PONDA iwo̱, batiledi ba Bibe̱l ba timbise̱le̱ milemlem ma milo̱ṅ ma byala ná te̱ite̱i. Jombweye njo̱m ilalo i tute̱le̱ babo̱ o bola nika yen ebe:

Ponda Bibe̱l e tilabe̱no̱. O Israel ńa kwaṅ, jita la bato ba si ta ba be̱ne̱ kalat’a mbend’a ńa babo̱me̱ne̱. Ba ta nde ba senga bolanga bao ponda tumba le̱se̱ di tano̱ di ko̱to̱me̱ oboso̱ ba muno̱ko. (Ndim. 31:10-12) Pondapo̱ mambo mō̱ ma wusa bola ná ba si bupe̱ bolanga o mbad’a bwam niponda ba tano̱ ba te̱me̱ pond’a bwaba oteten a dimuti dinde̱ne̱. (Neh. 8:2, 3, 7) O be bete̱medi, timbise̱le̱ la milo̱ṅ ma byala ma mweńa di wusa jongwane̱ babo̱ ná ba si dimbea betiledi, ba we̱le̱ pe̱ mo̱ o ebolo. Timbise̱le̱ la byala bō̱ di wusa pe̱ jongwane̱ babo̱ o jo̱nge̱le̱ mato̱ti masadi ka myeka na bete̱sedi ba Loba.—Lev. 18:4-22; Ndim. 5:1.

Mbadi Bibe̱l e tilabe̱no̱. Kalati iwo̱ ya Bibe̱l i tilabe̱ nde ka myenge, k’eyembilan kalat’a Myenge, Mwenge ma bonamyenge, na Madoi ma mbembe. Ponda iwo̱ myenge mi ta mi be̱ne̱ byala be matimbe̱ ngedi jita, o bwam ba yikiye̱ tem’a mwenge na jongwane̱ pe̱ basengedi o kombe̱ be byala. K’eyembilan, maka byala be maso̱be̱ o Myenge 115:9-11: “A Israel, lakisane̱ Yehova! Mo̱ nde e jongwane̱ labu na ngub’abu. A ndabo a Aron, lakisane̱ Yehova! Mo̱ nde e jongwane̱ labu na ngub’abu. Bińo̱ babwe̱ Yehova bo̱ngo̱, lakisane̱ Yehova! Mo̱ nde e jongwane̱ labu na ngub’abu.” Mo̱ we o je̱ne̱ ne̱ni timbise̱le̱ la be byala di wusano̱ jongwane̱ moto nu malo̱nge̱ mu mwenge o kombe̱ yi mbal’a mweńa o mo̱nge̱le̱ na o mulema mao e?

Kika la mato̱ti ma mweńa. Ponda iwo̱, batiledi ba Bibe̱l ba timbise̱le̱ milo̱ṅ ma byala ma mweńa. K’eyembilan, ponda Yehova a bolino̱ Bonaisrael mbenda ná ba si da maya, a boli ná Mose a timbise̱le̱ njo̱m a nika ngeti jita. Loba a ta a pula kika ná longe̱ le nde o maya, ebanja maya me nde longe̱. (Lev. 17:11, 14) Ombusa ponda, ke̱ bamuloloma na batudu o Yerusalem be o tila mambo kriste̱n i tano̱ yangame̱n banga o bwam ba do̱lisane̱ Loba, ba bati kika mweńa ma jiya maya.—Bebolo 15:20, 29.

To̱ná Bibe̱l e matimbise̱le̱no̱ milo̱ṅ ma byala mō̱, nik’e si mapula kwala ná Yehova a mapula ná di be̱ne̱ ko̱lo̱ngo̱ne̱ o timbise̱le̱ milo̱ṅ ma byala mi maso̱be̱ o Bibe̱l. Yesu a kwali k’eyembilan ná: “Lo makane̱ te̱, lo si to̱po̱to̱po̱ne̱.” (Mat. 6:7) Ombusa nika, a tubi mambo jeno̱ ná di kwalea ke̱ di makane̱, mena me mulatako na jemea la Loba. (Mat. 6:9-13) To̱ná di s’angame̱nno̱ so̱ timbise̱le̱ milemlem ma byala o mika masu, je wonja o timbise̱le̱ milemlem ma mato̱ti.—Mat. 7:7-11.

Ońola njo̱m a bwam so̱ nde Eyal’a Loba e matimbise̱le̱no̱ byala bō̱ to̱ milo̱ṅ ma byala mō̱. Nika ńe nde mbadi po̱ Mulēd’asu Nunde̱ne̱ Yehova a malee̱no̱ biso̱ ońola bwam basu.—Yes. 48:17, 18.