Baibiri ima yugoho ziazia nga Yekova ima rengba ka pe gupai nika manga kumbatayo. (Yes. 45:21) Si apenga gu futufutuapai dunduko du tipa wai watadu gu regbo ko amanga gipai re te watadu zavura bakio apai wai ko asia ka inoho te. Sidu, ani aruganga tirani na bakio gu rengba du Yekova na ni ka pe agu apai nika manga kumbatayo te. Wa vura duhe wo, ani wisigingo gi bete nyanyakipa apai du re.

Yekova ima rengba ka manga ai gupai ngba tiko, ono kura aregbo kinaho ko asia ka zanga mangaha. Wa duhe nga ko nga baenge mburu tatamana, ko ima rengba ka sia ka pe ai gupai rengbe ka manga kumbatayo. (Rom. 11:33) Mbiko wa duhe nga ko na rengberengbe zatise, ko ima rengba a ka zanga ka sia ka ino gupai nika manga.​—Oni ringbisinga ha na Yesaya 42:14.

Yekova nasa gupai ko akpinyemuhe si mangi. Waigu gu rengopai re aringbisatihe na gu rengba du ko na ni ka pe gupai nika manga kumbatayo? Yesaya 46:10 nape gupai nga: ‘Nataki pande pa digidapai ti tonatona rago na pa agu ahe ata manga nga ya bakuru yo, niya, “Gi rugapai arú aru, mi amánga agu apai ngba ti re dũ.”’

Sidu, ndupai sa du Yekova ti ni na rengba ka pe gupai nika manga kumbatayo nga ko na ome tiko ka sa apai si mangi. Ka pepai ngba kura gene, si aidanga ko ngera angera mbata kumbatayo tipa ka bi gupai nika manga te​—si kidu wa ka i ya agu apai du kumbatayo aima manga na gupai gbua Yekova amangaha nga ka fugö bi agu apai re mbata fu si mangi te. Kuba gure, Yekova ima rengba ka diaberã nga pai nika manga kumbatayo were tigi regbo re na ko ki sa gupai re si mangi ho gu regbo re nika da ni.​—Gate 9:5, 6; Mt. 24:36; Amo. 17:31.

Tipa gi ndupai re, Baibiri namangasunge na agu afugo du wa “pa manga,” na “aruga” tipa ka sakapai tipa gupai Yekova amangaha nibipa gu kura bete apai nika manga kumbatayo. (2 Aba. 19:25; Yes. 46:11) Agi afugo re i asaha rogo gu ndikidi fugoyo du na ngbanya dagbaha na gu fugo du rogoyo nga ‘bame pere.’ (Yere. 18:4) Kina wai gu bamepere du na birĩ narengbe ka sa kpaku pere si ki kuru ni bawene pere, Yekova ima rengbe ka sa apai si mangi tipa ka digiso gupai ko akpinyemuhe.​—Ef. 1:11

Yekova nambu gene ambu fu aboro i mangi agu asiapai ngbatiyo. Ko asianga agu apai du tipa aboro nibasasa dunduko te watadu ko asanga agu aboro du na ruru ngbaduyo yo i mangi gupai rengbe ka sa yo i gbia gbarasahe te. Ko nambu gene fu aboro ni basasa i mangi gayo asiapai, na ko nazungodi yo nga i mangi wene asiapai.

Mo bingo agi akpiapai du ue re. Bambata kpiapai nakoda agu aboro naaraka Nineve yo. Yekova agumba gupai kumbatayo nga i nika gbarasa gu gbata re be gaha gbigbita mangaapai. Ono ho agu aboro naaraka yo asa berãyo ni, Yekova “ki sa tiko ti manga gu gbigbitapai, nga gu ko aya ko amanga yo na ni; ka ko amanga nga ha ya.” (Yona 3:1-10) Yekova aˈaria berãko ti gupai ko aya si nika manga mbiko aboro Nineve amangisunge na gayo ranirii ka saberãyo mbiko gu pangbanga nga ga zahe Yekova akedihe fuyo.

Ue kpiapai tipa gu sangbanebi du tipa gu boro si adu nga ni nika zio rago rimo ni angia Kurese, nga gu ko si adu nga ko nika kusa aYudo tii sunge akanga na ki fu zinahe tipa i bungia ga Yekova yekaru. (Yes. 44:26–45:4) Bakindo Kurese nangia ga aParaso ko adigisi gu sangbanebi re. (Eza. 1:1-4) Ono tie, Kurese aairisongo ndikidi Mbori te. Yekova amangisunge na Kurese tipa ko digisi sangbanebi zanga ko du na maapai kurii gu ranirii nga ga Kurese nadu tipa ka sia da ko aida ka iriso ni.​—Snz. 21:1.

Gere gbua nga gu bete apai Yekova awisigoho ho ko afura ni tipa agu apai nika manga kumbatayo. Ka pe kina boro rengo, rakiraki boro ho rengbe ka rugatini nzunzu na ga Yekova agene mangaapai te. (Yes. 55:8, 9) Wa vura duhe wo, gupai Yekova nayuguhe nanyakasa gaani idapase nga ko namanga gupai du ni ruruhe ti aregbo dũ​—kodihe na gu regbo ko afura tipa agu apai nika manga kumbatayo