Biibiliya onnitthokiherya oratteene wiira Yehova pooti ohimya itthu sinrowa wiiraneya muhoolo. (Yes. 45:21) Masi Biibiliya khonihimya itthu sootheene sa moota Yehova onrowa awe opaka, okathi ene wala okathi onithanla awe wiira aasuwelihe atthu akina. Tivonto, khaninwerya osuwela owerya Yehova orina awe wa ohimya itthu sinrowa wiiraneya muhoolo. Masi sookhala itthu sikina nikhanle ahu oosuwela.

Yehova pooti opaka itthu sikina oniphavela awe, masi sikina ohipaka. Okhala wiira Yehova ookhalana osuwela ohinimala, owo pooti opaka khula etthu oniphavela awe. (aRom. 11:33) Masi ikwaha sikina, owo onnithanla ohipaka etthu okhala wiira onnisuwela wiihiiha. — Munwehe-tho Yesaya 42:14.

Yehova onnilipiherya wiira itthu oniphavela awe sinimwiiraneya. Masi eyo enivarihana sai ni owerya orina awe wa ohimya itthu sinrowa wiiraneya muhoolo? Yesaya 46:10 onihimya so: “Okhuma wopajeryani, miyo kinnilaleya sinrowa wiraneya: Okhuma khalayi, kinnilaleya sihinatthi okhumelela. Miyo kohimya wira: ‘Itthu sintthunaka sinokhala: Itthu sinkisivela, kinimwira’”.

Etthu enimwiiriha Yehova ohimya enrowa wiiraneya muhoolo, okhala wiira owo ookhalana owerya wa opaka ele oniphavela awe. Owo khonipirisari osoma itthu sinrowa wiiraneya muhoolo, ntoko wiira itthu iyo sihiiraneya, wala ntoko siisale mutthu onisoma awe epaaxina yookiserya ya eliivuru, ophavelaka osuwela wiira eliivuru eyo yoomala. Ohiya-vo, Yehova pooti othanla ohimya etthu enrowa wiiraneya okathi oniphavela awe. Nave owo onnikupali wiira etthu eyo, enrowa wiiraneya okathi wooreerela. — Okhum. 9:5, 6; Math. 24:36; Mit. 17:31.

Ti maana aya Biibiliya onirumeela awe moolumo oowi “kupuwenle”, “kilamunle” ni ‘kipanke’ ophavelaka wooniherya itthu Yehova onipaka awe moovarihana ni itthu sinrowa wiiraneya muhoolo. (2 Mam. 19:25; Yes. 46:11) Moolumo ala, ataphuleliwe ni nttaava noopacerya ni yaavarihana ni moolumo yaataphulela wiira “mulipa-òwupa”. (Yer. 18:4) Ntoko siisale mulipa-osuwela wuupa onipaka awe mwaapu, atthuna vale onyaanya ni khutthikela wuupa mukina wooloka, siiso-tho, Yehova pooti opaka aahiiso olokiherya itthu sipanke awe wiira yiireye ele oniphavela awe. — aEef. 1:11.

Yehova onvaha khula mmosa a hiyo eparakha ya opaka itthu mootaphuwa ni onnittittimiha soothanla iyo. Owo khonimuthanlela mutthu etthu enrowa omwiiraneela mookumi mwawe. Nave khoniwiiriha atthu ooreera murima, opaka itthu soohiloka sikhanle oowiiriha opweteya. Onniweemererya apinaatamu opaka yoothanla ya otthara ephiro aniphavela aya, masi onnaatumererya atthu ootheene wiira atthareke ephiro yooloka.

Nwehe ntakiheryo na atthu yaakhala oNiinive. Yehova aahihimya wiira muttetthe ole, wampwetexiwa mwaha wa itthu soohiloka saapakiwa ni atthu ale. Masi nuumala atthu a muttetthe ole orukunuxa mirima saya, Yehova “ahihiya ehukhumu yalakenlyawe wakumiherya, khuhahukhumu”. (Yona 3:1-10) Yehova aahituruka muupuwelo awe, voohimya sa ele aaleihenrye awe owiiriha atthu oNiinive, okhala wiira atthu ale yaahirumeela eparakha yaarina aya, ya opaka itthu mootaphuwa ni yaaheemererya muhupi wa Yona. Nto okhala wiira yaahittharuwa, khiyaapwetexiwe.

Ntakiheryo nikina ti na eprofesia yaamuhimya Mwene Kiro, yoowo aarowa owoopola ayuda weepotthani, ni aarowa wiiriha otthikela otekiwa etemplo ya Yehova. (Yes. 44:26–45:4) Nto Mwene Kiro a oPersia, aahimaliherya eprofesia eyo. (Eezi. 1:1-4) Yehova aahimurumeela Kiro wiira omalelihe eprofesia awe, masi khaamukhanyerenrye omukokhorela yena. Kiro aahirumeela eparakha yaarina awe ya opaka itthu mootaphuwa, ni ya omuthanla ti pani aarowa awe omukokhorelaka. — Mir. 21:1.

Ekeekhai wiira sookhala itthu sinceene sinihela muhina, owerya Yehova orina awe wa osuwela itthu sinrowa wiiraneya muhoolo. Ohimya ekeekhai, khuuvo pinaatamu oniwerya osuwela oratteene iphiro sa Yehova, eyo piiyo, etthu onuupuwela awe ni itthu onipaka awe. (Yes. 55:8, 9) Masi itthu sootheene Yehova onnisuweliha awe, sinnilipiha waamini wahu wiira khula okathi owo onipaka itthu sooloka, ohela muhina itthu onihimya awe sinrowa wiiraneya muhoolo.