Mbudziso Dzi Bvaho Kha Vhavhali
Ndi zwifhio zwine Bivhili ya zwi bvisela khagala nga ha vhukoni ha Yehova ha u amba zwine zwa ḓo itea tshifhingani tshi ḓaho?
Bivhili i bvisela khagala uri Yehova u a kona u ḓivha zwine zwa ḓo itea tshifhingani tshi ḓaho. (Yes. 45:21) A i ri vhudzi zwidodombedzwa zwoṱhe zwa uri u zwi konisa hani na uri u ḓivha hani zwine zwa ḓo itea kana uri u khetha u ḓivha zwingafhani. Ngauralo, ri nga si kone u pfesesa nga vhuḓalo vhukoni ha Yehova ha u ḓivha zwine zwa ḓo itea tshifhingani tshi ḓaho. Naho zwo ralo, kha ri haseledze zwine ra nga zwi pfesesa.
Yehova a nga kona u ita tshiṅwe na tshiṅwe tshine a ṱoḓa, fhedzi nga zwiṅwe zwifhinga u khetha u sa ita zwiṅwe zwithu. A nga shumisa vhuṱali hawe vhu sa gumi u itela u ḓivha zwiṅwe na zwiṅwe zwine zwa ḓo itea. (Vharoma 11:33) Fhedzi nga nṱhani ha uri u a kona u ḓifara, u a khetha u sa ḓivha zwine zwa ḓo itea.—Vhambedzani Yesaya 42:14.
Yehova u ita uri hu itee zwine a zwi funa. Zwenezwi zwi tshimbidzana hani na vhukoni hawe ha u ḓivha zwine zwa ḓo itea tshifhingani tshi ḓaho? Yesaya 46:10 i ṱalutshedza uri: “Ndi dzula ndo amba u bva mathomoni zwine zwa ḓo itea, nda amba u bva misini ya kale zwine zwa sa athu u itea. Ndi ri, ‘Zwe nda dzudzanya zwi ḓo itea, ndi ḓo ita zwiṅwe na zwiṅwe zwine nda funa.’”
Tshiṅwe tshiitisi tsha uri ndi ngani Yehova a tshi kona u ḓivha zwine zwa ḓo itea tshifhingani tshi ḓaho ndi ngauri u na maanḓa a u ita uri zwithu zwi itee. A zwi ṱoḓei uri Yehova a ye u sedza uri ndi zwifhio zwine zwa ḓo itea tshifhingani tshi ḓaho, u fana na nḓila ine riṋe ra zwi ita ngayo musi ri tshi ya u sedza magumoni a muvi kana magumoni a bugu u itela u vhona uri ndi zwifhio zwine zwa ḓo itea. Nṱhani hazwo, Yehova a nga khetha uri ndi zwifhio zwine zwa nga itea tshifhingani tshi ḓaho, musi tshenetsho tshifhinga tshi tshi swika a ita uri zwenezwo zwithu zwi itee.—Ek. 9:5, 6; Mat. 24:36; Mish. 17:31.
Nga nṱhani ha tshenetshi tshiitisi, Bivhili i shumisa maipfi a ngaho sa “u dzudzanywa,” na “u itwa,” u itela u ṱalusa zwine Yehova a zwi ita nga ha zwine zwa ḓo itea tshifhingani tshi ḓaho. (2 Dzikh. 19:25; ṱms.; Yes. 46:11) Enea maipfi o ṱalutshedzelwa u bva kha ipfi ḽine ḽa nga amba “muvhumbi.” (Yer. 18:4) U fana na muvhumbi a re na vhutsila, ane a ita mudzio wavhuḓi a tshi shumisa vumba, Yehova u ita uri hu itee zwine a zwi funa.—Vhaef. 1:11.
Yehova u tendela vhathu vha tshi tou ḓiitela phetho vhone vhaṋe. Ha khethi uri ndi zwifhio zwine zwa ḓo itea vhutshiloni ha muthu muṅwe na muṅwe kana u ita uri vhathu vha mbilu dzavhuḓi vha ite phetho dzine dza ḓo vha dzhenisa khomboni. U tendela muṅwe na muṅwe a tshi tou ḓiitela phetho ene muṋe fhedzi u vha ṱuṱuwedza u ita phetho dzavhuḓi.
Kha ri ṱhogomele tsumbo mbili. Tsumbo ya u thoma i kwama vhathu vha Ninive. Yehova o vha o amba uri muḓi wa Ninive wo vha u tshi ḓo fheliswa nga nṱhani ha vhuvhi havho. Fhedzi musi vhathu vha Ninive vha tshi rembuluwa Yehova o “shandula muhumbulo wawe nga ha maṱungu e a vha o amba uri u ḓo vha ḓisela one, a si tsha a ḓisa.” (Yona 3:1-10) Yehova o shandula muhumbulo wawe nga zwe a vha o amba uri zwi ḓo itea kha muḓi wa Ninive nga nṱhani ha uri vhathu vha Ninive vho khetha u shandula nḓila ine vha tshila ngayo musi vha tshi pfa tsevho i bvaho kha Yehova.
Tsumbo ya vhuvhili ndi vhuporofita vhu ambaho nga ha Korese, we a vha a tshi ḓo vhofholola Vhayuda vhupulini u itela uri vha ye u fhaṱulula thembele ya Yehova. (Yes. 44:26–45:4) Khosi Korese wa Peresia o ita uri honovhu vhuporofita vhu itee. (Esera 1:1-4) Naho zwo ralo, Korese o vha a sa gwadameli Mudzimu wa ngoho. Yehova o shumisa Korese u itela u ita uri honoho vhuporofita vhu itee, fhedzi ho ngo kombetshedza Korese uri a mu gwadamele.—Mir. 21:1.
Zwenezwi zwi tou vha zwiṅwe zwa zwithu zwine Yehova a humbulisisa nga hazwo musi a tshi ri vhudza zwine zwa ḓo itea tshifhingani tshi ḓaho. Ngoho ndi ya uri a hu na muthu ane a nga pfesesa zwine Yehova a zwi humbula na zwine a zwi ita nga vhuḓalo. (Yes. 55:8, 9) Naho zwo ralo, zwine ra zwi pfesesa nga ha Yehova zwi khwaṱhisa lutendo lwashu na u ri thusa u vhona uri u dzula a tshi ita zwo lugaho, u katela na musi a tshi ri vhudza zwine zwa ḓo itea tshifhingani tshi ḓaho.