FÁN ekkóch chón makkeei Paipel ra kan ekkenniwili le makkeei ekkóch mwuten kapas. Sipwe pwóróus wóón úlúngát popun pwata neman ekkewe chón makkeei Paipel ra féri ena:

Ewe atun a mak. Lón fansoun chón Israel lóóm, lape ngeni aramas ese wor néúr pwisin kapiin ewe Allúk. Lape ngeni ra kan rong álleaan ewe Allúk atun unusen chón Israel ra kochufengen ren ewe imwenfel. (Tut. 31:​10-12) Ese mwáál, epwe wor met epwe aosukosuka ekkewe aramas atun ra aúseling me útá fite fite awa lein chómmóng aramas. (Ne. 8:​2, 3, 7) Ina popun, an enniwil álleaan ekkewe mwuten kapas mi aúchea, a tongeni ámecheresi ar repwe chemeni ekkewe wokisin me apwénúretá. Ekkenniwilin ekkóch kapas, epwe ákkáeúin álisiir le chemeni tichikin án Jiowa kewe allúk a awora ngeniir.—Lif. 18:​4-22; Tut. 5:1.

Napanapen an mak. A kapachelong lón ewe Paipel chómmóng kél, áwewe chék ren ewe puken Kölfel, Än Salomon Köl, me Kölün Kechü. Fán ekkóch, a wor ekkewe kapas mi kan enniwil lón ekkewe kél. Ena a menlapei itelapen ewe kél me álisi ekkewe chón aúseling ar repwe chechchemeni kapasan kewe. Áwewe chék, ekieki ekkeei kapas mi nóm lón Kölfel 115:​9-11: “Ämi chon Israel, oupwe apilükülükü ewe Samol mi Lapalap. I epwe alisikemi o epeti senikemi feiengau. Ämi mwirimwirin Aaron, oupwe apilükülükü ewe Samol mi Lapalap. I epwe alisikemi o epeti senikemi feiengau. Ämi mi niuokusiti ewe Samol mi Lapalap, oupwe apilükülükü i. I epwe alisikemi o epeti senikemi feiengau.” Ekkenniwilin ekkena mwuten kapas, a tongeni álisi ekkewe chón kél ar repwe chemeni ekkena kapas mi aúchea lón ekiekiir.

Lamoten an epwe menlapei ekkewe pwóróus mi aúchea. Fán ekkóch, ekkewe chón makkeei Paipel ra enniwili ekkewe mwuten kapas mi aúchea. Áwewe chék, atun Jiowa a allúkú ngeni ekkewe chón Israel ar resap ún chcha, a ereni Moses an epwe ereniir ewe popun fán chómmóng. Kot a mochen an epwe menlapei pwe ewe manaw a nóm lón ewe chcha, me ewe chcha a wewe ngeni manaw. (Lif. 17:​11, 14) Ló, ló, ló, atun ekkewe aposel me ekkewe mwán mi ásimaw lón Jerusalem ra makkeei met ekkewe Chón Kraist repwe féri pwe resap eletipengawa Kot, ra menlapei sefálli lamoten ar repwe ttii seniir chcha.—Féf. 15:​20, 29.

Jiowa ese menei senikich ach sipwe éérenaaló le ekkenniwili ekkóch mwuten kapas lón Paipel, inaamwo iká ekkóch wokisin ra kan ekkenniwiliir. Áwewe chék, Jises a erá: “Lupwen kopwe iótek kosap epini me epini ekkewe kapas.” (Mat. 6:7) Mwirin ena, a kapas ussun ekkewe mettóch sia tongeni iótekiir. (Mat. 6:​9-13) Iwe, inaamwo iká sise enniwili ekkewe kapas lón ach iótek, nge sia tongeni enniwili ekkewe mettóch mi lamot ngenikich sia iótek ussun.—Mat. 7:​7-11.

A wor popun mi múrinné pwata án Kot we Kapas a kan ekkenniwili ekkóch kapas me mwuten kapas. Ina eú me lein ekkewe chómmóng mettóch néúch we Soukáit mi Lap a áeá le áiti ngenikich ifa ussun sipwe kúna feiéch.—Ais. 48:​17, 18.