NDUSỤK ini mme andiwet Bible ẹkesidi ẹma ẹwet ikọ, mmọ ẹfiak ẹwet kpa ukem ikọ oro. Ekeme ndidi ntak ita emi ẹkesinam mmọ ẹnam ntre:

Ini ẹkewetde ikọ oro. Ke Israel eset, ata ediwak owo ikenyeneke n̄wed Ibet eke mmọ ọkpọkpọ. Akpan usụn̄ emi ofụri idụt oro ẹkesikopde nte ẹkotde Ibet ekedi mmọ ẹma ẹboho ke tent utuakibuot ye ke temple. (Deut. 31:10-12) Nte mmọ ẹdade ke ikpat ke ediwak hour ke otu ediwak owo oro ẹkpan̄ utọn̄, imekere ke enyene mme n̄kpọ emi ẹkesisiode mmọ ekikere ẹkpọn̄ se ẹsụk ẹkotde. (Neh. 8:2, 3, 7) Ke mme ini ntre, ndifiak n̄kot mme ọkpọikọ ama esinam emem mmọ utom nditi se Ikọ Abasi etịn̄de nnyụn̄ nnanam. Nte ẹkesikotde ndusụk n̄kpọ ẹfiak ẹkot ama esinen̄ede an̄wam mmọ ẹti kpukpru se ikasan̄ade ye ibet kiet kiet emi Jehovah ọkọnọde mmọ.​—Lev. 18:4-22; Deut. 5:1.

Nte ẹkesiwetde ikọ ini oro. Ẹkpemen ofụri se idude ke Bible ẹbahade ke itie duop, ikwọ ikwọ ẹdi mbahade kiet. Emi ẹsịne n̄wed Psalm, Ikwọ Solomon, ye Eseme. Ndusụk ini, ikwọ ama esinyene ukem udịmikọ emi ẹkesikwọde ẹfiak ẹkwọ kpa ke ikwọ kiet oro, ndien oro ama esin̄wam mbon emi ẹkpan̄de utọn̄ ẹkeme ndimụm ikọ ikwọ oro ndọn̄ ke ibuot. Ke uwụtn̄kpọ, se mme ikọ emi ẹdude ke Psalm 115:9-11: “O Israel, ẹbuọt idem ye Jehovah; Enye edi andin̄wam mbufo ye otuekọn̄ mbufo. O ufọk Aaron, mbufo ẹbuọt idem ye Jehovah; Enye edi andin̄wam mbufo ye otuekọn̄ mbufo. Mbufo emi ẹbakde Jehovah, ẹbuọt idem ye Jehovah; Enye edi andin̄wam mbufo ye otuekọn̄ mbufo.” Omokụt do ke ndikwọ ukem ikọ ediwak ini ama ekeme ndinam nti ikọ ke ikwọ oro ẹnen̄ede ẹdụk mme andikwọ esịt?

Man mme akpan n̄kpọ ẹwọrọ ẹda. Ikọ ekpedi ọkpọikọ, ndusụk ini mme andiwet Bible ẹma ẹsiwet enye ediwak ini. Ke uwụtn̄kpọ, ini Jehovah ọdọhọde nditọ Israel ẹkûdia iyịp, enye ama anam Moses etịn̄ ntak ọnọ mmọ ediwak ini. Abasi okoyom mmọ ẹnen̄ede ẹkụt ke iyịp edi uwem. (Lev. 17:11, 14) Nte ini akakade, ini mme apostle ye mbiowo ke Jerusalem ẹkesụk ẹbatde mme akpan n̄kpọ emi mme Christian mîkpanamke man ẹdiyat Abasi esịt, se mmọ ẹketịn̄de ama anam ẹfiak ẹnen̄ede ẹkụt ntak emi anade ẹbet iyịp.​—Utom 15:20, 29.

Kpa ye edide Bible esitịn̄ ikọ kiet ediwak ini, Jehovah ikoyomke inyene udịmikọ ke Bible emi imụmde idọn̄ ke ibuot isikama ikwọ nte ikwọ. Ke uwụtn̄kpọ, Jesus ọkọdọhọ: “Ke ini ọbọn̄de akam, kûyịre nditịn̄ mfiak ntịn̄ n̄kpọ kiet.” (Matt. 6:7) Jesus ama etịn̄ nsio nsio n̄kpọ emi ẹkemde ye uduak Abasi, emi ikemede ndisịn ke akam. (Matt. 6:9-13) Imekeme ndibọn̄ akam mban̄a n̄kpọ kiet ediwak ini; idiọkke-o. Enye emi nnyịn mîkpanamke edi ndikọbọ ntịn̄ ukem ikọ ini isụk ibọn̄de akam nte ẹdọhọ ke imomụm idọn̄ ke ibuot.​—Matt. 7:7-11.

Imokụt nti ntak emi ẹnamde ẹtịn̄ ikọ kiet m̀mê udịmikọ kiet ediwak ini ke Bible. Usụn̄ kiet ke otu ediwak usụn̄ emi Akwa Anditeme nnyịn adade ekpep nnyịn nte ikpanamde idem nnyịn ufọn edi oro.​—Isa. 48:17, 18.