Te ʼu Fehuʼi ʼa Te Kau Lautohi
Kotea ʼae ʼe ui ʼi te Tohi-Tapu ʼo ʼuhiga mo te fealagia ʼae ke fakakikite e Sehova ia te ka haʼu?
ʼE fakaha lelei mai ʼi te Tohi-Tapu e ko Sehova pe ʼae ʼe feala ke ina fakakikite ia te ka haʼu. (Esa. 45:21) Pea ʼe mole ina ui mai te ʼu meʼa fuli ʼo ʼuhiga mo tana faʼahiga fakahoko te faʼahi ʼaia, mo tona temi pea mo te ʼu meʼa ʼae ʼe ina filifili ke ina iloʼi. ʼE mole tou mahino kia meʼa fuli ʼo ʼuhiga mo te fealagia ʼae ke fakakikite e Sehova ia te ka haʼu. Kae tou vakaʼi ʼihi puani.
ʼE feala ke fai e Sehova ia te ʼu meʼa fuli ʼae ʼe loto ki ai, kae ʼi ʼihi temi ʼe ina filifili ʼihi aluʼaga ke mole ina fai. ʼAki tona poto heʼe gata ʼe feala ke ina fakakikite te ʼu meʼa fuli ʼae ʼe loto ki ai. (Loma 11:33) Pea ʼuhi ko te lotololomi ʼa Sehova ʼe feala ki ina filifili ke mole iloʼi te meʼa ʼae ka hoko.
ʼE fai e Sehova ia aluʼaga fuli moʼo fakahoko tona finegalo. Kotea te pikipikiga ʼo te faʼahi ʼaia pea mo tana fealagia ʼae ke ina fakakikite ia te ka haʼu? ʼE fakamahino te faʼahi ʼaia ia Esaia 46:10: “Talu mai te kamataʼaga, e au fakakikite te fakaʼosi, pea mai te ʼu temi ʼafea e au tala te ʼu meʼa ʼae e mole heʼeki hoko. E au ui: ‘ ʼE hoko anai te meʼa ʼae neʼe au fakatotonu, pea e au fakahoko anai ia meʼa fuli ʼae e au fiafia ai.’ ”
Ko te tahi tupuʼaga ʼo te fealagia ʼae ke fakakikite e Sehova ia te ka haʼu heʼe ina maʼu te malohi moʼo fai ia meʼa fuli ke hoko ni alu aga. ʼE mole ʼaoga ia kia Sehova ke ina iloʼi te ʼu meʼa ʼae ka hoko ʼi te ka haʼu, ohage pe moka tou sioʼi peʼe fakaʼosi feafeaʼi he ʼata. Kae ʼe feala ke fakatuʼutuʼu e Sehova te temi totonu ʼae ke hoko ai he alu aga. Pea ʼe ina fai ia meʼa fuli mo ʼona fakahoko ʼi te temi ʼae neʼe ina fakatuʼutuʼu ki ai.—Eke. 9:5, 6; Mat. 24:36; Gaue 17:31.
Koia la ʼae ʼe fakaʼaogaʼi ai ʼi te Tohi-Tapu te ʼu kupu “teuteuʼi”, “faʼufaʼu” pea mo “fakatuʼutuʼu” moʼo fakaha te ʼu faʼahi ʼae ʼe fai e Sehova ʼo ʼuhiga mo te ka haʼu.(2 Hau 19:25; Esa. 46:11) Neʼe fakaliliu te ʼu kupu ʼaia mai te kupu Fakahepeleo “tagata faʼu ipu kele.” (Sel. 18:2-4) ʼE lava faʼufaʼu e Sehova he ʼu alu aga moʼo fakahoko tona finegalo, ohage pe ko he tagata faʼu ipu kele faiva ʼe feala ke ina faʼu he ipu matalelei ʼaki te kele pulu.—Efe. 1:11.
ʼE fakaʼapaʼapa ia Sehova ki te meʼa ʼofa ʼae ko te loto faʼitaliha. ʼE ina fakafealagia kia tatou takitokotahi ke tou filifili te meʼa ʼae ʼe tou loto ki ai. ʼE mole ina uga ia natou ʼae ʼe faitotonu ke natou fai he meʼa ʼe feala ke fakaʼauha ai natou. Pea ʼe ina fakafealagia ke tou filifili totatou faʼahiga maʼuli kae ʼe ina akoʼi mai te faʼahiga maʼuli ʼae ʼe lelei.
Tou vakaʼi he ʼu faʼifaʼitaki e lua. ʼUluaki ko te faʼifaʼitaki ʼo ʼuhiga mo te hahaʼi ʼo Ninive. Neʼe fakatuʼutuʼu e Sehova ke ina fakaʼauha te kolo ʼuhi kote agakovi ʼa te hahaʼi. Kae ʼi tanatou fakahemala neʼe “fetogi [e Sehova] tana tonu. Pea neʼe mole ina fakahoko kia natou te malaʼia ʼae neʼe palalau ki ai.” Neʼe fetogi e Sehova ia tana tonu ʼae ke ina fakaʼauha ia Ninive he neʼe fakaʼaogaʼi e te hahaʼi tonatou loto faʼitaliha moʼo tali ʼaki tanatou fakahemala ki te fakatokaga ʼae neʼe ina fai age.
Kote lua faʼifaʼitaki ʼe kote lea fakapolofeta ʼo ʼuhiga mo te tagata ʼe higoa ko Siliusi, ʼae ka ina fakaʼateainaʼi anai te kau Sutea ʼae neʼe nofo popula pea mo fakatotonu ke toe laga te fale lotu ʼo Sehova. (Esa. 44:26–45:4) Neʼe fakahoko te lea fakapolofeta ʼaia e te Hau ʼo Pelesia ko Siliusi. (Eset. 1:1-4) Kae neʼe mole tauhi ia Siliusi ki te ʼAtua moʼoni. Neʼe fakaʼaogaʼi e Sehova ia Siliusi ke hoko ai te lea fakapolofeta ʼaia kae neʼe ina tuku age te loto faʼitaliha ke ina filifili peʼe ko ai ʼae ka tauhi anai ki ai.—Taag. 21:1.
Koia koʼena la he ʼu puani ʼe fakaʼaogaʼi e Sehova ʼi tana fakakikite ʼae ia te ka haʼu. ʼE moʼoni ʼe mole feala ki he tahi ke mahino ki te ʼu manatu mo te ʼu aga fuli ʼa Sehova. (Esa. 55:8, 9) Kae ko te ʼu alu aga ʼae neʼe fakaha e Sehova ʼe fakamalohi ai tatatou tui ʼi tana fai tuʼumaʼu te meʼa ʼae ʼe faitotonu ʼo kau ai mo tana fakakikite ʼae ia te ka haʼu.