EDAɄDE Daizeze Bedʼea bʉbarirabara iyabaʉ bedʼeata jarada ʉ̃rʉ jarapanasi. Akʉdaya kʼãrẽa mawũã opanasita.

Sõbeda bʉsida. Maʉ̃ ewaridera, israelitara jõmaʉ̃ba erba ẽ basi ley kopiara. Maʉ̃ba ãyi tabernakuloidu jʉ̃ẽbʉrʉdebʉrʉ ũrĩpanasi maʉ̃ leyba jarabʉra (Deut. 31:​10-12). Ãyitara maʉ̃ra zarebasibaibara, maʉ̃ ũrĩta edaʉnʉmaibarabasi baera akʉza ẽbẽrarãta biobasi baera. Adewara ũmadaʉ biobayeda mawũãbasi baera (Neh. 8:​2, 3, 7). Edaʉde iyabaʉ bedʼeata jarada ʉ̃rʉ jarapanasi mawũã ẽbẽrarãba kʼawuadamarẽã saʉ̃ta yi bedʼea audre yibiara. Naʉ̃ bedʼeara jarada ʉ̃rʉ jaraiba kʼarebaseabasi ãya kĩrãbedamarẽã Daizezeba kʼãrẽta zokʼabʉta (Lev. 18:​4-22; Deut. 5:1).

Sãwũã bʉsida. Daizeze Bedʼeade mejãcha ũdupanʉ trãbirata. Maʉ̃rane edabʉ Salmos librota, Salomónba trãbi bʉdata akʉza Lamentaciones librota. Edaʉde naʉ̃ra trãbirabara iyabaʉ bedʼeata jarada ʉ̃rʉ jarabasi mawũã kʼawuaita kʼãrẽ ʉ̃rʉ bedʼeabʉta. Akʉza kʼarebabasi yi naʉ̃ra trãbira ũrĩbʉba iyabaʉ bedʼeata kʼawuamarẽã. Bari jaraita Salmo 115:​9-11 bayeda iyabaʉ bedʼeata jarada ʉ̃rʉ jarabʉ: «Israel ĩjãra Jeowa ʉ̃rʉ. (Iyira mara kʼareba akʉza mara joudrʉbari). Aarón dedabemara, ĩjãidua Jeowa ʉ̃rʉ. (Iyira mara kʼareba akʉza mara joudrʉbari). Mara Jeowa wawiapanʉra, ĩjãidua Jeowa ʉ̃rʉ. (Iyira mara kʼareba akʉza mara joudrʉbari)». Naʉ̃ bedʼea jarada ʉ̃rʉ jaraiba kʼarebabasi yi trãpanʉraba kĩrãbedamarẽã maʉ̃ bedʼeata.

Kʼãrẽa bʉsida. Daizeze Bedʼea bʉbarirabara edaʉde bedʼea yi audre yibiata jarada ʉ̃rʉ jarapanasi. Bari jaraita, Jeowaba israelitara wa ko ẽ marẽã jarasidera Moisésʼa jarasi jarada ʉ̃rʉ jaramarẽã kʼãrẽa mawũã oibarata. Jeowabara maʉ̃ta jarada ʉ̃rʉ jaramarẽã basi ũdubita dayi wara dayi bebʉta, dayi zokʼai bʼaira wata nesidata (Lev. 17:​11, 14). Tẽã apostoleraba akʉza zõrãrã Jerusalénʼnebemaraba jara ũrĩbisidade kʼãrẽta oibarabasita bedʼea zroma ara oita, jẽda jarasida kʼãrẽa wa ko ẽ baibarata akʉza kẽgʉde bʉe ẽ baibarata (Hech. 15:​20, 29).

Edaʉde Daizeze Bedʼeade iyabaʉ bedʼeata jarada ʉ̃rʉ jarabʉmina, naʉ̃ba jarakĩrãbʉ ẽ dayirãbara iyabaʉta abarika jaraibarata. Jesuba jarasi: «Yiwidʼibʉrʉde iyabaʉ bedʼeata jararãra» (Mat. 6:7). Mamina jara ũrĩbisi kʼãrẽ ʉ̃rʉ yiwidʼiseabʉta dayirã Jeowaʉ̃me bedʼeabʉrʉde (Mat. 6:​9-13). Mawũẽra dayirãba iyabaʉ bedʼeata abarika jarada ʉ̃rʉ jara ẽ mina, iyabaʉ ʉ̃rʉ bedʼeaseabʉ (Mat. 7:​7-11).

Yibia Daizeze Bedʼeaba iyabaʉ bedʼeata jarada ʉ̃rʉ jaraira. Jeowaba mawũã jaradiabʉ dayirã, mawũã bia wãmarẽã (Is. 48:​17, 18).