TUMA dɔw la, Bibulu sɛbɛbagaw segira kumasen dɔw kan tigitigi. Mun na do? N’a sɔrɔ u y’o kɛ kuun minw kama, an k’u la saba lajɛ:

A sɛbɛ tuma. Galen, sariya sɛbɛ tun tɛ Israɛldenw fanba fɛ. U tun ka teli ka lajɛn fanibugu yɔrɔ lo la k’a kalan lamɛn (Deter. 31:10-12). Siga t’a la, koo dɔw tun be se k’u bali ka lamɛnni kɛ koɲuman sabu u jamaba lo tun be lɔ k’o kalan lamɛn lɛri caaman kɔnɔ (Neemi 8:2, 3, 7). O la, u kɛtɔ ka segi kumaden jɔnjɔn dɔw kan, o tun b’a to a be nɔgɔya Israɛlden kelen kelen bɛɛ ma a k’a hakili to Ala ka kuma na ani k’a sira tagama. Ani u kɛtɔ ka segi kumaden dɔw kan, o tun b’a to Israɛldenw hakili be to Jehova ka sariya kɔnɔko tigitigi dɔw la.—Lev. 18:4-22; Deter. 5:1.

A sɛbɛcogo. Bibulu tilanyɔrɔ 100 kan, yɔrɔ 10 ɲɔgɔn ye dɔnkiliw ye. O yɔrɔ dɔw ye Zaburuw (wala Dɔnkiliw), Dɔnkili dimanw ani Dusukasidɔnkili ye. Tuma dɔw la, u be segi dɔnkili kɔnɔkuma dɔw kan. O kumaw be sinsin dɔnkili miiriya jɔnjɔnw kan ani u be a lamɛnbagaw dɛmɛ u k’a kɔnɔkumaw degi u kunfɛ. Misali la, a kɔrɔsi min fɔra Zaburuw 115:9-11 kɔnɔ: “Isirayɛlidenw, aw k’aw jigi la Masaba kan. Ale lo ye aw tangabaga n’aw dɛmɛbaga ye. Arɔn ka somɔgɔw, aw k’aw jigi la Masaba kan. Ale lo ye aw tangabaga n’aw dɛmɛbaga ye. Aw minw be siran Masaba ɲa, aw k’aw jigi la a kan. Ale lo ye aw tangabaga n’aw dɛmɛbaga ye.” U segira kuma dɔw kan siɲɛ caaman minkɛ, o tun b’o dɔnkili labagaw dɛmɛ ka tiɲɛnkalan nafamanw to u hakili n’u dusu la.

Walisa ka sinsin kunnafoni jɔnjɔn dɔw kan. Tuma dɔw la, Bibulu sɛbɛbagaw segira miiriya dɔw kan minw kɔrɔtanin lo kosɔbɛ. Misali la, Jehova tun y’a ɲini Israɛldenw fɛ ko u kana joli dumu. Kuun min kama a y’o ɲini u fɛ, a y’a to Musa segira o kan siɲɛ caaman na. A tun b’a fɛ ka sinsin a kan le ko danfɛn bɛɛ niin b’a joli la, o kɔrɔ, joli ye niin tagamasiɲɛ lo ye (Lev. 17:11, 14). Kɔfɛ, tuma min na cidenw ni Zeruzalɛmu cɛkɔrɔbaw y’a yira kerecɛnw man ɲi ka koo minw kɛ walisa k’u koo diya Ala ye, u sinsinna a kan tugun ko u man ɲi ka joli dumu.—Kɛw. 15:20, 29.

Tiɲɛn lo ko Jehova y’a to u segira koo dɔw kan Bibulu kɔnɔ, nka o kɔrɔ tɛ ko a b’a fɛ an ka to ka segi Bibulu kɔnɔko dɔw kan tuma bɛɛ. Misali la, Yezu ko: “N’aw be Ala daali tuma min na, aw kana segi kuma kelen kan siɲɛ caaman.” (Mat. 6:7). O kɔ, a ye koo dɔw fɔ an be se ka delili kɛ minw koo la (Mat. 6:9-13). O la, hali n’an tɛ segi kuma kelen kan siɲɛ caaman an ka deliliw la, an be se ka delili kɛ siɲɛ caaman fɛɛn dɔw koo la.—Mat. 7:7-11.

Ni Jehova y’a to u segira kumaden ani kumasen dɔw kan a ka Kuma kɔnɔ, kuun bɛrɛ b’o la. An ka Karamɔgɔba b’an kalan an nafa kama cogo caaman minw na, o ye u la dɔ ye.—Ezayi 48:17, 18.