BAIBAL ṭialtu hna nih aa khatmi biafang kha an nolh ṭhan lengmang caan a um. Baibal ṭialtu hna nih cutin an tuahnak a ruang pathum kha zohhmanh hna u sih.

An ṭial caan. Hlanlio Israel mi hna chan ah mi tam deuh nih nawlbia tlenmi cauk kha an i cawk kho lo. Tam deuh nih cun puan biakinn ah an miphun ning in an i pumh lio i an rel caan lawng an theih khawh. (Deut. 31:10-12) Mibu pi he suimilam tampi chung dir bu in nawlbia an relmi an ngaih tikah an lung a vai vuan kho men. (Neh. 8:2, 3, 7) Cucaah a biapimi biafang nolh ṭhan lengmangnak nih Baibal caang hna kha i cinken awk le an nunnak ah hman awkah a fawiter deuh. Cutin an nolh ṭhan lengmangmi nih a hleiin Jehovah nih a pekmi hna nawlbia i a dikthliar kong kha i cinken awkah a bawmh hna lai.—Lev. 18:4-22; Deut. 5:1.

An ṭial ningcang. Salm, Solomon Hla le Ṭahnak Hla i tel in Baibal konglam zatuak ah pahra hrawng cu hla an si. Hla hna ah nolh ṭhan lengmangmi biafang a um caan a um. Mah nolh ṭhanmi biafang nih a biapimi a kong kha a langhter i mah nih a ngaitu hna kha i baihat awkah a bawmh hna. Tahchunhnak ah, Salm 115:9-11 chimmi kha ruathmanh: “Maw Israel mi hna, Bawipa cu i bochan u,—amah nih an bawmh hna lai i an huhphenh hna lai. Pathian tlangbawi hna, Bawipa cu i bochan u,—amah nih an bawmh hna i an huhphenh hna. Bawipa a ṭihmi vialte hna, amah cu i bochan u,—amah nih an bawmh hna i an huhphenh hna.” Mah nolh ṭhan lengmangmi biafang nih hla satu hna kha an lungthin chung ah mah a sunglawi tukmi ruahnak kha ngeih peng awkah a bawmh hna lai.

A biapimi kong langhter awk. Baibal ṭialtu hna nih a biapimi biafang hna kha an nolh ṭhan lengmang caan a um. Tahchunhnak ah, Jehovah nih Israel mi pawl kha thi ei lo ding in lamhruainak a rak pek hna lioah a ruang kha Moses hmang in voi tampi a chimh hna. Nunnak cu thi chung ah a um i thi cu nunnak a aiawhtu a si ti kha hngalhter a duh hna. (Lev. 17:11, 14) A hnu ah Pathian lung a lawmhter lomi thil pawl hrial khawh ning kong he aa tlaiin Jerusalem khua i lamkaltu pawl le Khrihfa upa pawl sin i cakuat a ṭial lioah thi hrial a herhnak kha a hleiin a langhter ṭhan.—Lam. 15:20, 29.

Baibal nih biafang pakhat kha atu le atu a nolh ṭhan lengmang ko nain mah cu Jehovah nih Baibal biafang pakhat kha atu le atu nolh ṭhan lengmang hna seh ti a kan duh tinak a si lo.Tahchunhnak ah, Jesuh nih hitin a ti: “Thla nan cam tikah miphun dang hna bantuk in a konglam pakhat lawng kha atu le atu nolh ṭhan hlah u.” (Matt. 6:7) Cun Pathian duhnak he aa tlakmi a si nakhnga thla cam awk a sinak kong zong a fianter. (Matt. 6:9-13) Biafang pakhat lawng kha kan nolh peng lo nain a kong pakhat caah atu le atu thla kan cam khawh.—Matt. 7:7-11.

Baibal ah biafang pakhat asiloah biafang rual pakhat atu le atu a nolh ṭhannak a ruang ṭha a um. A ruang pakhat cu A Liannganmi Cawnpiaktu nih kanmah ṭhathnemhnak hmuh awkah a kan cawnpiak ning lam pakhat a si caah a si.—Isa. 48:17, 18.