SAŊA kaŋa noba naŋ sɛge a Baabole na maŋ sɛgɛɛ yelbie mine neŋ a zuŋ eŋ a Baabole ziiri mineŋ. Te nyɛ yɛlɛ ata mine zuŋ aminekaŋaŋ baŋ da maŋ e lɛ:

Saŋa na baŋ da sɛge a yɛlɛ na. Takoreŋ saŋa Izerayɛl biiri saŋa na, noba yaga zaa da ba taa gama ba naŋ sɛge a Bege eŋ a poɔŋ. Gbɛɛ yaga ba da maŋ woŋ la a Bege yɛlɛ ba na naŋ kanna ka ba naŋ wa gaa a ŋmenpuoredie. (Dut. 31:10-12) Aminekaŋaŋ yɛlɛ mine da na baŋ tage la ba teɛroŋ yi yɛlɛ na ba naŋ kanna na saŋa na baŋ da maŋ are aware yaga a kyɛllɛ wono a yɛlɛ na. (Niih. 8:2, 3, 7) A lɛ saŋa na, ka ba naŋ da maŋ leɛ kanne yelnimizeere naŋ be a sɛgre poɔŋ na, a na eɛ mɔlɔ ko a noba ka ba leɛteɛre a sɛgre poɔ yɛlɛ a de tonɔ neŋ toma ba zemmo poɔŋ. Ka ba naŋ da maŋ leɛ kanne a yelbie ŋa ko a noba, a na soŋ baŋ ka ba maŋ leɛteɛre bege na zaa Jehoova naŋ de ko ba na.​—Liiv. 18:4-22; Dut. 5:1.

Lɛ baŋ da maŋ sɛge a yɛlɛ. A Baabole ziiri mine eɛ yiele ba naŋ sɛge, a mine la Yieme, Soolomong Yienii, ane Jeremaiya Laadimii. Saŋa kaŋa yiele maŋ baŋ taa la yelbie naŋ yitaa, a maŋ baŋ toɔ̃ vɛŋeŋ ka a yieloŋ yelzu pɛle soŋ zaa a e mɔlɔ meŋ ka noba teɛre a yɛlɛ wieoŋ. Aŋa mannoo poɔŋ, hooŋ nyɛ yɛlɛ naŋ be Yieme 115:9-11: “Oo Izerayɛl yɛ dɛle Jehoova—Ona la ba sonnɔ ane ba kuri-bonlɛgraa. Oo Eeroŋ die, yɛ dɛle Jehoova—Ona la ba sonnɔ ane ba kuri-bonlɛgraa. Yɛnee noba aŋ zoro Jehoova, yɛ dɛle Jehoova. Ona la ba sonnɔ ane ba kuri-bonlɛgraa.” Baŋ sɛge a lɛ yelbie ŋa neŋ a zu aŋ tutu taa na na baŋ soŋ la a yieloŋ yieleba ka a yelbi-sonne ŋa be ba teɛroŋ ane ba sukyieŋ.

A maŋ vɛŋeŋ ka yelnimizeere mine maaleŋ pɛle soŋ zaa. Baabole sɛgsɛgreba saŋa kaŋa maŋ lɛ sɛgɛɛ yelbie mine naŋ e nimizeɛ baŋ da sɛge biŋ. Aŋa mannoo poɔŋ, saŋa na Jehoova naŋ da ko a Izerayɛl biiri bege ka ba ta di zĩĩ na, o da vɛŋɛɛŋ ka Moosis lɛ maaleŋ yel a yɛlɛ gbɛɛ yaga a ko a noba. Naaŋmen da boɔrɔŋ ka a pɛle ka a nyɔvore be la a zĩĩ poɔŋ, lɛ wuleeŋ ka zĩĩ are ko la nyɔvore. (Liiv. 17:11, 14) A puoriŋ meŋ, saŋa na a bitontonee ane a nembɛrɛ naŋ be Gyɛruzɛlɛm naŋ da wulo yɛlɛ naŋ e nimizeɛ aŋ seŋ ka a Kristabiiri tage ba menne yi a eŋɛŋ a ta sãã Naaŋmen poɔ na, ba da lɛ yeleeŋ ka ba kyiire zĩĩ.​—Tom. 15:20, 29.

Aneazaa ka yɛlɛ mine be la a Baabole poɔŋ baŋ sɛgaa gbɛɛ yaga, kyɛ lɛ ba wuli ka Jehoova boɔrɔŋ ka te maŋ yele Baabole poɔ yelbie mine gbɛɛ yaga. Aŋa mannoo poɔŋ, Yezu yeleeŋ ka: “Ka yɛneeŋ wa puoro, yɛ ta maŋ bonnɔ yele yelyenaa kaŋa weɛ lɛ.” (Mat. 6:7) A kyɛ pãã wuli yɛlɛ na teŋ na baŋ puore sɔre te puoro poɔŋ ka a neŋ Naaŋmen boɔbo kyaare taa. (Mat. 6:9-13) Azuŋ aneazaa ka te ba maŋ yele yelbie mine yoŋ bebiri zaa te puoro poɔŋ, kyɛ te na baŋ toɔ̃ puore sɔrɛɛ yelkaŋa gbɛɛ yaga.​—Mat. 7:7-11.

Azuŋ yelsoŋ kaŋa zuŋ la ka Naaŋmen Yelbiri na maŋ yel yɛlɛ mine gbɛɛ yaga. A eɛ sori na kaŋa te Wulwuli Kpoŋ naŋ maŋ wulo te ka te nyɛ tɔnɔ ko te menne.​—Aiz. 48:17, 18.