BAYƖBƲLƲ ɛhɛlɛlɛmaa yɩ, sɛ nɩ bɛkɛlɛ odwokɔ be a, ɩyɛ a nɩ bɛkɛlɛ odwokɔ ɔkʋ̃ yɩ la pɛpɛɛpɛ wɔ dɩka fʋlɔ. Bɛmá yehila sianti asã be ti mɔɔ ebiye a Bayɩbʋlʋ ɛhɛlɛlɛmaa yɩ yɛlɩ zɔ nɩ:

Mmɩlɩ mɔ bɛhɛlɛlɩ odwokɔ yɩ. Wɔ ɔwɔkɩ Yizilaya nɩ, nɩ mmenii sʋ̃maa béni Mmɛla mɔɔ bɛhɛlɛ nɩ be. Mbɔmɩ sʋ̃maa nɩ, sɛ nɩ manlɩ yɩ bɔkɔ beyiyia numɔ wɔ ɛdamɛ aliyia yi nu kɛnɩ a, yɛ bɛkɩnga Mmɛla yɩ nu ndwokɔ bekile bɛ a. (Dit. 31:​10-12) Ɩkɔhʋla ɩkɛɣa kɛɛ nɩ nninyeni twɩnhwɩ̃ bɛ adwɩnɩ iluwakɛɛ nɩ bɔ nwʋ zʋnlɩ, na nɩ bɛfa mmɩlɩ tɩndɩnlɩ sʋ̃ bekyina kɛnɩ betiye odwokɔ yɩ. (Ne. 8:​2, 3, 7) Sɛ itwu mmɩlɩ mɔ ɩdɩ zɔ a, nɩ ɩkɛyɛ baaba kɛɛ bekedĩ ndwokɔ aditili be nu na ama mmenii nɩ bɛahakɛ ɛhɛlɛlɛndwokɔ yɩ na bɛava bɛayɛ egyima. Ndwokɔ mɔɔ nɩ bekedĩ numɔ nɩ, nɩ ɩkɔwʋwa bɛ ma bɛkɛhakɛ mmɛla mɔɔ Gyehova va ma bɛ nɩ nu ndwokɔ aditili yi bʋwɔ.—Lɛv. 18:​4-22; Dit. 5:1.

Kezimɔ nɩ bɛkɛlɛ dɩyɛ. Bayɩbʋlʋ yɩ ɔfʋã be wɔ kɛnɩ a bɛhɛlɛlɩ yɩ kɛɛ ndwomi, dɩkɛɛ Ndwomi buuku yi, Sɔlɔmɔnʋ Ndwomi, nɩɩ Alɔbɔ Ndwomi buuku yi. Ɩyɛ a betĩ ndwokɔ nu wɔ ndwomi nu, eyi si mɔɔ ndwomi yi falɩ nwʋmɔ nɩ zʋ owudo na ɩbʋwa bɛzabɛ mɔɔ betiyee nɩ ma botwi ndwokɔ yɩ bokua be ti nu. Kɛ ndianwʋ nɩ, ndwokɔ mɔɔ ɩwɔ Ndwomi 115:​9-11 kã kɛɛ: “O Yizilaya, bɛva bɔ nwʋ bediã Gyehova zʋ; Mɛyɩ yɛ ɩdɩ bɔ bʋwavʋlɔ nɩɩ bɔ kʋlʋkwa a. O Elɔnʋ yɩ awudo, bɛvá bɔ nwʋ bediã Gyehova zʋ; Mɛyɩ yɛ ɩdɩ bɔ bʋwavʋlɔ nɩɩ bɔ kʋlʋkwa a. Bɛzabɛ mɔɔ bo kunlu tuli Gyehova nwʋ nɩ, bɛvá bɔ nwʋ bediã Gyehova zʋ; Mɛyɩ yɛ ɩdɩ bɔ bʋwavʋlɔ nɩɩ bɔ kʋlʋkwa a.” Ndwokɔ eyi mɔɔ bedinli numɔ nɩ, nɩ ɩkɔwʋwa ndwomidʋlɛmaa nɩ ma bɛkɛva ndwomi eyi bekeziye bɛ ahʋnlɩnɩ nu.

Nɩ bɛfa besi ndwokɔ mɔɔ nwʋmɔ hyinyia zʋ owudo. Bayɩbʋlʋ ɛhɛlɛlɛmaa nɩ, ɩyɛ a nɩ betĩ ndwokɔ mɔɔ nwʋmɔ hyinyia nɩ nu. Kɛ ndianwʋ nɩ, mmɩlɩ mɔ Gyehova hyɛlɩ Yizilayamaa yɩ kɛɛ máma bedi mmegyia nɩ, ɩmanlɩ Mosisi dinli sianti mɔɔ íni kɛɛ bedi nɩ nu mbɔmɩ sʋ̃maa. Nɩ Nyamɩnlɩ pɛ kɛɛ isi zʋlɔ owudo kɛɛ nnwʋnlamɩ bela yɩ nnwʋanlɩ yɛ lɛ yi mmegyia, kile kɛɛ, mmegyia gyĩ kɛnɩ ma nnwʋanlɩ. (Lɛv. 17:​11, 14) Aɣinzi yi, asʋ̃mavʋlɔ yɩ nɩɩ mbanimbani mɔɔ bɔwɔ Gyelusalamɩ nɩ bɛkɛlɛɛ nninyeni mɔɔ ɩsɛ kɛɛ Kilisinyianii be twɩ̃ yɩ nwʋ wɔ nwʋmɔ nɩ, bezili zʋlɔ owudo dɔkʋ̃ kɛɛ íni kɛɛ bedi mmegyia.—Egy. 15:​20, 29.

Ɩwɔ numɔ, wɔ Bayɩbʋlʋ yɩ nu nɩ, Gyehova manlɩ bedinli ndwokɔ be nu dɩyɛ, naasʋ̃ mɛyɩ iáhile kɛɛ ɩpɛ kɛɛ amɩyɛ sʋ̃ yɛkã ndwokɔ ɔkʋ̃ yɩ la. Kɛ ndianwʋ nɩ, Gyisɛsɩ hanlɩ kɛɛ: “Na sɛ mʋnlʋmmɔ bɔbɔɔ mpayɩ a, máma bɔtʋwa ndɛnɩ ndɩndɩnlɩ mbʋanlɩ.” (Mt. 6:7) Akʋ̃ ɩmanlɩ yɛnwʋnlɩ nninyeni mɔɔ ɩ nɩɩ Nyamɩnlɩ yɩ apɛdɩ yiyia mɔɔ yɛkɔhʋla yɛkɔwɔ nwʋmɔ mpayɩ. (Mt. 6:​9-13) Ɩwɔ numɔ kɛɛ yɛlɛ́kã odwokɔ ɔkʋ̃ yɩ la wɔ yɛ mpayɩwɔlɛ nu dɩyɛ, naasʋ̃ sa yɛkʋla yɛbɔ dɩyɛ kʋ̃ yɩ la nwʋ mpayɩ mmɩlɩ fʋlɔ.—Mt. 7:​7-11.

Sianti baaba be ti yɛ Gyehova manlɩ bedinli ndwokɔ be nu wɔ Bayɩbʋlʋ yɩ nu a. Ɩkɩnla ɔhʋanɩ azʋlɔtʋ mɔɔ Gyehova, ye Kilehilevʋlɔ Kezile Baaba nɩ duwa zʋlɔ kilehile yɛ ma isi yɛ bʋwɔ nɩ nwʋ.—Ayɩ. 48:​17, 18.