ABUGIỌM aBaibul phọ eeni amem uḅilhẹ ghan ni obulha ogẹ raraạr dị mogẹ ni epẹ omhạn. Ooḅeghiọn iraạr ariphigh phọ bidị otụ bọ oḍighi ghan iduọn phọ:

Mem mọ ogẹ bọ. Siphẹ Izrạl iḍiodi phọ, ibadị awe u/moọgh ghan ḍinyạ Olhogh phọ ḍiọ abidị. Oginha amem dị aạl Olhogh phọ siphẹ otu iiḅereghị phọ bịn kụ edị bidị onhaghạn aani ghan. (Deut. 31:10-12) Kụ loor iduọn emhoghi ghan bọ mọ bidị omheerạ igbo aḍita awe esi eedoọny amem, iḍighi ghan ni ipaanhaạn olher arurụ dị akpulhạn ongọ ipẹ robạl bọ. (Neh. 8:2, 3, 7) Odọ asimem mọ iphẹn phọ, oḅilhẹ ghan ooḅulha ikpanhạ araraạr phọ moghaạph bọ ilhoghonhaạn ghan ni ḍighaạgh dị awe phọ kootughiạn oḅilhẹ osighẹ oḍighinhom ipẹ aḍinyạ iigbia phọ eghaạph bọ. Oḅilhẹ ghan ooḅulha phọ ophọn phọ ikạr ghan elhoghonhaạn ḍighaạgh bidị orue ootughiạn ilọ esi r’esi iilhogh phọ Enhaạn mangọ bọ bidị.—Lev. 18:4-22; Deut. 5:1.

Eten phọ ogẹ ghan bọ igẹ phọ. Ḍioph abin esi okuron araraạr phọ ogẹ bọ siphẹ aBaibul phọ eḍighi suọr—idiphọ arinyạ phọ aPsalms, Song of Solomon, ḅilhẹ r’aLamentations. Ibadị ikpo onhụ dị ooḅulha edi ni siphẹ asuọr phọ ipẹ phọ. Iphẹn phọ iḍighi ghan idị edughanhaan ghan we phọ okpạph ophạm emhụ adom aḍuọr phọ r’ikpo onhụ aḍuọr phọ. Esi omaạm, lọgh elhegh ikpo onhụ phọ edi bọ Psalm 115:9-11: “Ikpasaghị emooph anyinha esi aZihova, nyinha awe Izrạl—Odị riphẹl ghan inyinha kaḅilhẹ iikpereghi inyinha. Ikpasaghị emooph anyinha esi aZihova, nyinha ariil arikiạ phọ Enhaạn—Odị riphẹl ghan inyinha kaḅilhẹ iikpereghi inyinha. Ikpasaghị emooph anyinha esi aZihova, oomo anyinha abuphẹ rooseeny bọ nyodị—Odị riphẹl ghan inyinha kaḅilhe iikpereghi inyina.” Nạ amiịn ni idị ooḅulha ghan phọ elhoghonhaạn ghan ḍighaạgh we phọ orue ootughiạn imạ igey phọ edi bọ siphẹ aḍuọr phọ bidị romoọr bọ?

Orue oghaạph okparamhị ikpanhạ araraạr phọ. Buphẹ ogẹ bọ Baibul phọ eeni amem uuḅulha ghan ni ikpanhạ ikpo onhụ phọ. Esi omaạm, mem mọ aZihova atọ bọ aḅenhị we Izrạl mọ iḅaạl ku/bạ, odị aḅenhị ni Mozis oghaạph ibadị amem emhụ itọ phọ ipẹ phọ. Enhaạn awạ ghan oghaạph okparamhị mọ aghuḍum atorobọ iyaạr dị repooghu mọ edi ghan siphẹ iḅaạl phọ, mọ iḅaạl phọ emerenyạn ghuḍum. (Lev. 17:11, 14) Onyebel roten, mem dị abutelhedom mọ r’ikumor awe phọ epẹ Jeruselem rogoolạ raraạr dị ewạ mọ onyọ aKristẹn aghel, bidị ulhoghọm ni oghel aạny iḅaạl.—Iiḍ. 15:20, 29.

Ghalhamọ r’iduọn aBaibul phọ aabulha ghan bọ iniin araraạr eeni amem, re/mạ ghan mọ aZihova rawạ ghan mọ yira oghị ghisigh omhoọgh eegharạ ooḅulha ghan ikpo onhụ siphẹ iiḅereghị phọ ayira. Esi omaạm, aZizọs aḅẹm mọ: “Kụ mem Iọ nyina reeḅereghị, ke/pu ghan iyaạr bịn eḅẹm eeḅuIa.” (Mat. 6:7) Kụ odị aghị ghisigh aghaạph ilọ arumhuoghaạph iiḅereghị dị emhoọgh muḅọph rogbi phọ Enhaạn dị yira kotue ghan okol ooḅereghị. (Mat. 6:9-13) Esi iduọn phọ, ghalhamọ yira uu/ḅulha ni iniin phọ ikpo onhụ phọ siphẹ iiḅereghị phọ ayira, yira otue ni okol eniin emhuoghaạph ooḅereghị ibadị amem.—Mat. 7:7-11.

Ariphigh phọ iphẹn phọ kụ iḍighi bọ iyaạr phọ Ekpọ Onhụ phọ Enhaạn eeḅulha ghan bọ iniin araraạr. Ephẹn kụ eniin eten esi ibadị areten phọ Ogbogh Otughemhiạ phọ ayira rutughemhị ghan bọ iyira ilọ kingọ iyira suọ.—Isa. 48:17, 18.