Ɔ JU wie’n Biblu’n i klɛfuɛ’m be klɛ ndɛ kunngba mun sɛsɛsɛ be flan nun. É wá kán sa nga ti yɛ be yo sɔ’n, be nun nsan be ndɛ.

Blɛ nga i nun yɛ be klɛli ndɛ’n. Izraɛlifuɛ’m be blɛ su’n, sran sunman be leman Mmla fluwa’n. Blɛ sunman’n, kɛ nvlefuɛ’m be wunmuan’n be yia kan Ɲanmiɛn i tannin sua’n o lɔ’n, yɛ be kanngan nun kle be-ɔ. (Mml. 31:​10-12) Kɛ mɔ be jran nglo cɛ kpa’n, mɔ kusu sran’m be sɔnnin dan’n ti’n, kɛ ɔ ko yo naan b’a fa be ɲin b’a sie i ndɛ nga be su kanngan’n su kpa’n, ɔ kwla yo kekle. (Nee. 8:​2, 3, 7) Blɛ sɔ’n nun’n, kɛ be kanngan ndɛ cinnjin’m be nun flan nun’n, i sɔ’n kwla uka nvlefuɛ mun naan b’a fa ndɛ’n b’a sie be klun, naan kusu b’a kwla nanti su. Sɛ be kanngan ndɛ mma wie’m be nun flan nun’n, i sɔ’n kwla uka be naan be wla w’a kpɛn Mmla mɔ Zoova fa mannin be’n, i nun ndɛ trele wie’m be su.—San. 18:​4-22; Mml. 5:1.

Wafa nga be klɛli ndɛ mun’n. Biblu’n nun ndɛ’m be nun kpanngban be ti jue. I wie yɛle Jue Mun fluwa’n, nin Ngɔjue Fɛfɛ kpa’n, ɔ nin Ngwlɛ Yilɛ. Jue wie’m be nun’n, be kan ndɛ wie mun flan nun. Kɛ be yo sɔ’n, jue’n i nun ndɛ cinnjin’n i ɲin fite kpa. Kpɛkun i sɔ’n uka sran mun naan jue’n i nun ndɛ’m b’a ka be klun. I wie yɛle ndɛ ng’ɔ o Jue Mun 115:​9-11 nun’n. Ɔ se kɛ: “Ee Izraɛli, fa ɔ wla gua Zoova su. Ɔ ti ɔ ukafuɛ nin ɔ ɲrɛn. Ee Aarɔn i awlo nunfuɛ mun, amun fa amun wla gua Zoova su. Ɔ ti amun ukafuɛ nin amun ɲrɛn. Amun mɔ an sro Zoova’n, amun fa amun wla gua Zoova su. Ɔ ti amun ukafuɛ nin amun ɲrɛn.” E wun kɛ be kannin ndɛ wie mun flannin nun. I sɔ’n ukali jue tofuɛ mun naan b’a fa ndɛ cinnjin sɔ’m b’a sie be klun.

Be kunndɛ kɛ bé fá sran’m be ɲin síe i ndɛ cinnjin’m be su. Ɔ ju wie’n, Biblu’n i klɛfuɛ’m be klɛ ndɛ cinnjin wie mun flan nun. I wie yɛle kɛ, kɛ Zoova seli Izraɛlifuɛ’m be kɛ nán be di mmoja’n, ɔ seli Moizi kɛ ɔ kan like nga ti yɛ i waan nán be yo sɔ’n, i kpɛ sunman kle be. Ɲanmiɛn kunndɛ kɛ be wun i wlɛ kɛ nguan’n o mmoja’n nun. Yɛle kɛ be nguan’n yɛle be mmoja’n. (San. 17:​11, 14) I nun mɔ akoto mun nin kpɛnngbɛn nga be o Zerizalɛmun’n, bé kán ninnge ng’ɔ fataman kɛ Klisifuɛ’n yo be naan Ɲanmiɛn i klun w’a jɔ i wun’n be ndɛ’n, be kan tinnin su kpa kɛ ɔ fataman kɛ ɔ di mmoja.—Yol. 15:​20, 29.

Kannzɛ Biblu’n kan ndɛ wie mun flan nun’n, sanngɛ ɔ kleman e kɛ Zoova kunndɛ kɛ e fɛ i sɔ yolɛ’n e cici e ti. Zezi seli kɛ: “Kɛ amún srɛ́ Ɲanmiɛn’n, nán amun kan ndɛ kunngba’n be flan nun.” (Mat. 6:7) I sin’n ɔ boli ninnge wie mɔ e kwla fa wlɛ i srɛlɛ nun’n be su. (Mat. 6:​9-13) Ɔ maan kɛ é srɛ́ Ɲanmiɛn’n, e kanman ndɛ kunngba’n e flanman nun. Sanngɛ sɛ e klo kɛ é fá sa kunngba’n é wlɛ́ i srɛlɛ’n nun kpɛ sunman’n, ɔ timan tɛ.—Mat. 7:​7-11.

Sɛ Ɲanmiɛn Ndɛ’n nun’n, be kannin ndɛ wie mun flannin nun’n, nán ngbɛn ti yɛ be yoli sɔ-ɔ. Ajalɛ nga Ɲanmiɛn m’ɔ ti e Like Klefuɛ Dan’n fali be naan y’a ɲan like ng’ɔ kle e’n i su ye’n, be nun kun yɛ ɔ o lɛ-ɔ.—Eza. 48:​17, 18.