Baibuli ekyoleka kurungi ngu Yahwe n’asobora kumanya ebiraabaho omu kasumi ak’omumaiso. (Is. 45:21) Tesoborra omulingo akikoramu, nidi obwakikora rundi bintu ki eby’acwamu kumanya. Nahabweki titumanyire byona ebirukukwata ha busobozi bwa Yahwe obw’okumanya ebiraabaho. Baitu haroho bimu ebitumanyire.

Busaho kintu kyona ekisobora kulema Yahwe kukora, rundi buli acwiremu wenka kwanga kukikora. Yahwe n’asobora kukozesa amagezi ge agataine bugarukiro kucwamu kumanya ekintu ekiraabaho omu kasumi ak’omumaiso kakuba aba n’agonza. (Bar. 11:33) Baitu habwokuba aine okwetanga okurukukirayo, n’asobora kucwamu kutamanya ebiraabaho.—Lengesaniza na Isaya 42:14.

Yahwe aleetera ekigendererwa kye kuhikirra. Kinu kiine kakwate ki n’obusobozi bwa Yahwe obw’okumanya ebiraabaho omu kasumi ak’omumaiso? Isaya 46:10 nihagamba ngu: ‘Ninsoborra empero okuruga ha kubanza, n’okuruga ebiro ebyaira ebigambo bitakakozerwe; ningamba nti okuhanuura kwange kuligumaho, ndikora byona ebindukusiima.’

Nahabweki emu ha nsonga habwaki Yahwe amanya ebiraabaho eri ngu, aine amaani ag’okuleetera ebintu kubaho. Omulingo Yahwe amanya ebiraabaho omu kasumi ak’omumaiso, tikiri nk’oku omuntu airukya vidiyo nukwo arole ebiri aha kumalirra kwayo. Oihireho Yahwe acwamu akasumi ekintu obukiribaho, kandi akasumi ako obukahika akiretera kubaho.—Kurug. 9:​5, 6; Mat. 24:36; Eng. 17:31.

Enu niyo ensonga habwaki Baibuli ekozesa ebigambo nka “okukora,” “ngambire,” na “maliriire,” kubazaaho ebintu ebimu Yahwe eby’aba acwiremu kukora omu kasumi ak’omumaiso. (2 Bakam. 19:25; Is. 46:11) Ebigambo binu bihindurwa kuruga omu kigambo ekisobora kumanyisa ‘omubumbi.’ (Yer. 18:4) Nk’oku omubumbi omukugu asobora kubumba ibumba akaihamu ekintu ekirungi, Yahwe n’asobora kubumba rundi kuleetera ebintu kuba nk’oku arukugonza nukwo ahikiirize ekigendererwa kye.—Bef. 1:11.

Yahwe aleka abantu kwecweramu. Tacwamu kara ekirahikaho buli muntu, kandi taleetera abantu abarungi kukora ekintu ekirabaleetera kubonabona. Aleka abantu boona kwekorra encwamu kandi abekambisa kucwamu kukora ebihikire.

Leka tubazeeho ebyokurorraho bibiri. Eky’okubanza nikitwarramu abantu ba Nineve. Yahwe akagamba ngu naija kuhwerekereza orubuga oru habwokuba abantu baali nibakora ebintu ebibi muno. Baitu obubayegarukiremu, Yahwe “yayeyijukya habwakabi akayagambire okubakora; tiyakakora.” (Yon. 3:​1-10) Yahwe akahindura encwamu ey’akaba akozere habwokuba abantu ba Nineve bakegarukamu hanyuma y’okuhurra obutumwa bwe obw’omusango.

Ekyokurorraho ekyakabiri nikyo eky’omurwani arukweta Kuro, ayakulekiire Abayudaaya kuruga omu bunyagwa nukwo bombeke buhyaka yekaru ya Yahwe. (Is. 44:26–45:4) Omukama Kuro owa Buperesi akahikiiriza obunabbi bunu. (Ezer. 1:​1-4) Baitu, Kuro akaba atali muheereza wa Yahwe. N’obukiraaba ngu Yahwe akakozesa Kuro kuhikiiriza obunabbi obu, atamuhambirize kumuheereza, baitu akamuleka ayecweremu.—Nfu. 21:1.

Zinu tinizo ensonga zonka Yahwe ez’asigikirraho obwaba n’acwamu kumanya ebiraabaho omu kasumi ak’omumaiso. Amananu gali ngu, busaho muntu asobora kwetegereza byona ebirukukwata ha mulingo Yahwe akoramu ebintu. (Is. 55:​8, 9) Baitu, Yahwe ebyatumanyisize nibigumya okwikiriza kwaitu ngu obwire bwona akora ebihikire, otwaliremu n’obukirukuhika ha busobozi bwe obw’okumanya ebiraabaho omu kasumi ak’omumaiso.