Te Biblia jamal ya yal te Jehová ya snaʼ te bin ya xkʼot ta pasel ta pajel chaʼbej (Is. 45:21). Pero ma schol kaʼiytik te bin-utʼil ya spas, te bin-ora ya spas o te jayebto ya skʼan ya snaʼ. Jaʼ yuʼun, ma jnaʼtik spisil ta swenta te bin-utʼil ya snaʼ te Jehová te bin ya xkʼot ta pasel ta pajel chaʼbeje. Pero aynix te bintik jnaʼojtike.

Te Jehová ma pʼisbiluknax te bin ya spase, pero ay baeltik te ay bin ma spas. Te bitʼil ma pʼisbiluk te spʼijile, ya xjuʼ ya yal te bin ya skʼane (Rom. 11:33). Pero te bitʼil ya snaʼ skomel sba, jaʼnix jich ya sta ta nopel te maba ya skʼan ya snaʼ te bin ya xkʼot ta pasele (paja awil sok Isaías 42:14).

Te Jehová ya skʼotes ta pasel te skʼanojel yoʼtan. ¿Bin smakojbey skʼoplal sok te ya snaʼ te bin ya xkʼot ta pasel ta pajel chaʼbej? Te Isaías 46:10 jich ya schol ta alel: «Ya calbe scʼoblal te shahchibal cʼalal ta slajibal, cʼalal ta namey, te bin ma to ba cʼohem ta pasel; hich ya cal: Ya xcʼoht ta pasel te bintic jnopoj, ya jpas spisil te bintic ya scʼan coʼtan».

Jun swentail te ya xjuʼ ya yal te Jehová te bin ya xkʼot ta pasel ta pajel chaʼbeje, jaʼ te ay yuʼel yuʼun ya xkʼot ta pasel. Ma jichuk ya spas te bin-utʼil te joʼotik te kʼalal ya kiltik jun película te ya jkʼasestik bael spisil yuʼun ya kiltik te bin ya xkʼot ta pasel ta slajibal te peliculae. Te bin ya spas te Jehová jaʼ te ya sta ta nopel te bin-ora ya xkʼot ta pasel sok ta mero yorail (Éx. 9:​5, 6; Mat. 24:36; Hech. 17:31).

Jaʼ yuʼun te Jehová ya stuuntes kʼopiletik jich bitʼil «chapal cuʼun» «te bin jnopoj» yuʼun ya yakʼ ta naʼel te bin la spas ta swenta te bin ya xkʼot ta pasel ta pajel chaʼbej (2 Rey. 19:25; Is. 46:11). Ta hebreo, te versiculoetik ini snitojbey sba skʼoplal sok te kʼopil «jpacʼojom» (Jer. 18:​3, 4). Jich bitʼil te jpakʼojom te ya snaʼ stuuntesel ta lek te ajchʼal sok ya spas ta jun tʼujbil vasija, te Jehová ya xjuʼ ya schajpan o jaʼ ya snaʼ te bin ya spas yuʼun ya skʼotes ta pasel te skʼanojel yoʼtane (Efes. 1:11).

Te Jehová ya yakʼ jtsatik te bin ya jpastike. Maba yaloj te bin ya xkʼot ta pasel ta stojol jujuntul te ants winik, sok maba ya suj te ants winiketik te lek yoʼtanik yuʼun ay bin spasik te ya staik lajel yuʼune. Jaʼ ya yakʼ jnoptik te bin lek ta pasel ta jkuxlejaltik sok ya yakʼ jtsatik te bin ya skʼan ya jpastike.

Kiltik chebuk ejemplo. Te sbabial jaʼ ya kalbeytik skʼoplal te ants winiketik ta Nínive. Te bitʼil kʼax bayal bin chopol ta lum abi, te Jehová la yal te ya yichʼ lajinel. Te bitʼil la sujtes yoʼtanik, te Dios «la suht scʼop yuʼun te bin chopol yaloj te ya spasbe» (Jon. 3:​1-10). Te Jehová ma la spas te bin yalojix-ae, ¿bin yuʼun? Melel te ants winiketik ta Nínive la schʼam yaʼiyik te bin albotik yuʼun te Jehová sok la staik ta nopel te ya sujtes yoʼtanike.

Te schebal ejemplo jaʼ ta swenta te albilkʼop ta stojol te Ciro, te machʼa ya slokʼes ta libre te judioetik sok te ya yakʼ ta pasel yan buelta te templo yuʼun te Jehová (Is. 44:​26–45:4). Te albilkʼop ini la skʼotes ta pasel te ajwalil Ciro ta Persia (Esd. 1:​1-4). Pero te Ciro ma xyichʼ ta mukʼ te Jehová. Melelnix-a te la stuuntes te Jehová yuʼun ya skʼotes ta pasel te albilkʼop, pero maba la suj swenta ya x-ichʼot ta mukʼ yuʼun (Prov. 21:1).

Bayal bin smakojbey skʼoplal ini. Jnaʼojtik te maʼyuk jtuluk ants winik te ya xkʼot ta yoʼtan te bin ya snop sok te bin ya spas te Jehová, ni jaʼuk te bin ya yal te ya xkʼot ta pasel ta pajel chaʼbej (Is. 55:​8, 9). Ta swenta te bin ya jnaʼtik ta stojol te Jehová ya schʼuun koʼtantik te spisil-ora ya spas te bin toj, tey ochem skʼoplal-euk-a te bin ya yal te ya xkʼot ta pasel ta pajel chaʼbej.