Baibol na tarọ phephẹn nẹ Jihova vwo ẹgba rọ vwọ riẹn obo re cha phia vwẹ obaro na. (Aiz 45:21) Baibol na vuẹ avwanre erọnvwọn eje kpahen obo ro ruo wan yẹrẹ ọke ro vwo ruẹ ọtiọye-en, eyẹn obo rọ guọnọ riẹn kpahen obaro na te-e. Ọtiọyena avwanre ghwa riẹn erọnvwọn eje kpahen ẹgba ri Jihova vwori rọ vwọ riẹn obo re cha phia vwẹ obaro na-a. Dedena, e jẹ a fuẹrẹn erọnvwọn evo.

O vwo obo ri bẹn Jihova eruo-o, jokpanẹ ọ guọnọ ruo-o. Jihova sa vwẹ aghwanre rọyen rọ basa-an na vwọ riẹn kemu kemu rọ guọnọ riẹn kpahen vwẹ obaro na. (Ro 11:33) Kidie nẹ o se suẹn oma rọyen gbagba, o ji se brorhiẹn ro vwo jẹ obo re cha phia vwẹ obaro na ẹriẹn.​​—Ni Aizaya 42:14.

Jihova ruo rere ọhọre rọyen vwo rugba. Idjerhe vọ yen ọnana vwo churobọ si ẹgba rọ vwọ riẹn obo re cha phia vwẹ obaro na? Aizaya 46:10 tare nẹ Jihova yen ohwo: “ro dje oba na nẹ etuọhọ rọye rhe nẹ awanre rhe imu ri ji ru-u tanẹ, Iroro mẹ che mudia, Mi che ru iroro mẹ ejobi gba.’ ”

Emu ọvo rọ sorọ ri Jihova sa vwọ riẹn obo re cha phia vwẹ obaro na yen o vwo ẹgba ro vwo ru kemu kemu. Ọ dia o che ruo rere ọ vwọ fobọ phia-a, kirobo re dje emu rere ọ sa vwọ riẹn obo re cha phia vwẹ obaro na-a​​—kerẹsiẹ ra da mrẹ nẹ erọnvwọn eje re cha phia vwẹ obaro na phia nure, ọtiọyena kọ de fuẹrẹn ayen tavwen e ke phia.Ukperẹ ọtiọyen, Jihova se djunute ọke rẹ orọnvwọn cha vwọphia, o mi ji ruo rere ọ phia ọke yena de te.​​—Ey 9:​5, 6; Mt 24:36; Iru 17:31.

Fikirẹ ọnana yen Baibol na vwọ reyọ eta kerẹ “iroro re me jẹre,” “ma,” kugbe “me ta nure” vwo djisẹ rẹ obo ri Jihova ruẹ kpahen erọnvwọn evo re cha phia vwẹ obaro na. (2Iv 19:25; Aiz 46:11) A fan eta nana vwo nẹ ota rẹsosuọ re ke vwo ruiruo ro churobọ si ota ro mudiaphiyọ “ọmaichẹ.” (Jer 18:4) Kirobo rẹ ọmechẹ rọ tẹn ona sa reyọ ọphiẹn vwọ ma ochẹ ro vwo erhuvwu ye, eriyin yen Jihova ji se ru korọnvwọn korọnvwọn rere ọhọre rọyen se vwo rugba.​​—Ẹf 1:11.

Jihova vwẹ uphẹn kẹ ihwo nẹ ayen brorhiẹn romobọ. Ọ rhuẹrẹ oborẹ ohwo ọvuọvo che yeren akpọ rọyen phiyotọ-ọ; yẹrẹ ko ruo rere ihwo ri vwo udu ọsoso vwọ rhoma ru obo re cha so oghwọrọ kẹ aye-en. Ọ vwẹ uphẹn kẹ ihwo eje nẹ ayen brorhiẹn romobọ, o ji jiro kẹ ayen nẹ ayen brorhiẹn ọsoso.

Jẹ e roro kpahen idje ivẹ. Udje rẹsosuọ na shekpahen ihwo ri Ninive. Jihova tarọ phiyotọ jovwo nẹ e che phi orere na kua fikirẹ umwemwu rayen. Ẹkẹvuọvo ọke rẹ ihwo na vwo kurhẹriẹ, Jihova “de siobọ nẹ idjerhe ọbrabra rọ jẹ kpahe nẹ ọye che ru ayen; o gbi ruo-o.” (Jon 3:​1-​10) Jihova de wene ẹwẹn kpahen obo rọ mraro rọyen phiyotọ kpahen Ninive kidie ayen kurhẹriẹ fikirẹ ovuẹ rẹ orhọesio ri Jihova ro te ayen obọ.

Udje rivẹ yen aroẹmrẹ ro shekpahen ohwo re se Sairọs ro che phi Babilọn kparobọ, o mi rhe siobọnẹ ihwo ri Ju re mu kpo eviẹn na je tanẹ a rhoma bọn uwevwin ẹga ri Jihova. (Aiz 44:26–​45:4) Aroẹmrẹ yena rugba vwẹ oma rẹ Ovie Sairọs ri Pẹsha. (Ẹzr 1:​1-4) Dedena, Sairọs ga Ọghẹnẹ rẹ uyota na-a. Jihova reyọ Sairọs vwo ru orugba rẹ aroẹmrẹ na, ẹkẹvuọvo ọ gba Sairọs nẹ ọ ga ọye-en.​​—Isẹ 21:1.

Vwọrẹ uyota, ọ dia enana yen erọnvwọn eje ri churobọ si obo ri Jihova vwọ reyọ ẹgba rọ vwọ riẹn obo re cha phia vwẹ obaro na vwo ruiruo-o. Aphro herọ-ọ, o vwo ohwo vuọvo ro che se vwo ẹruo rẹ obo ri Jihova ruẹ erọnvwọn wan vọnvọ-ọn. (Aiz 55:​8, 9) Dedena, oborẹ avwanre riẹn kpahen Jihova bọn esegbuyota rẹ avwanre gan, nẹ ọkieje yen o vwo ru obo re gbare​​—ọnana ji churobọ si ẹgba ro vwori rọ vwọ riẹn obo re cha phia vwẹ obaro na.