USAHAY balikbalikon sa mga magsusulat sa Bibliya ang mao ra nga mga pulong. Atong konsiderahon ang tulo ka butang nga posibleng hinungdan kon nganong ila ning gihimo:

Ang panahon dihang gisulat kini. Sa karaang Israel, kasagaran sa mga tawo walay personal nga kopya sa Balaod. Pero ang nasod magtigom sa tabernakulo ug sa templo, ug kadaghanan nila nakadungog sa Balaod dihang basahon kini didto. (Deut. 31:​10-12) Daghan kaayog tawo nianang panahona, ug posible nga naay mga kabaldahan samtang naminaw ug nagtindog sila sulod sa daghang oras. (Neh. 8:​2, 3, 7) Busa, ang pagbalikbalik sa importanteng mga pulong seguradong nakatabang nila nga mas mahinumdoman ug mapadapat ang mga teksto. Ilabinang nakatabang to nila nga mahinumdoman ang importanteng mga detalye sama sa mga balaod ug lagda sa Diyos.—Lev. 18:​4-22; Deut. 5:1.

Ang klase sa basahon nga gisulat. Mga 10 porsiyento sa Bibliya maoy mga awit—apil ana ang basahon sa Salmo, Awit ni Solomon, ug Lamentaciones. Ang ubang awit naay refrain, nga nagpasiugda sa mensahe sa awit ug nakatabang sa mga mamiminaw nga ma-memorize ang mga pulong. Pananglitan, matikdi ang mga pulong sa Salmo 115:​9-11: “Oh Israel, salig kang Jehova—Siya ang inyong tabang ug ang inyong taming. Oh panimalay ni Aaron, salig kang Jehova—Siya ang inyong tabang ug ang inyong taming. Kamo nga nahadlok kang Jehova, salig kang Jehova—Siya ang inyong tabang ug ang inyong taming.” Ang pagbalikbalik anang mga pulonga seguradong nakatabang sa mga mag-aawit nga masilsil sa ilang hunahuna ug kasingkasing ang maong nindot nga mensahe.

Ang pagpasiugda sa importanteng mga punto. Usahay, balikon sa mga magsusulat sa Bibliya ang importanteng mga pulong. Pananglitan, dihang gisugo ni Jehova ang mga Israelinhon nga dili mokaon ug dugo, gibalikbalik ni Moises pagsulti ang rason niana. Gustong ipasiugda sa Diyos nga ang kinabuhi sa unod naa sa dugo, sa ato pa, ang dugo nagrepresentar sa kinabuhi. (Lev. 17:​11, 14) Sa ulahi, dihang gihisgotan sa mga apostoles ug sa mga ansiyano sa Jerusalem ang mga paagi nga mapalipay ang Diyos, ilang gipasiugda pag-usab ang kaimportante sa paglikay sa dugo.—Buh. 15:​20, 29.

Bisag naay mga pulong sa Bibliya nga gibalikbalik, dili gusto ni Jehova nga pirme na lang nato kining balikbalikon nga mora bag mahimo na ning rituwal. Pananglitan, si Jesus miingon: “Dihang mag-ampo, ayawg balikbalika ang samang mga pulong.” (Mat. 6:7) Dayon gihisgotan niya ang mga topiko nga puwede natong iampo nga uyon sa kabubut-on sa Diyos. (Mat. 6:​9-13) Busa bisag dili nato angayng balikbalikon ang samang mga pulong diha sa atong pag-ampo, puwede tang balikbalik nga mag-ampo sa samang mga topiko.—Mat. 7:​7-11.

Naa gyoy katuyoan nga gibalikbalik sa Bibliya ang pipila ka mga pulong. Usa ni sa mga paagi nga ginatudloan ta sa atong Dakong Instruktor aron makabaton tag kaayohan.—Isa. 48:​17, 18.