HWEÐOWONUƆ, Bibla ŋwlɛtɔwo trɔ yí nunɔ nyɔfɔkpe ɖekɛ ŋmɛwo gbɛmɛgbɛmɛ. Kpɔ susu amɛtɔn ciwo atɛnŋ adɔ enuŋwlɛtɔ cɛwo atɛnŋ awanɔ enu ahan:

Hwenu woŋwlɛ enu lɔ. Le Izraɛli sasatɔ hwenuɔ, amɛ sugbɔ deɖo ese wema lɔ o. Nɔ jukɔn lɔ vabɔ le avɔnzava lɔ ŋkɔ keŋ gbɔxwe amɛ sugbɔ vaɖonɔ to ese lɔ. (2 Ese. 31:​10-12) Nɔ amɛ ahwa lɔ le te na nɔ gaxoxo sugbɔ yí le eto ɖokɔɔ, ŋɖewo tɛnŋ na yí susu aso le nyɔ lɔwo ji nɔ wo. (Nex. 8:​2, 3, 7) Nɔ wotrɔtrɔ to enyɔfɔkpe vevi ɖekawo jiɔ, atɛnŋ ale fafɛɖe nɔ amɛwo mɔ woaɖo ŋwi enuŋwlɛŋwlɛ lɔwo yí awa do wo ji. Nɔ wotrɔtrɔ do enyɔ ɖekawo jiɔ, atɛnŋ akpedo wo nu, vevitɔ nɔ woaɖo ŋwi akpaxwe ɖekawo nɔ ese ciwo Yehowa na wo.—1 Ese. 18:​4-22; 2 Ese 5:1.

Lé woŋwlɛ enu lɔwo do. Akpaxwe 10 han le sanŋdi ɖeka mɛ nɔ Bibla lɔ nyi ehakpakpawo: Ehajiji Wema, Salomɔ Ha, koɖo Avinhawo can le wo mɛ. Hweɖewonuɔ, ehaxexe nɔnɔ eha lɔwo mɛ yí etrɔ yí tɛnɔgbe do nyɔta lɔ ji keŋ kpenɔdo toɖotɔwo nu yí wolenɔ nyɔ lɔwo do tamɛ. Le kpɔwɛ mɛ, kpɔ nyɔ ciwo wonu do Ehajiji Wema 115:​9-11 mɛ ɖa: “Izraɛlitɔwo, mí doji do Tɔhonɔ nu! Tɔhonɔ nyi wowo ŋsɛn koɖo wowo kpoxɔnu. Arɔn xomu, mí doji do Tɔhonɔ nu! Tɔhonɔ nyi wowo ŋsɛn koɖo wowo kpoxɔnu. Mawu dokplɔtɔwo, mí doji do Tɔhonɔ nu! Tɔhonɔ nyi wowo ŋsɛn koɖo wowo kpoxɔnu.” Èkpɔ lé trɔtrɔdo nyɔ cɛwo ji atɛnŋ akpedo hajitɔwo nu yí nyɔnɔnwi veviwo aɖo susu koɖo eji mɛ nɔ woa?

Enu ci yí taɖo woŋwli. Hweɖewonuɔ, Bibla ŋwlɛtɔwo trɔnɔ to nyɔfɔkpe vevi ɖewo ji. Le kpɔwɛ mɛ, hwenu Yehowa dodoɔ se nɔ Izraɛliviwo mɔ woŋgbegbeɖu ehun ɔ, éna yí Moizi trɔ yí nu susu ci yí taɖo zenɛniɖe. Yehowa ji mɔ yeatɛ gbe do ji nɔ wo mɔ ehun lɔ mɛ yí agbe le, ci gɔnmɛ yí nyi mɔ ehun le dumɛ nɔ agbe. (1 Ese. 17:​11, 14) Le yiyimɛ, hwenu yí apotruwo koɖo hamɛmɛshinshin ciwo yí le Ʒerusalɛmu nu enu ciwo Mawu gbeɔ, wogbetɛ gbe do enu ci yí taɖo woɖo agbe ehun nu.—Edɔ. 15:​20, 29.

Ci wotrɔdo nyɔ ɖekawo ji le Bibla mɛɔ, dedasɛ mɔ Yehowa dro enyi mɔ mìatrɔkɔdo Bibla mɛ nyɔ ɖekawo ji gbɛmɛgbɛmɛ nɔ avanyi kɔnu nɔ mì o. Le kpɔwɛ mɛ, Yesu nu mɔ: “Nɔ mí le kwifan wakɔ ɔ, mí ŋgbe trɔdo enyɔ ŋmɛ ɖekawo ji yí a nukɔ mamimami” o. (Mat. 6:​7, Ezoɖuɖu Yoyu Wema) Eyi evanu enu ciwo nu mìaxo nuxu so le gbedodoɖa mɛ yí asɔ koɖo Mawu dro. (Matie 6:​9-13) Eyi taɖo nɔ mìdetrɔkɔ do nyɔ ɖekɛ ŋmɛwo ji tɛgbɛtɛgbɛ le mìwo gbedoɖawo mɛ can ɔ, mìatɛnŋ axo nuxu so enu ɖewo nu yí gabu mɛɔ mìagbevaxo nuxu so wo nu fɛɛ.—Matie 7:​7-11.

Susu nywi ɖe yí dɔ yí Mawu Nyɔ lɔ nu nyɔ ɖewo yí gbetrɔ yí nu wo. Ényi ɖeka le emɔ sugbɔ ciwo ji mìwo Nukplamɛtɔ Gangantɔ lɔ kplakɔ nu mì le nɔ mìakpɔ nyɔna so mɛ.—Ezai 48:​17, 18.