Библиысь ми тодӥськомы, Иегова азьло ик вераны быгатэ шуыса, мар луоз азьланяз (Ис. 45:21). Но отын верамын ӧвӧл, ку но кызьы Иегова сое лэсьтэ, соин ик ми ваньзэ ум тодӥське Иеговалэн сыӵе быгатонлыкез сярысь. Но тани мае ми тодӥськомы Библиысь.

Иегова котьмае лэсьтыны быгатэ, но куддыръя со мае ке уг лэсьты. Иегова туж визьмо. Солэн потӥз ке, со быгатоз вераны ваньзэ, мар луоз азьланяз (Рим. 11:33). Озьы ик солэн туж трос чиданэз, со возиськыны быгатэ. Соин ик со куддыръя тодыны уг тыршы, мар луоз азьланяз. (Ӵошатэ Исаиялэсь 42:14.)

Иегова ваньзэ тупатыны быгатэ озьы, солэн эрикез мед быдэсмоз шуыса. Кызьы со герӟаськемын азьпалзэ ивортыны быгатонэныз? Исаия 46:10 валэктэ: «Кутсконысеныз ик Мон ивортӥ пумаз мар луон сярысь, вашкала дауръёсысь верамлэн маиз ӧз на быдэсмы, сое Мон верасько: Мынам малпанэ быдэсмоз, мар Мыным кулэ, Мон ваньзэ лэсьто».

Иегова аслэсьтыз верамзэ котьку быдэстыны быгатэ. Со одӥгез муг, малы Иегова вераны быгатэ, мар луоз азьланяз. Кылсярысь, милям потэ ке тодэммы, маин йылпумъяськоз фильм, ми соку ик солэсь пумзэ учкыны быгатӥськомы. Но Иегова озьы уг лэсьты. Со пуктэ дыр, ку мар ке луыны кулэ, собере югдуръёсты тупатэ озьы, ваньмыз пуктэм дыраз мед быдэсмоз шуыса (Пот. 9:5, 6; Матф. 24:36; Ап. уж. 17:31).

Соин ик, куке Библиын верамын, мар малпаз Иегова вуоноез пумысен, кутӥсько, кылсярысь, таӵе кылъёс: «пусйи» но «дасясько» (Ис. 46:11; Иер. 18:11). Еврей кылын та кылъёс «горшок лэсьтӥсь» кыллы матын луо (Иер. 18:4). Кызьы горшок лэсьтӥсь горд сюйлэсь чебер ваза лэсьтыны быгатэ, озьы ик Инмар но югдуръёсты тупатыны быгатэ озьы, аслаз эрикез мед быдэсмоз шуыса (Еф. 1:11, 12).

Иегова бырйыны луонлык сётэ. Инмар кужмысь уг косы адямиез ӟеч ужъёс лэсьтыны. Озьы ик со кужмысь уг косы урод ужъёсты но лэсьтыны, кудъёсыз понна адями быдтэмын луысал. Иегова лэзе милемлы асьмелы бырйыны, кызьы улыны но мар карыны, но со дыре ик со дышетэ милемыз шонер улыны.

Учкомы кык примеръёсты. Нырысь вераськомы Ниневияын улӥсьёс сярысь. Соос трос лек ужъёс лэсьтӥзы. Соин ик Иегова вераз, Ниневия быдтэмын луоз шуыса. Но куке отын улӥсьёс ӧпкелизы, Инмар «шугадӟон соос вылэ лэзё шуиз но, ӧз лэзьы» ни (Иона 3:1—10). Иегова аслэсьтыз малпанзэ воштӥз, малы ке шуоно Ниневияын улӥсьёс солэсь кылзӥськизы но воштӥськизы.

Кыкетӥ пример — Кир эксэй сярысь азьпалзэ ивортон. Верамын вал, со еврейёсты пленысь мозмытоз но Иеговалэсь храмзэ выльысь пуктыны косоз шуыса (Ис. 44:26—45:4). Та азьпалзэ ивортонэз быдэстӥз Персиялэн эксэез, Кир (Езд. 1:1—4). Со зэмос Инмарлы уг йыбыртъя вал, озьы ке но Иегова со пыр аслэсьтыз малпанзэ быдэстӥз (Мад. 21:1). Но Кирез Инмар кужмысь ӧз косы аслыз ужаны-тыршыны.

Ми ум тодӥське ваньзэ, мае лыдэ басьтэ Иегова, куке вера, мар луоз азьланяз. Малы ке шуоно одӥг адями но пумозяз валаны уг быгаты, мае малпа но мар лэсьтэ Иегова (Ис. 55:8, 9). Но со, мае ми тодӥськомы Инмар сярысь, милесьтым осконмес юнматэ, со котьку шонер лэсьтэ шуыса, озьы ик вуоноез сярысь но шонерзэ вера шуыса.