BIBLIA qellqerinakajja, awisanakajj yaqhep arunak kutin kutiniw qellqapjjerïna. Kunatsa ukham lurapjjerïna uk kimsa toqet uñjañäni:

Qellqaskäna ukapacha. Nayra Israel markanjja, jilaparte jaqenakajj janiw Leyit mä copianïpkänti. Markpachajj tabernaculon templon liytʼasiñapatak tantachasipkäna ukhakiw Leyit istʼapjjerïna (Deut. 31:10-12). Walja horanak saytʼat ukankasasa walja jaqenak taypinkasas atencionamp istʼañajj chʼamakïpachänwa (Neh. 8:2, 3, 7). Ukham tantachäwinakan wali wakiskir arunak walja kuti istʼañajja, ukanak amtañataki ukarjam lurañatakiw yanaptʼpachäna. Janiw ukakïkänti, uka arunak walja kuti istʼañajj walja toqenakat parlaskäna ukanak amuyañatakejj yanaptʼarakïnwa, ukanakat yaqhepajj Diosan leyinakapänwa (Lev. 18:4-22; Deut. 5:1).

Kunjam qellqatasa. Biblian yaqhep cheqanakapajj cancionanakawa, ukanakat yaqhepajj Salmos, El Cantar de los Cantares, Lamentaciones libronakawa. Yaqhep cancionanakan mä qhawqha arunakajj kutin kutiniw arsusirakïna. Ukhamatwa kuna toqets uka cancionajj parlaski ukajj qhanstirïna, letrap yatsuñatakis yanaptʼarakirïnwa. Uk amuyañatakejj Salmo 115:9-11 textot amuytʼañäni, ukan akham siwa: “Israel marka, Jehová Diosar confiyam, jupaw juman yanapirimasa escudomasa. Aarón chachat jutir wawanaka, Jehová Diosar confiyapjjam, jupaw jumanakan yanapirimasa escudomasa. Jehová Diosar ajjsaririnaka, Jehová Diosar confiyapjjam, jupaw jumanakan yanapirimasa escudomasa” sasa. Maynejj uka canción cantasajj uka suma arunak chuymaparuw katoqpachäna.

Kunatsa qellqasïna. Yaqhep qellqerinakajja, kunatï wali importantëki jukʼamp qhanstayañäki ukanakwa kutin kutin qellqapjjerïna. Kunapachatï Jehová Diosajj israelitanakar wila jan manqʼapjjañap maykäna ukhajja, kunatsa uka mandato churäna uk kutin kutiniw Moisés taypejj jupanakar qhanañchäna. Cheqas jakirinakan vidapajj wilankiwa, mä arunjja wilajj jakañ vidamp sasiwa, Diosajj uk sum amuyapjjañapwa munäna (Lev. 17:11, 14). Walja tiempo qhepatjja, Jerusalenankir apostolonakasa ancianonakas Diosar kusisiyañatakejj kunanakat jitheqtañas wakisi uka toqet qellqapjjarakïnwa, kunatsa wilat jitheqtañajj wali wakiskiri uka toqets wasitat parlapjjarakïnwa (Hech. 15:20, 29).

Yaqhep cheqanakan Bibliajj kutin kutinis mä toqet parlkchejja, Jehová Diosajj janiw kutin kutinis yaqhep arunak arsuñas munkaspa ukham sañ munkiti. Jesús pachpaw akham säna: “Oración luräta ukhajja, jan pachpa arunakak kutin kutin arsumti” sasa (Mat. 6:7). Ukhamarus kuna toqenakatsa Diosan voluntadaparjamajj oracionan parlsna ukanak Jesusajj sarakïnwa (Mat. 6:9-13). Jehová Diosar orasktan ukhajj janis yaqhep arunak kutin kutin arskstanjja, kutin kutiniw mä toqet jupamp parlsna (Mat. 7:7-11).

¡Yaqhep arunak kutin kutin Biblian qellqasitapajj wali askiwa! Ukhamatwa Jachʼa Yatichirisajj jiwasan askisatak yatichistu (Is. 48:17, 18).