UGBẸNSO, emwa ni gbẹn e Baibol ya unu kaẹn emwi eso inugba nọ khin. Ọ gha kẹ, emwi eha ne ima khian guan kaẹn na ẹre ọ ya iran ru vberriọ:

Ẹghẹ na ya gbẹn ọnrẹn. Vbe ẹghẹ nẹdẹ vbe otọ Izrẹl, emwa ni bun sẹ ma gha mwẹ ebe na gbẹnnẹ Uhi ọghe Osanobua yi. Ẹghẹ ne iran na mobọ họn Uhi na ọre vba ghaa tie ẹre ma iran, vbe iran gha si egbe koko vbe ibọkpọ ọghe ugamwẹ. (Diut 31:​10-12) Ẹ i mwẹ emwi nibun ma gha rrọọ, nọ gha sẹtin rhie iran ekhọe ghee ihe ọvbehe vbe iran ghaa danmwehọ, ughaẹdẹ nibun ẹre iran vbe ya mudia vbe uwu ẹbu ọkhọngborrie emwa ni gbẹbu. (Neh 8:​2, 3, 7) Rhunmwuda ọni, egbe ẹghẹ vbenian, te ọ wa khẹke na ya unu kaẹn avbe olika ẹmwẹ na guan kaẹn inugba nọ khin, ne iran mieke na sẹtin ye emwi ne iran ruẹ ẹre rre, iran ghi vbe yae ru emwi. A gha dọlegbe ya unu kaẹn ẹmwẹ eso ni ru ekpataki, ọ gha wa ru iyobọ ne iran ya ye ẹre rre, katekate deghẹ ọ na gha re ẹmwẹ nọ dekaẹn emwi ne Osanobua hoo ne iran ru kevbe Uhi ọghe Jehova.—Lev 18:​4-22; Diut 5:1.

Vbe na ya gha gbẹn emwi hẹ. Ihuan ẹre abọ eso vbe Baibol khin. Usun ebe na gbẹnnẹ avbe ihuan na yi vbe Baibol ọre Psalms, Ihuan Ọghe Sọlomọn, kevbe Eve Orriara. Ọ mwẹ ihuan eso na rra, a ghi ya unu kaẹn ẹmwẹ eso inugba nọ khin, ne emwa ni danmwehọ ẹre mieke na sẹtin rẹn ọnrẹn ye uhunmwu. Vbe igiemwi, yerẹro emwi nọ rre ebe Psalm 115:​9-11, ọ khare wẹẹ: “Wa ne Ivbi Izrẹl wa mu ẹtin yan e Jehova. Irẹn ẹre ọ ye iran obọ, irẹn ẹre ọ vbe rhie iran lẹre. Eo, igiowa ọghe Erọn, wa mu ẹtin yan e Jehova. Irẹn ẹre ọ ye iran obọ, irẹn ẹre ọ vbe rhie iran lẹre. Wa hia ni mu ohan e Jehova, wa mu ẹtin yan e Jehova. Irẹn ẹre ọ ye iran obọ, irẹn ẹre ọ vbe rhie iran lẹre.” Na na sunu ye avbe ẹmwẹ na yan egbe yan egbe, gha wa ru iyobọ ne emwa ni ghaa so ẹre, ne iran ghẹ mieke na mianmian avbe ẹmwata na.

Vba gha khian nianian ẹmwẹ ni ru ekpataki. Emwa ni gbẹn e Baibol mobọ gha ya unu kaẹn emwi ni ru ekpataki yan egbe yan egbe. Vbe igiemwi, vbe ẹghẹ ne Jehova na tama Ivbi Izrẹl ne iran ghẹ rri esagiẹn, ọ na tama e Mozis nọ tama iran inugba nọ khin. Te Osanobua ghaa hoo nọ nianiaẹn ma Ivbi Izrẹl wẹẹ, arrọọ rre esagiẹn, ọni nọ wẹẹ, esagiẹn mudia ye ihe arrọọ. (Lev 17:​11, 14) Ọ ghi sẹ ẹghẹ, vbe avbe ukọ kevbe ediọn ni rre Jerusalẹm ghi guan kaẹn emwi eso nẹi ya ẹko rhiẹnrhiẹn Osanobua nọ khẹke na gban egbe na, iran keghi dọlegbe nianian evbọzẹe nọ ma na khẹke na gha rri esagiẹn.—Iwinna 15:​20, 29.

Agharhemiẹn wẹẹ, e Baibol ya unu kaẹn ẹmwẹ eso inugba nọ khin, ọ ma rhie ma wẹẹ, te Jehova hoo ne ima gha sunu ye ẹmwẹ ni rre uwu e Baibol yan egbe yan egbe vbe ẹghẹ hia. Vbe igiemwi, Jesu khare wẹẹ: “U ghaa na erhunmwu, ghẹ gha ta ẹmwẹ ọkpa yan egbe yan egbe.” (Mat 6:7) Iyeke ọni, Jesu na gi ima rẹn emwi eso nọ khẹke ne ima gha nọ vbe erhunmwu, nọ gua iho ọghe Osanobua ro. (Mat 6:​9-13) Ẹmwata nọ wẹẹ, ọ ma khẹke ne ima gha loo ẹmwẹ ọkpa ọkpa, yan egbe yan egbe vbe ima ghaa na erhunmwu, sokpan ma gha sẹtin na erhunmwu ye emwi ọkpa inugba nọ khin.—Mat 7:​7-11.

Ma bẹghe ẹre nẹ wẹẹ, ọ wa maan, na na ya unu kaẹn emwi eso yan egbe yan egbe vbe uwu ẹmwẹ ọghe Osanobua. Ọ keghi re ọkpa vbe odẹ ne Jehova ne Ọmamwaemwi nọ sẹre ya ma ima emwi, ne agbọn mieke na maan ima.—Aiz 48:​17, 18.