Иегова келир үени өттүр сөглеп шыдаар деп, Библия тода көргүскен (Иса. 45:21). Ынчалза-даа Бурган ону кажан база канчаар ажыглаарын ында тодаргай тайылбырлаваан. Келир үеден ол ылаңгыя чүнү билип алыксаарын чугаалаваан. Ынчангаш ол айтырыгга түңнел кылбас болза эки. Билир чүүлдеривисти көрүптээлиңер.

Иегованың бодунга тургузуп алган кызыгаарындан аңгыда, өске кызыгаар чок. Бурганның мерген угааны эгээртинмес болгаш, күзээн-не чүвезин ол өттүр сөглеп шыдаар (Рим. 11:33). Иегова тергиини-биле туттунуп билир, ынчангаш келир үеге хамаарыштыр бир-ле чүүлдү билбес болурун шиитпирлеп ап болур. (Деңнеңер: Исайя 42:14.)

Иегова күзел-соруун боттандырып турар. Келир үени баш удур билири-биле ооң харылзаазын Исайя 46:10-да тайылбырлаан: «Төнчүзүнде чүү боорун эгезинде-ле, ам-даа болбаан чүве дугайында баш бурунгаар медеглеп турар Бурган мен. Мээң бодалым боттаныр, күзээн бүгү чүвемни күүседир мен».

Иегованың бодап алган шупту чүүлүн күүседир күжү бар болгаш, келир үени чугаалап шыдаар. Чижээ, фильмниң канчаар төнерин билип алыр дээш, дораан төнчүзүнче чылдырып ап болур бис. А Иегова келир үеде болуушкуннарның канчаар болурун билир болгаш, ону тодарадып турбас. Харын-даа ол чүү болурун шиитпирлээш, чугаалаан чүүлү үе-шагында бүде бээр кылдыр болуушкуннарны углаптар (Хост. 9:5, 6; Мф. 24:36; Аж.-ч. 17:31).

Ынчангаш Библияның амгы очулгаларында, Иегованың келир үеде күзел-соруун чугаалаанда, «шиитпирлеп», «белеткеп келген» база «бодап алган» деп сөстерни ажыглап турар (4 Хаан. 19:25; Иса. 46:11; Иер. 18:11). Баштайгы дылда ол кылыг сөстери «дой сава кылыкчызы» деп сөс-биле төрелдешкек (Иер. 18:3, 4). Шевер дой сава кылыкчызы малгаштан чараш саваны хевирлептери ышкаш, Бурган бодунуң күзел-бодалын күүседир дээш, болуушкуннарны хевирлептер азы углаптар (Эф. 1:11).

Иегова хостуг эргени хүндүлээр. Бурган кижи бүрүзүнүң салымын баш удур шиитпирлевес: кижилерни буян кылырынче албадавас, узуткаашкынга онаажыр багай херектерже чыгавас. Иегова биске амыдыралдың оруун шилип алырын чөпшээрээш, шын алдынарынче кыйгырып турар.

Ийи чижектен көрээли. Баштай Ниневияның чурттакчыларын чугаалажыптаалы. Дыка хөй каржы бачыды дээш, Иегова ол хоорайны узуткаарын дыңнадып каан. А олар буруузун миннип кээрге, Бурган «аазап турганы айыыл-халапты таварыштырарындан ойталаан» (Иона 3:1—10). Олар оваарындырыгны дыңнаарга, Иегова шиитпээн.

Ийиги чижек — Кир деп аттыг эжелекчиниң дугайында өттүр сөглээн медеглел. Ол хаан еврейлерни кулданыгдан хостааш, Иегованың өргээзин катап тудар чарлык үндүрерин Ыдыктыг Бижилгеде медеглеп каан (Иса. 44:26—45:4). Ону Персияның хааны Кир күүсеткен (Эзра 1:1—4). Медеглелин күүседирде Иегова алыс шын Бурганга чүдүвес хаанны ажыглаан (У. ч. 21:1). Ынчалза-даа Бурган Кирни ооң бараалгакчызы болурунче албадаваан.

Келир үени чугаалаарда Иегованың кичээнгейге алыр чүүлдериниң чүгле чамдыызын көрдүвүс. Чаңгыс-даа кижи ооң бодалдарын төнчүзүнге чедир билип шыдавас (Иса. 55:8, 9). Ынчалза-даа келир үеге хамаарыштыр Бурганның биске ажыткан чүүлү, ооң үргүлчү шын алдынарынга бүзүредип турар.