La Biblia nayadit náni que Jehová labúu raniʼ ni gac ló dzú ni sietra (Is. 45:21). Nigolú, diti rabexatzayni ximod ronybu láani, pu ór ronybu láani nili balaati raniʼbu ganbu. Diti rientzaayno guiráni, por ngú diti labúu guinino que nacni xomodpa ronyno pensary láani. Per noʼ tipnés cós ni nanno.

Diti noʼ chú racaa Jehová, per rioʼ ór ragoʼbu guicbu diti gonybu tipnés cós. Sabiduría xtunybu diti radopyni, por ngú labúu guiniʼbu nitisi cós ni gac ló dzú ni sietra ni guiniiny láabu (Rom. 11:33). Per láabu rony mandarybu láacabu, por ngú labúu ragoʼbu guicbu diti ganbu ni gac (bitzak láani né ni ná Isaías 42:14).

Jehová rony que gac cumplir ni nábu. ¿Né ngú ximod raguiñani ni nanbu ni gac ló dzú ni sietra? Isaías 46:10 ná: «Desde dzú gosaló, naʼ raniya ximod guiloxni, né desde nírcu goniya cós ni yása gac. Naʼ raniya: Ni ma goloʼya guica gac, sarebuʼni, né soni nitisi cós ni raniiny naʼ».

Toib razón por ni Jehová nan ni gac ló dzú ni sietra, nacni portín napbu galnadip par gonybu que gac guirá cós. Diti raquiin guiguichñabu toib lagary par tzeeni naguel, par ganbu xi gac ló dzú ni sietra, suusi ma góc guirá cós ni non tudy né láabu nosi cabiʼbu láani antes ni gacni. Xalagary ngú, labúu guiniʼbu que toib cós gacni toib dzú ni ma golúbu, né órni guidxin dzúcu, gonybu que gacni (Éx. 9:5, 6; Mat. 24:36; Hech. 17:31).

Por ngú Jehová raquiimbu diitz xomod «bunytzaaya», «bisaʼya» né «ma goloʼya guica» par guislooybu guirá ni ma bunybu né tipnés cós ni gac ló dzú ni sietra (2 Rey. 19:25; nota; Is. 46:11). Ló diitz hebreo, versículos reʼ raquiinni toib diitz ni radzak né diitz ni rasaʼ guus (Jer. 18:4). Xomodca toib buñ ni nantzay rasaʼ guus, labúu rasaʼbu toib guus móz né been, Jehová labúu guisaʼ cós par gac cumplir ni nábu (Efes. 1:11).

Jehová radudy lagary que tigaagano coʼno guicno xi láani gonyno. Láabu diti ma bicaʼbu xi láani gony tigaaga buñ nili rony lafuersbu buñtzay gony cós ni labúu guigaity láabu. Xalagary ngú, rasuidybu lóono ximod labúu guibanyno sacró né radudybu lagary que tigaagano cuuno xi néz guinásno.

Guibiʼno chop ejemplos. Primer ejemplo reʼ, ritlani de buñ ni bibany lainy gudx Nínive. Lainy gudxcu nigolú goyoʼ cós mal, né Jehová goniʼ que nanitlóni. Per guirá ninivitas góc arrepentiryibu, por ngú Dios «bitzaʼbu xpensarybu né ma diti bunybu ni goniʼbu ñonybu» (Jon. 3:1-10). Jehová bitzaʼ ni goniʼbu ñac. ¿Xigony? Portín buñ ni bibany gudx Nínive bicadiagyibu ni goniʼ Jehová né góc arrepentiryibu.

Ni rarop ejemplo nacni profecía ni ritlaa de Ciro, toib buñ ni nalaa buñ judíos né ñony mandary ñaʼ templo xtuny Jehová stoib (Is. 44:26–45:4). Rey Ciro de Persia buny cumplir profecía reʼ (Esd. 1:1-4). Per, Ciro diti buny adorar Dios ni nigolú. Jehová biquiin láabu par ñac cumplir profecía ni goniʼbu, per diti buñ lafuersbu Ciro par ñony xchiimbu (Prov. 21:1).

Noʼ stipnés cós ni raguiñani. Per ni toib buñgudxlio labúu guientzaay mod rony pensary Jehová né mod ronybu, nili galnadip ni napbu par guiniʼbu xi láani gac ló dzú ni sietra (Is. 55:8, 9). Ná scú, ni rimbuno de Jehová racnéni lóono par gapno confianz que láabu guirá ór ronybu xinésni, dada órni raniʼbu xi láani gac ló dzú ni sietra.