Biblya onniiwanyeiha weera Yehova pooti ohima itthu sa muhoolo. (Yes. 45:21) Mene owo khoniiwanyeiha itthu sootheene woohima sa moota ni liini Yehova ompakaawe eyo ni liini onthanlaawe osuwela. Nto hiyo khaninsuwela itthu sootheene woohima sa owera Yehova araaweno wa ohima itthu sa muhoolo. Mene sookhala itthu sikina sinanroromeliha.

Yehova pooti opaka etthu eri poothe ontthunaawe mene ikwaha ikina onnathanla ohipaka itthu ikina. Mwaha wa osuwela wawe woohimala, Yehova pooti ohima etthu eri poothe owo ontthunaawe. (Arom. 11:33) Mene Yehova pooti othanla ohisuwela etthu enrowa weereya mwaha wooweera owo onniiwehexexa mwaneene awe. — Munwehe-tho Yesaya 42:14.

Yehova onnanroromeliha weera yootthuna awe enimweereya. Nto eyo envarihana hayi ni owera owo araaweno wa ohima itthu sa muhoolo? Yesaya 46:10 oneera ha: “Okhuma wopatxerani ti miyo kilaleñye sa muholo, anyi, okhuma ehuhu ya khalai itthu sihàkunve wereya. Ti miyo kinèra, ‘muteko aka onnakhala, seiyo sinakisivela miyo kinopanka.’”

Etthu emmweeriha Yehova ohima itthu sa muhoolo, mwaha wooweera owo ookhalano owera wooweeriha weereya etthu. Owo khontthuneya oweha itthu seereñye weera ahime itthu sa muhoolo, owo khanlikana ni mutthu ansoma epaphelo yoomalihera ya eliivuru aasaka osuwela etthu yoomalihera. Opwaha mwa yeeyo, Yehova pooti othanla weera etthu yeereye mwa etempu owo ontthunaawe, ni owo annawehexexa weera etthu eyo yeereye mwa etempu yoophwanelela. — Ott. 9:5, 6; Math. 24:36; Mit. 17:31.

Mwaha wa yeeyo, Biblya onnavarihela muteko masu ntoko ‘kooreherera,’ ‘koopaka,’ naari ‘koolipiha’ weera ahime etthu Yehova ompakaawe moovarihana ni ele enrowa weereya muhoolo. (2 Mam. 19:25; enoota; Yes. 46:11) Itthu iya, sootaphulela sa masu oowiiwanyeya yaawo envarihana etaphulelaka ‘oloko.’ (Yer. 18:4) Hiihaale ntoko oloko woowera ompakaaya mwaapu ni weeriha mwaapu owo okhala wooreera, Yehova pooti opaka naari oreherera itthu weera yootthuna awe yeereye. — Aef. 1:11.

Yehova onvaha othanla mutthu ori poothe ni owo onnattittimiha eyo. Owo khanhima etthu enrowa omukhumelela mutthu, nave owo khammweeriha mutthu ooreera murima opaka etthu yeera emukumihere maxupo naari etthu yeera emweerihe onyaanyiwa. Owo onnaakhulela weera mutthu ori poothe athanleke ephiro awe, nave onnawooperera atthu weera etthareke ephiro yooreera.

Moone ntakihero na atthu a oNinive. Yehova aahihima weera ecidade ele yaamunyaanyiwa. Mene vaavo atthu a oNinive yaattharunwaaya, Yehova “àttharuwa ahiyaka soonanara atthunaiye owèrela yawo, ni khapankiye etthu.” (Yona 3:1-10) Yehova aahitxenta miruku wa ele aahimmaawe mwaha wooweera atthu a oNinive yaahivarihela muteko nnene otaphuwa waya wa othanla nave yaahaakhulela mitthenka sa Yona. Awosa yaahittharuwa nto mwaha wa yeeyo, awo khayaanyaanyinwe.

Ntakihero nikina ti na eprofesiya woohima sa Kiro, yoowo eera aavuluxe aYuda omuthaamiheriwoni ni eera alamule otekiwa veeli epewe ya Yehova. (Yes. 44:26–45:4) Mwene Kiro a oPersia, aahikwanihera eprofesiya ela. (Ezra 1:1-4) Yehova aahinvarihela muteko Mwene Kiro weera akwanihere eprofesiya ela ahimukhanyereraka omukokhorela owo. Naari neere, Kiro aahipaka soothanla sawe mootaphuwa, nave aahithanla woohima sa ole eeraawe amukokhoreleke. — Mir. 21:1.

Ekhaikhai weera sookhala itthu ikina simmweeriha Yehova osuwela itthu sa muhoolo. Nto ohima ekhaikhai, khavo mutthu onwera osuwela nnene sene iphiro sa Yehova, naari neere, moota owo onuupuwelaawe ni itthu ompakaawe. (Yes. 55:8, 9) Mene itthu sootheene Yehova onlenlaawe, sinnalipiha nroromelo nahu nooweera owo onnapaka etthu yooreera ohela mpuwa vaavo owo onhimaawe itthu sa muhoolo.