Baibel neori kerem wal bulto min wonda, Johova pilkane enem padom. (Ais. 45:21) Ba olom wal nalmal enda na nal kunum enda, yu porpor nadom. Johova pilkane ere enal ne kapisem wal enem. Wal pal enem bar kenem pilkane enamen kaple nanem. Embe pile, kenem wal apal pende omukro kanamen.

Johova kapisem wal porpor enda kaple enem, ba kunum pende ne embe nanem. Johova bunuman ka pase minto punom ye, olom kapisem wal bulto min wonda neori kera kaple enem. Nalenem, olom enda kapisem wal, na bulto min wonda wal pilkane enem. (Rom 11:33) Ba olom olom kumbol-kantawol ka enem.—Aisaia 42:14 omukro kane.

Johova kapisem wal weieri erkelde min wonda. Wal mibulto enal pane yu weieri dom bar, nalmal pakerondo pilkane esmen? Aisaia 46:10 embe dom: “Wal ende pulnombol min wom kunum, wal nalmal pu porninda na yero neori kend, wal ende min nawom kunum, na yero wei neori kelkele erind. Na embe nind, ‘Wonda pane yu nepakinj wal weieri min wonda, ala Nam nawal nawal enal ne kapis wal enal.’”

Mem ende pande Johova wal mibulto wonda neori kera kaple enem panimen nalenem, olom dongal kerma paim. Ende embe mal, kenem movi ende pulnombol kansip pornimen bar, wal porpor min wonom mal yubol kanpol tomon bol, embe ding mal—Johova wal porpor mibulto min wonda kanpol wei tonom ende ki si nengoya ninda mem kanapaim. Nalnem olom enge, erkem sem mal, wal porpor erkelde kunum kun min wonda.—Kis. 9:​5, 6; Mat. 24:36; Aposel 17:31.

Mem embe pande Baibel yu embe mal pende dom Johova wal er “nombronom,” “wal erkelde min wonom,” ala “mem pande wal enem” yu e Johova wal pende bulto enda mal dom. (2 Kin. 19:25; ftn.; Ais. 46:11) Yu talende sinjip-e, “ye ende komna “mal mingsine” ere ere erim mal yu mem ding mal paim. (Jer. 18:4) Ye ende mal norol si ambil dangdang ere mal mingsine kawei wei enem mal, Johova embe ding mal ere kapisem wal porpor erkere min wonda eri. —Efe. 1:11.

Johova alamb pilngo piriari meim mem wal kawei ende ngom. Alamb dingding ne wal kun embe enam panadom. Mambnem ka esim alamb er kere pu ombun ende sinam ne nanem eri, ba olom kankere enjep kapisem mal esim. Ala mambnem dulto karkar enam mal duwom erngonom.

Wal tal ende min wom mal kandpe. 1. Ninipe alamb Johova nim, enem mambnem kes esim pile taun aijep to kes moksal panim. Ba enjep kumbol to akronjup kunum, “enem to erkes enal panim yu ala buro yem kelpile, olom embe narim.” (Jona 3:​1-10) Ninipe alamb Johova tonal panim kunum, enjep piriari monjup mem konganem ka ere kumbol to akronjup kunum, Johova embe narim.

2. Baibel yu propet pam Sairus, Babilon ga tomene kele Juda ga karpos pu monjup, kere se Jerusalem yem wo, tempol gar ala tau yem keram pane paim. (Ais. 44:26–45:4) Baibel yu propet nepakim King Sairus bol weieri min wom. (Esr 1:​1-4) Womba, olom Got wei lotu ernangom, embe pile piriari mom mem Johova lotu erngonda mo nangonda olom olom bol sem. E wal ipal pende Johova min wonda pane pakim mal min wom.—Prov. 21:1.

Weieri, Johova wal porpor enem bar alamb ende pilkane enam kaple wei nanem. (Ais. 55:​8, 9) Johova wal embe enem bar kenem pilkane esmen kunum, kenem pilgi er dongal wei enem, ala kenem pilgi nimen olom mambnem dulto karkar ere—bulto min wonda wal neori kerem eri.