OLO DO adong hata na sarupa na mulak-ulak disurat di Bibel. Boasa dibahen songon i? Taida ma tolu alasanna.

Nandigan i disurat. Najolo holan otik do halak Israel nappuna salinan ni Patik ni si Musa. Asa boi dibege nasida Patik ni si Musa dijahahon, ikkon lao do nasida marpungu tu tabernakel. (5 Mus. 31:​10-12) Di situasi sisongon i, dang mura di nasida lao mangingot isi ni Patik i. Alana godang do halak disi, ikkon tindang do nasida saleleng marjom-jom, jala olo do dang takkas dibege nasida tikki dijahahon Patik i. (Neh. 8:​2, 3, 7) Alani i dibahen ma mulak-ulak hata na penting sian Patik na dijahahon i. On mangurupi nasida asa mangingot jala mangulahon isi ni Patik i. Tarlumobi gabe boi ma diingot nasida hatorangan sian Patik na dilehon Jahowa tu nasida.—3 Mus. 18:​4-22; 5 Mus. 5:1.

Songon dia i disurat. Godang do ende na disurat di Bibel, misalna bukku Psalmen, Ende ni si Salomo, dohot Andung-Andung. Adong do hata na sarupa na mulak-ulak disuratton di akka ende i. Tujuanna asa takkas diboto aha tema ni ende i jala asa mura diingot. Misalna parrohahon ma isi ni Psalmen 115:​9-11. Didok, “Ale Israel, porsea ma hamu tu Jahowa. Ibana do na mangurupi hamu jala na gabe perisai di hamu. Ale pinoppar ni si Aron, porsea ma hamu tu Jahowa. Ibana do na mangurupi hamu jala na gabe perisai di hamu. Hamu akka halak na makkabiari Jahowa, porsea ma hamu tu Jahowa. Ibana do na mangurupi hamu jala na gabe perisai di hamu.” Ala mulak-ulak didokkon akka hata na penting sian ende i, gabe lam bagas ma tarsuan hata i di roha dohot pikkiran ni akka parende i.

Boasa i disurat. Sipata adong do hata na sarupa na mulak-ulak disurat di Bibel. Contohna tikki diorai Jahowa halak Israel mangallang mudar. Disuru Jahowa do si Musa asa mulak-ulak paboahon alasanna boasa diorai nasida mangallang mudar. Lomo do roha ni Jahowa mangajarhon na sarupa do mudar i tu hangoluan. Alana di mudar i do ngolu ni nasa na mangolu. (3 Mus. 17:​11, 14) Songon i do tong na dipaboa akka apostel dohot akka sintua di Jerusalem. Dipaboa nasida do akka aha na ikkon tapasiding asa las roha ni Jahowa. Sada sian i, i ma padaohon diri sian mudar.—Ul. 15:​20, 29.

Nang pe adong hata na sarupa na mulak-ulak disuratton di Bibel, dang na berarti lomo roha ni Jahowa asa mulak-ulak tadok hata na sarupa tikki martangiang tu Ibana. Sian dia taboto? Misalna, didok Jesus do, “Tikki martangiang hamu, unang ma mulak-ulak dokkon hamu hata na sarupa.” (Mat. 6:7) Dung i dipaboa Jesus do akka aha na boi tatangiakkon. (Mat. 6:​9-13) Jadi nang pe dang mulak-ulak tadok hata na sarupa tikki martangiang, alai boi do mulak-ulak tatangiakkon topik na sarupa.—Mat. 7:​7-11.

I do alasanna boasa mulak-ulak disuratton hata na sarupa di Bibel. On ma sada cara ni Jahowa mangajarhon na denggan tu hita.—Jes. 48:​17, 18.