Bible make-am clear say Jehovah get the power to know wetin go happen for future. (Isa. 45:21) But Bible no talk everything about how Jehovah take de do-am, or when e de do-am or wetin e de choose to know about something. So, we no know everything about this matter. But make we talk about somethings wey we know about-am.

Jehovah fit do anything wey e want, but sometimes, e de decide say e no go do somethings. Jehovah get sense well-well, so e fit use-am know anything wey e want know. (Rom. 11:33) But because e de really fit control imself, e fit still decide say e no want know wetin go happen.—Compare Isaiah 42:14.

Jehovah de make wetin e want happen. How this one take concern im power to know wetin go happen for future? Isaiah 46:10 talk say: “As something de start, I go talk how e go end, and from long-long time, I de talk things wey go happen. I say, ‘Na the thing wey I decide go happen, and na anything wey I like I go do.’”

So, one reason why Jehovah fit talk wetin go happen for future, na because e get power to make things happen. Jehovah no de go check wetin go happen for future before e know, like say them don already arrange how everything go happen, just as person fit go check wetin go happen for the end of film wey e de watch or book wey e de read, to know wetin go happen for the end. Instead, Jehovah fit decide say something go happen for some particular time, and when the time reach, e go make-am happen just as e want.—Ex. 9:5, 6; Matt. 24:36; Acts 17:31.

Because of this one, anytime wey Bible want talk about wetin Jehovah go do for future, e go use some words like, prepare, or “the thing wey I don put for mind to do.” (2 Ki. 19:25; Isa. 46:11) For the language wey them translate this word from, e fit mean person wey de use clay mold things. (Jer. 18:4) Just as person wey sabi use clay mold things fit use-am mold fine pot, na so Jehovah fit make things happen, to do wetin e get for mind.—Eph. 1:11.

Jehovah de allow people choose how them want live their life. E no de plan wetin go happen for each person life. And e no de make good people do things wey go make them no get life wey no go end. E de allow all of us to choose how we want live our life. Na im make e de teach us the correct way to live our life.

Make we see two example wey explain this one. The first one na about people for Nineveh. Jehovah talk say e go destroy the city because the people de do plenty bad things. But when the people repent, Jehovah “change im mind, and e no destroy them as e talk say e go do before.” (Jonah 3:​1-10) Jehovah no destroy them again because them decide to change their bad ways after them hear the message from Jehovah.

The second example na about one king wey im name na Cyrus. Jehovah talk say na im go free Israel people from Babylon and talk say make them go build Jehovah temple again. (Isa. 44:26–45:4) King Cyrus do as Jehovah talk. (Ezra 1:​1-4) But Cyrus no worship Jehovah. Jehovah use Cyrus do wetin e talk, but e no force Cyrus to worship-am. E allow Cyrus to choose who e go worship.—Prov. 21:1.

The truth be say this na only small of the things wey Jehovah de put for mind when e want choose wetin e want know about the future. We no fit understand everything wey Jehovah de think and do. (Isa. 55:8, 9) But the things wey we know about Jehovah, de make us trust-am say e de always do the correct thing even when e want talk wetin go happen for future.