Biblia arhisïndi eska Tata Diosï Jeoba uandasïnga ambe enga úkuarhiaka sánderu orhepatini (Is. 45:21). Joperu no uandantasïndi néna úsïni, na jatini úsïni ka nijtu na xáni uékasïni míteni. Jimbokachi no úsïnga iámindu ambe sési kurhanguni, nóchi uaaka uandani eskachi iámindu ambe míteskia. Joperu jarhasti máru ambe engachi kóru újka míteni, ju je exeni máru ambe.

Nájkiruka Tata Diosï Jeoba iámindu ambe újka úni, ménisï eratsesïni no úni máru ambe. Jimboka ima meru kánikua jánhaskatiiska, ima úsïndi uandani ambe enga úkuarhiaka sánderu orhepatini (Rom. 11:33). Joperu jimboka jorhenaska pʼíngukuarhini, úsïndi erakuni no míteni máru ambe enga úkuarhiaka sánderu orhepatini (terukutanta je Isaías 42:14 jingoni).

Tata Diosï Jeoba úsïndi eska úkuarhiaka ambe enga ima uéjka. Jiájkani, ¿andichisï uandani jaki eska ima úsïnga uandani ambe enga úkuarhiaka sánderu orhepatini? Ju je exeni ambe enga uandajka Isaías 46:10: “Desde ueenakuarhutki, ji tʼuini uandasïngia na enga kʼamaraaka, ka desde ióntkia, imani ambe enga nótki úkuarhini jaka. Ji uandasïnga: ‘Ji no mójtakuaka ambe engani uandakia, ka uaaka ambe engani ji uékaaka’”.

Jiájkani Tata Diosï Jeoba jatsisti uinhapikua paraka ísï úkuarhiaka eska ima na uandarini japkia. No ísïisti enajki botoni ma jaiaskupirini para exeni imani ambe enga úkuarhiaka para t’uini mítetini jarhania. Sánderu sési, uandasïndi ambe enga úkuarhiaka, ka enga niáraakia ima fecha enga Tata Diosï Jeoba erakuka, úsïndi eska ísï úkuarhiaka (Éx. 9:​5, 6; Mat. 24:36; Úku. 17:31).

Ini ambe jimbosï Tata Diosï Jeoba újti uandani eska úskia, uandaskia ka eska ísï uaaka para arhikuekani ambe enga úkia imani ambe jingoni enga sánderu orhepatini úkuarhiaka (2 Rey. 19:25; nota; Is. 46:11). Ebreu jimbo, íksï bersikuluecha úrasïndi uandakua ma enga arhikuekajka imani kʼuiripuni enga atsïmu jingoni ánchikuarhijka (Jer. 18:4). Ísï eska ima kʼuiripu na sési kuataperajka atsïmuni para sési jásï porhechi ma úni, Tata Diosï Jeobajtu májkueni úsïndi ambe ma paraka úkuarhiaka ambe enga ima uéjka (Éfes. 1:11).

Tata Diosï Jeoba jurajkusïndi eskachi erakukuarhiaka ambe úni. Ima no karhararixati ambe enga úkuarhiaka mándani kʼuiripu jingoni ka nijtu újki eskaksï ambarhati kʼuiripuecha no sési úkuarhinchaaka. Sánderu sési, jorhendasïndijtsïni nénachi uaa sánderu sési irekani ka tátsekuajtsïni jurajkusïndi parachi mándani arhini erakukuarhiaka ambe úni.

Ju je exeani tsimani ejempluechani. Orheta, Nínibe anapuecheeri. Imani ireta jimbo kánikua no sési jánhaskuarhispti, jimbosï Tata Diosï Jeoba uandapti eska kʼamajkuapiringa. Joperu jimbokaksï móantaspka, Tata Diosï mójtakuspti ambe enga eratsetini japkia úni ka no kʼamajkuaspti (Jon. 3:​1-10). Jo, Tata Diosï Jeoba mójtakuspti ambe enga eratsetini japkia úni. ¿Andi? Jimbokaksï Nínibe anapuecha kurhaaspka ambe enga Tata Diosï Jeoba úpiringa ka móantasptiksï.

Máteru ejemplu jindeesti Sirueri ambe, ima inchaakupirindi Babilonia ka pʼímutaantapirindi judiuechani ka juramupirindi eska ménderu únhantapiringa Tata Diosï Jeobaeri templu (Is. 44:26–45:4). Ini profesiani Persia anapu rei kumpliriispti (Esd. 1:​1-4). Nájkiruka Siru no marhuakuenga Tata Diosï Jeobani, ima úraspti paraka kumpliriipiringa profesiani, joperu no obligariispti paraka marhuakupiringa (Prov. 21:1).

Ísïisti, no i ambejkuesti engachi exekia, jarhasti uánikua máteru ambe. Joperu uétarhisïndi miáni eska kʼuiripu ma no úsïnga meru sési kurhanguni na enga eratsejka Tata Diosï Jeoba ka na enga újka ambe ma, ka nijtu andisï újki uandani ambe enga úkuarhiaka sánderu orhepani (Is. 55:​8, 9). Ka nájkirukachi máru ambejku míteka, uaakachi seguru jarhani eska Tata Diosï Jeoba méntkisï imani ambe úsïnga enga sési jaka, asta jiáni enga uandajka ambe enga úkuarhiaka sánderu orhepani.