ბიბლიაშე არგამათ ვორწყეთ, ნამდა იეჰოვას უღჷ უნარ, ქიგეგას, მუ მოხვადუ მომავალს (ეს. 45:21). მარა ღორონთიშ სიტყვა კილ-კილშა ვამრაგადუნა, მუჟამ დო მუჭო ირინუანს იეჰოვა თე უნარს. ათეშენ თე საკითხშე გინოჭკირილო ვა მარაგადენა, მარა მუსხირენ მხარეშე შემლებუნა ქიფჩუათ.

იეჰოვა მინშა გინოჭყვიდუნს, ვეგმირინუას მუშ უნარეფ. მუშ ულიებ სიბრძნეშ ჭყოლოფათ, იეჰოვას შეულებ გეგას ირფელ, მუთ მომავალს მოხვადუ (რომ. 11:33). მარა, თეწკუმა ართო, თინა სრულყოფილო გიმირჩქინანს დუდშეკებას, ათეშენ მინშა გინოჭყვიდუნს, ვეგეგას მომავალ (ქეშუდარით ესაიაშ 42:14).

იეჰოვას შეულებ მოვლენეფ თეშ მიდეჸუნას, ნამდა მუშ ნებაქ შისრულას. მუჭო რე დაკავშირებულ თენა მომავალიშ გაგებაშ უნარწკუმა? ესაიაშ 46:10-ის ჭარჷ: „დაჭყაფშე ვაცხადენქ ბოლოს დო ჯვეშ დროშე თის, მუთ დიო ვა მოხვალამე; იფჩიებუქ: შისრულებ ჩქიმ გადაწყვეტილება დო გუაკეთენქ ირფელს, მუთ მოკო“.

ათეშენ, ართ-ართ მიზეზ, მუდგაშ გურშენ იეჰოვას შეულებ თქუას, მუ მოხვადუ მომავალს, თინა რე, ნამდა უღჷ ძალა, ირფელ თეშ მანწყუას, მუჭოთ მუს ოკო. თის ვასაჭირ, ქიგეგას, მუ მუჭო მოხვადუ, თაშ ქოფთქუათინ, კინოცალო წინასწარ ქოუჯინას დო უკულ ქოთქუას, მუ იჸუაფ. თეშ გინაწონს, თინა დიო ქოთქუანს მუდგარენს დო უკულ სიტუაცია თეშ მეჸუნს, ნამდა მუშ სიტყვაქ შისრულას (გამ. 9:5, 6; მათ. 24:36; საქ. 17:31).

ზუსტას ათეშენ, ხშირას, მუჟამსით იეჰოვა იჩიებ მომავალიშ გურშენ, ბიბლია ირინუანს თიცალ სიტყვეფს, მუნერით რე „გინობჭყვიდ“ ვარდა „დუაგეგმჷ“ (2 მეფ. 19:25; ეს. 46:11). ორიგინალ ნინას სიტყვა, სოვრეშეთ თე სიტყვეფ რე თარგმნილ, დაკავშირებულ რე „მეთუნეწკუმა“ (იერ. 18:4). მუჭოთ მეთუნეს შეულებ თიხას მუს ოკონ ფერ ფორმა მეჩას, თეშ იეჰოვას შეულებ მოვლენეფ თეშ მიდეჸუნას, ნამდა მუშ გეგმეფქ შისრულას (ეფეს. 1:11).

იეჰოვა პატის ცენსჷ ნებაშ თავისუფლებას. თინა ვეგნოჭყვიდუნს, მუ მოხვადუ ადამიანიშ ცხოვრებას დო ვართ ჯგირ გურიშ ადამიანეფს ოკეთებაფუანს თიცალ მუდგარენს, მუთ თინეფს განადგურებაშა მიჸონანდ. იეჰოვა არძას არზენს საშვალებას, მუნეფიშით გეგნოჭყვიდან, მუჭო იცხოვრენა, მარა, თეწკუმა ართო, ჸოროფათ ურაგად, მუ იჸუაფ სწორ დო ელუჩანს, თაშ მიქცუან.

გუარჩუათ ჟირ მაგალით. პირველო, დეფიფქრათ ნინეველეფიშ შემთხვევაშე. იეჰოვაქ თქუ, ნამდა განადგურენდ თე ქალაქის, მუშენდა თექიან მახორუეფ უბადოეფ რდესჷ. მარა, თიშ უკულ, მუთ თე ხალხიქ ინარღჷ დაშებულ, იეჰოვაქ „გეგნიფიქრჷ თინეფშა უბედრობაშ გეტახუა“ (იონ. 3:1—10). თიქ დითირუ აზრ, მუშენდა, მუჟამსით ხალხიქ განაჩენ ქიმირჩქილუ, გინოჭყვიდეს, გეგშესწორესკო.

მაჟია მაგალით რე მეფე კიროს, ნამდგაშ გურშენ ნაწინასწარმეტყველებ რდჷ, ნამდა ებრაელეფს გათავისფალენდ ტყვეობაშე დო ზოჯუნდ იეჰოვაშ ტაძარიშ აღდგენას (ეს. 44:26— 45:4). მეფექ ზუსტას თეშ მიქცუ, მუჭოთ ნაწინასწარმეტყველებ რდჷ (ეზრ. 1:1—4). მარა თინა ვამსახურუდ ჭეშმარიტ ღორონთის. მართალ რე, იეჰოვაქ მეფე კიროს გიმირინუ მუშ წინასწარმეტყველებაშ შეიოსრულებერო, მარა ვა ულინ თიშ ნებაშ თავისუფლებაშ წინააღმდეგ დო ვეგნუჭყვიდირ თიშა, მის ემსახურუკო (იგავ. 21:1).

მუშო ოკო რაგად, ხვალე თე ფაქტორეფ ვეგნოჭყვიდუნს, მუჭო ირინუანს იეჰოვა მომავალიშ გაგებაშ უნარს. სინამდვილეს, მითინს ვეშულებ ბოლოშა ქენანჭას იეჰოვაშ აზროვნებას დო საქმეეფს (ეს. 55:8, 9). მარა თინა ხოლო, მუთ იეჰოვაშე მიჩქუნა, დასაბაღ რე თიშ დაჯერებელო ნამდა, მუდგას ორთჷ, ირო სწორ რე; თაშ რე თიმწკუმა ხოლო, მუჟამსით მომავალიშ გურშენ წინასწარმეტყველენს.