Li Vivliae jamal chal ti xuʼ xal Jeova li kʼusi chkʼot ta pasel ta jelavele (Is. 45:21). Melel onoʼox ti muʼyuk chal ti kʼu yelan tspase, ti kʼusi ora tspase o li kʼusitik tskʼan tsnaʼ ta sventa li kʼusi chtal ta tsʼakale. Jaʼ yuʼun, mu jnabetik skʼoplal skotol li kʼusi chkʼot ta pasel ta jelavele. Pe oy junantik ti xuʼ jnabetik skʼoplale.

Li Jeovae muʼyuk spajeb li kʼusitik tspase, pe bakʼintike oy kʼusitik muʼyuk tspas. Jaʼ yuʼun, xuʼ xal kʼusiuk noʼox chkʼot ta pasel ta tsʼakal (Rom. 11:33). Pe ta skoj ti lek snaʼ spajtsan sbae, oy kʼusitik muʼyuk chakʼ ta yoʼonton snabel skʼoplal li kʼusi chkʼot ta pasel ta tsʼakale (koʼoltaso xchiʼuk Isaias 42:14).

Li Jeovae tspas li kʼusi oy ta yoʼontone. ¿Kʼuxi te snitojbe sba skʼoplal xchiʼuk ti xuʼ xal li kʼusi chkʼot ta pasel ta tsʼakale? Xi chalbe skʼoplal Isaias 46:10: «Ta slikebal onoʼox chkal ti kʼu yelan chkʼot ta tsutsele xchiʼuk ta voʼne laj kal li kʼusitik muʼyuk to kʼotemik ta pasele. Xi chkale: ‹Chkʼot ta pasel li kʼusi kʼotem ta nopel kuʼune xchiʼuk ta jpas li kʼusi tskʼan koʼontone›».

Jun srasonal ti xuʼ xal Jeova li kʼusi chkʼot ta pasel ta tsʼakale jaʼ ti oy sjuʼel sventa jechuk xkʼot ta pasele. Li Jeovae mu persauk tskʼelbe stsutseb ta anil li kʼusitik chkʼot ta pasele, ti xkoʼolaj ti kʼotem xa ta pasel skotol yilele. Li Jeovae xuʼ xal kʼusitik chkʼot ta pasel mi kʼot yoraile. Vaʼun, chakʼ kʼotuk ta pasel li kʼusi tskʼane (Eks. 9:​5, 6; Mat. 24:36; Ech. 17:31).

Jaʼ yuʼun, li Jeovae tstunes kʼopetik kʼuchaʼal «jchapanoj», «jmeltsanoj» xchiʼuk «jech kʼotem ta nopel kuʼun» sventa xakʼ ta ilel ti kʼot ta pasel yuʼun li kʼusi yaloje (2 Rey. 19:25; tsʼib ta yok vun; Is. 46:11). Li ta ebreo kʼope, li versikuloetik taje jaʼ tstunes li jpʼel kʼop «jpatpʼine» (Jer. 18:4). Jech kʼuchaʼal jun jpatpʼin ti lek xtojob ta spatel li achʼele xchiʼuk ti tspas jun kʼupil sba pʼine, li Jeova eke xuʼ spas yuʼun li kʼusitik oy ta yoʼontone (Efes. 1:11).

Li Jeovae chakʼ jnop jtuktik li kʼusi ta jkʼan ta jpastike. Li Jeovae muʼyuk baʼyel xa onoʼox yaloj li kʼusi chkʼot ta stojolal jujun krixchanoe mi jaʼuk tsuj sventa oyuk kʼusi chopol spasik ti xuʼ sta-o slajelike. Yuʼun jaʼ noʼox chakʼ kiltik kʼusi skʼan jpastik sventa lekuk xijkuxie xchiʼuk ta jujuntal chakʼ jnoptik li kʼusi ta jkʼan ta jpastike.

Kalbetik chib skʼelobil. Li baʼyele jaʼ ta stojolal li jnaklejetik ta Ninivee. Toj echʼ noʼox chopol li krixchanoetike, jaʼ yuʼun li Jeovae laj yal ti chichʼik lajesele. Pe ta skoj ti la sutes yoʼontonike, li Diose «la xchaʼnop to li kʼusi chopol snopoj tspasbe jteklume. Jech oxal, muʼyuk xa laj yakʼ taluk ta stojolalik li lajelal yaloje» (Jon. 3:​1-10). ¿Kʼu yuʼun la sjel Jeova li kʼusi snopoj xa ox tspase? Yuʼun li jnaklejetik ta Ninivee la xchikintaik li pʼijubtasel albatik yuʼun Jeovae xchiʼuk la sutes yoʼontonik.

Li xchibale jaʼ ta sventa li albil kʼop ta stojolal Siroe, ti jaʼ tspoj lokʼel li judaetik xchiʼuk ti jaʼ chal mantal sventa xichʼ chaʼvaʼanel li stemplo Jeovae (Is. 44:26–45:4). Li albil kʼop taje jaʼ kʼot ta stojolal li ajvalil Siro ta Persiae (Esd. 1:​1-4). Pe li Siroe muʼyuk chichʼ ta mukʼ li melel Diose. Akʼo mi tunesat yuʼun Jeova sventa xkʼot ta pasel li albil kʼope, muʼyuk sujat sventa xtun ta stojolal (Prov. 21:1).

Ep kʼusitik smakoj li kʼusitik laj xa kalbetik skʼoplale. Ti melel xkaltike, li krixchanoutike mu xkaʼibetik smelolal skotol li kʼusitik tsnop xchiʼuk tspas li Jeovae mi jaʼuk ti xuʼ xal li kʼusi chkʼot ta pasel ta tsʼakale (Is. 55:​8, 9). Akʼo mi jech, li kʼusi jnaʼojtik ta stojolal Jeovae te chkakʼtik venta ti lek onoʼox skotol li kʼusitik tspase, akʼo mi jaʼ sventa li kʼusitik tspas ta jelavele.