Yihooway sinttanaabaa kasetidi yootana danddayiyogaa Geeshsha Maxaafay loytti qonccissees. (Isi. 45:21) Yihooway waatidi, woy awude oottiyakko, woykko ay keenabaa eranawu kuuyiyakko Geeshsha Maxaafay ubbabaa yootenna. Yaaniyo gishshawu, sinttanaabaa kasetidi yootiyo Yihoowa eraabaa nuuni ubbabaa akeekana danddayokko. Shin nuuni akeekana danddayiyo amaridabati deˈoosona.

Yihooway koyiyo ubbabaa oottana danddayikkonne, issi issitoo amaridabaa oottennan agganawu doorees. Yihoowawu zawi baynna aadhdhida eratettay deˈiyo gishshawu, I koyido ubbabaa kaseti yootana danddayees. (Roo. 11:33) Shin I sinttappe hananabaa erennan agganawukka doorana danddayees.

Yihooway ba koyidobay polettanaadan oottees. Sinttanaabaa kasetidi yootiyo A eraara hegee waani gayttii? Isiyaasa 46:10y hagaadan gees: “‘Ta qofai minnana; qassi taanikka ta halchchuwaa ubbaa polana’ yaagais. Wurssettan hananabaa doomettan, qassi biron hanibeenna yohota beni wodiyaappe doommada awaajjais.”

Yihooway sinttanaabaa kasetidi yootana danddayiyo issi gaasoy issibaa oottanawu awu wolqqay deˈiyo gishshataassa. Nuuni issi pilimiya wurssettan haniyabaa eranawu pilimiya wurssettaa issi issitoo beˈoos, shin Yihooway sinttappe hananabaa eranawu nuugaadan oottana koshshenna. Gidoppe attin, Yihooway issibaa oottanawu wodiya keerana danddayees; yaatidi he keerido wodee gakkin polettanaadan oottees.—Kes. 9:5, 6; Mat. 24:36; Oos. 17:31.

Hegaa gishshawu, Geeshsha Maxaafay Yihooway sinttappe oottiyo amaridabata qonccissanawu ‘halchchiis’ giya qaalaa goˈettees. (2 Kaw. 19:25; Isi. 46:11) Ha qaalay koyro xaafettido doonan ‘urqqaa medhdhiyogaa’ giyagaara issi mala qofay deˈiyo qaalaappe birshshettiis. (Erm. 18:3, 4) Urqqaa medhdhiyogan gooba gidida issi uri urqqaa munaqqidi loˈˈiya miishshaa oottiyogaadan, Yihoowaykka ba halchchuwa polanawu issibaa ba koyidoogaadan oottana danddayees.—Efi. 1:11.

Yihooway asay ba koyidobaa dooranaadan paqqadiis. I asaa deˈuwan hananabaa kasetidi kuuyenna; woy loˈˈo asati bashshawu efiyabaa hananaadan oottenna. Ubba asay ba koyidoogaadan deˈana mala I paqqadiis; gidikkonne, eti waanidi suure deˈanaakko eta tamaarissees.

Ane naaˈˈu taariketa pilggoos. Koyroogee Nanawe asatubaa. Nanawen iitatettay darido gishshawu Yihooway he katamaa xayssanaagaa kasetidi yootiis. Shin yan deˈiyageeti bantta nagaran azzanidi laamettido wode, Yihooway “eta bolli ehaana giido iitabaa aggi bayiis.” (Yona. 3:1-10) Nanawe asati Yihooway yootidoba siyidi zilˈˈettidi laamettido gishshawu, Yihooway oottanawu kaseti yootidoba aggi bayiis.

Naaˈˈanttoogee, Qiiroosabaa yootiya hiraagaa; I Ayhudata omoodduwappe laˈa kessananne Yihoowa garoy zaarettidi keexettanaadan azazana. (Isi. 44:26–45:4) Parsse Kawoy Qiiroosi ha hiraagay polettanaadan oottiis. (Izi. 1:1-4) Shin Qiiroosi tumu Xoossawu goynniyagaa gidenna. Yihooway Qiiroosa baggaara ha hiraagay polettanaadan oottikkonne, Qiiroosi awu goynnanaadan wolqqanttibeenna.—Lee. 21:1.

Hageeti Yihooway sinttanaabaa kasetidi yootiyo wode oottiyobatuppe amaridaageetu xalaala. Yihooway qoppiyonne oottiyo ubbabaa ooninne muleera akeekana danddayenna. (Isi. 55:8, 9) Shin Yihooway nuussi qonccissidobay sinttanaabaa kasetidi yootiyo wodiya gujjin, I ubbatookka suurebaa oottiyogaa nuuni loytti ammanettanaadan maaddees.