ANIHEIN burí dan águyuguagüdatiña gürigia ha abürüdübarun Bíbülia somu ariñahani íbini dimurei luagu dimurei. Ka san uagu hadügei? Ariha wamá ǘrüwa katei, másiñati ligía lan lébunabei ka lan uagu hadügei:

Dan le tabürüdǘnbei. Lidan meha binadu Ísüraeli úatu meha ni aban kopia lani Lúrudu hama hiibe-agei gürigia. Súnwandan meha haganbuni taliihoun dan meha le hóundarun sun lílana néchani lidan aban tidan sanduariu o tidan ténpulu (2 Lur. 31:​10-12). Samina wamá luagu saragu katei le eberesehabaliña gürigia ladüga saragu oura le haubei rara haganagua bandi gürigia (Neem. 8:​2, 3, 7). Lidan meha dan ligía lau haganbahani ítaga dimurei le súdiniti saragu wéiyaasu adügati katei lira lun ménrengun lan haritaguni luma lun híchuguni lidan habagari. Huuti águyuguagüdüni ligía dántima le layanuhaña lan luagu aban katei le gíbeti lácharagun, kéiburi, lúrudu luma gumadi le líchugubei Bungiu houn (Fad. 18:​4-22; 2 Lur. 5:1).

Ida liña tabürüdǘn. Kei burí diisi lídangiñe kada san ariñahani le tídanbei Bíbülia uremu, anihein lidan Sálumu, tidan líburu to gíriboun Uremu luma tidan líburu to gíriboun Ayahuni. Lidan burí fiu lídangiñe uremu ligía, anihein dimurei le lunbei burí láguyuguagüdüniwa. Dimurei burí le águyuguagüdüwabei lidan uremu ayanuhati burí luagu liri uremu lun gayara lan ménrengun lan houn gürigia lerederun liletüran hachügüwagun. Lun warihini ítara liña lan, teni wamá lun le lariñagubei Sálumu 115:​9-11: “Ísüraelina, afiñe humá luagu Aburemei! (Íderagua lumutiwa, góunigi lawa). Fádirigu, afiñe humá luagu Aburemei! (Íderagua lumutiwa, góunigi lawa). Huguya le inebehabubei lun Aburemei, afiñe humá luagu! (Íderagua lumutiwa, góunigilawa)”. Dan burí le leremuhani gürigia uremu burí le, chóuruti redei lan lila lubuidun burí uremu le lichügüwagun.

Ka uagu labürüdǘwa. Añahein abürühatiña Bíbülia águyuguagüdatiña ítaga dimurei ladüga subudi hamani lanarime lisudinin ani busentiña lun furangu lan. Kéiburi, dan le lariñagubei Heowá houn ísüraelina lun meigin hamá hitaü, adügati Heowá lun láguyuguagüdüni Moisesi gumadi le saragu wéiyaasu. Busenti meha Bungiu lun furangu lan houn luagu lídanñein lan hitaü ibagari (Fad. 17:​11, 14). Dan lárigiñe, dan le hóundaragubei apostolugu hama wéiyaaña lidan afiñeni ha Herusalénbaña ayanuhatiña luagu katei le moun lunbei lun wayusuruni anhein busén wabéi wagundaaragüdüni Bungiu, aba háguyuguagüdüni moun lumuti lan layusurun hitaü (Adü. 15:​20, 29).

Íbini anihein lan dan águyuguagüda tan Bíbülia somu katei o dimurei, úati mini lan le busén lan Heowá lun wáguyuguagüdün ítaga katei, kei aban échuni kei hadügüni gürigia ha meseriwidunbaña lun. Ariñagati Hesusu: “Lidan le hafurieidun, máguyuguagüda humá dimurei le málati” (Mat. 6:7). Lanwoun lira, íridati saragu saminaü le gayaraabei wagúaruni lidan wafurieidun ani le úarati luma lugundan Bungiu (Mat. 6:​9-13). Íbini dan le lan wafurieidun lun Heowá máguyuguagüdüntiwa ligiaméme dimurei, gayaraati wafurieidun luagu ligiaméme katei saragu wéiyaasu kei le aubei wabusenra (Mat. 7:​7-11).

Ma lubuidun águyuguagüda tan Bíbülia ítaga ariñahani o dimurei! Ligía aban lídangiñe igaburi le layusurubei Wamaisturun lun larufudahan woun lun wabuidun guánarügü (Isa. 48:​17, 18).