Kibibila kintuba ti Yave, kalenda bikula mambu mankuiza kuntuala. (Yesa. 45:21) Mawu masinsundula ko ti nandi wunzabikisanga kadika diambu ditedi buidi voti thangu mbi ayi mambu makua kantomba kuzabikisa kuidi batu. Diawu, mawu mansundula ti tulendi visa ko buboti lulendu Yave kadi lu kutuba mambu mankuiza. Vayi tala mua mambu tufueti visa.

Vasi ko ni kiuma kilenda tula Yave nkaku. Yave kalenda vanga dioso diambu, vayi khumbu zinkaka nandi wunsolanga kubika vanga mambu mankaka. (Loma 11:33) Diawu khumbu zinkaka kansodilanga kubika zaba mambu mankuiza.—dedikisa mawu na Yesa. 42:14.

Yave kalenda vanga mambu kantomba. Nguizani mbi diambu adiodio didi na lulendu Yave kadi lu kuzaba mambu mankuiza kuntuala? Yesaya 46:10 yintuba: ‘Tona va thonono yinsamunanga mambu mala kuiza, ayi tona mu thangu yikhulu mambu moso ka mavangimini’abu ko. Minu yituba: ‘Lukanu luami, luala salama ayi yala vanga mamoso yitidi kuvanga.’’

Yave wuntubanga mambu mankuiza kuntuala, kibila nandi widi lulendu lu kuvanga mambu ava mawu mamonika. Vasintombulu ko Yave kubakula mambu mankuiza monika kuntuala—dedi bo tummuenanga mu zi filme. Vayi Yave wumbakanga makani muingi mambu mamonika mu thangu kasika ayi kuvanga mawu kumonika mu thangu yifuana.—Esodu 9:​5, 6; Matai 24:36; Mava. 17:31.

Mu kibila kiokio, Kibibila kinsadila bikuma “kubama,” “kifuani” ayi “lukanu” muingi kutubila mambu Yave kanvanganga matedi mambu mala monika kuntuala. (2 Minti. 19:25; nota; Yesa. 46:11) Bikuma abiobio, bisekulu muingi kudedikisa na mutu wumvanganga ‘bibasa.’ (Yele. 18:4) Dedi mutu wupisuka mu kuvanga bibasa, kalenda lebisila tuphandu muingi kuvanga kibasa kimboti, Yave mvandi kalenda balula mambu muingi kuvanga luzolo luandi.—Efe. 1:11.

Yave wunkinzinkanga luaku lu kusola. Nandi kasa sikika ko tsukulu yi kadika mutu. Ayi kavanganga ko batu badi mintima mimboti muingi bavanga mambu malenda kuba tuadisa ziphasi. Ayi wumbikanga kadika mutu kasola buidi kankuiza natina luzingu luandi, vayi nandi wuba lubulanga muingi basola mambu mamboti.

Mona bifuani biodi. Kifuani kitheti kintubila matedi basi Ninive. Yave wutuba ti wunkuiza bunga divula diawu mu kibila ki mavanga mawu mambi. Vayi bo basi Ninive banyongina mavanga mawu, Yave ‘wubalula makani kaba ma kuba bunga.’ (Yona 3:​1-10) Yave wubalula makani kaba ma kutulula basi Ninive kibila bawu basadila luaku luawu lu kusola mu kunyongina mavanga mawu bo bayuwa ndubu Yave kabafila.

Kifuani kimmuadi kintubila mbikudulu yitedi Silu muingi kukula basi Yuda baba mu buvika ayi kuba vana nsua muingi batunga Tempelo yi Yave. (Yesa. 44:26–45:4) Silu Ntinu wu Pelesia wudukisa mbikudulu ayoyo. (Esala 1:​1-4) Vayi, Silu kabasa buongiminanga ko Nzambi yikiedika. Vayi Yave wusadila Silu muingi kadukisa mbikudulu ayoyo mu kumvana luaku lu kusola nani kankuiza buongimina.—Zinga. 21:1.

Abiobio, bisi ko to biawu bivisa bimmonisa buidi Yave kansadilanga ndueng’andi. Tulenda tuba ti, vasi ko ni mutu wumvisanga bubote phila Yave kanyindudilanga ayi kamvangilanga mambu. (Yesa. 55:​8, 9) Vayi, mambu Yave kabikula mankindisanga kiminu kitu, ti nandi wumvanganga mambu masonga—kubunda mvandi bo kantuba mambu mala monika kuntuala.