I BÉ i pam le batila Bibel ba tiimba minlélém mi mam, buk i ngii buk. Di tehe mam maa ma ma bé le ma tinde bo i boñ hala:

I ngéda ba bi tila. I nlômbi Israel, libim li bôt li bééna bé mbén Môsi i mbai yap. Ba bé emble ba ñañ yo i ngéda litén li bé kodba i lap. (Ndiimba Mbén 31:​10-12) Kiki ba bé bitétéé ntandaa ngéda inyu emble lisoñgol, di nla hégda le, i bé le i pam le mam mape ma yoña bo. (Néhémia 8:​2, 3, 7) Jon i bé nseñ le ba tiimba minlélém mi mam inyu hôla litén i bigda mo, ni i ha mo bisélél. Ni ki le i ngéda ba bé tiimba ngim bibuk, hala a bé hôñlaha bo disiina di mam mu mambén Yéhôva a bi ti bo.​—Lôk Lévi 18:​4-22; Ndiimba Mbén 5:1.

Lelaa ba bi tila. Ngim bikaat i Bibel i yé ntilga kiki tjémbi; mukété yap di nla sima bikaat kiki bo Tjémbi, Hiémbi hi Salômô, ni Minlénd mi Yérémia. Ngim tjémbi mu i gwé ndiimba, hala wee bahoma ba ntiimba minlélém mi bibuk inyu hôla baemble i tééda bibuk. Kiki hihéga, béñge le bibuk di nléba i kaat Tjémbi 115:​9-11: “A Israel, bôdôl Yéhôva ñem, inyule a yé nhôla woñ ni ben yoñ. A ndap Arôn, bôdlana Yéhôva ñem, inyule a yé nhôla nan ni ben nan. A bé ba ni nkon Yéhôva woñi, bôdlana Yéhôva ñem, inyule a yé nhôla nan ni ben nan.” Baa ni ntehe bé le i tiimba bibuk hala, i bé le i hôla batôp tjémbi i tééda tik biniigana mahoñol ni miñem nwap?

Inyu yigye mam ma mahee. I bé i pam le batila Bibel ba tiimba bibuk bi nlôôha nseñ. Kiki hihéga, i ngéda Yéhôva a kal bon ba Israel le ba je bañ matjél, a bi bat Môsi le a hôñlaha bo inyuki ba nlama boñ hala, ngandak ngélé. Nyambe a bé gwés yigye le niñ i yé ikété matjél, jon, matjél ma yé niñ. (Lôk Lévi 17:​11, 14) I mbus ngéda, i ngeñ baôma ni mimañ mi Yérusalem ba bi tilna bikristen inyu mam ba bé lama keñgle, ba bi témb ba yigye le mut a je bañ matjél.​—Minson mi baôma 15:​20, 29.

Ndi hala a nkobla bé le Yéhôva a ngwés le di bana lem i tiimba ngim minlôñ kiki bibase bi mboñ. Kiki hihéga, Yésu a kal le: “I ngéda ni nsoohe, ni tiimba bañ pot minlélém mi mam, tiimba ni tiimba.” (Matéô 6:7) I mbus hala, a bi kônde mam ma mahee mape di nla sima i masoohe més. (Matéô 6:​9-13) Jon, to hala kiki di ntiimba bé minlélém mi bibuk, tiimba ni tiimba ikété masoohe més, di nla soohe inyu ngim mam ngandak ngélé.​—Matéô 7:​7-11.

Inyu manjom malam nyen Bañga i Nyambe i ntiimba minlélém mi bibuk ngim mangéda. Njel yada i, Nniiga wés Nunkeñi a ngwélél inyu niiga bés, i nya i yé le hala a bane bés nseñ.​—Yésaya 48:​17, 18.