ripfumelo ra leswaku mikarhi hinkwayo u endla leswinene, ku katsa ni leswi a swi vulaka hi vumundzuku.