MƐI ni ŋma Biblia lɛ ateŋ mɛi komɛi tĩ wiemɔi komɛi amli shii abɔ ni amɛtsakeee hiɛ fioo po. Naa yiŋtoi etɛ ahewɔ ni ekolɛ amɛfee nakai:

Be ni aŋma. Yɛ blema lɛ, Israelbii lɛ ateŋ mɛi babaoo bɛ Mla wolo lɛ eko. He titri ni amɛnuɔ Mla lɛ mli wiemɔi lɛ yɛ ji, kɛ́ amɛyabua amɛhe naa yɛ kpee buu lɛ naa. (5 Mo. 31:​10-12) Eeenyɛ efee akɛ, akɛni amɛyi fa ni amɛdamɔɔ shi ŋmɛlɛtswai abɔ kɛboɔ Mla lɛ mli wiemɔi lɛ toi hewɔ lɛ, ewaaa akɛ nɔ ko baagbala amɛjwɛŋmɔ. (Neh. 8:​2, 3, 7) Yɛ henaabuamɔi ni tamɔ nɛkɛ ashishi lɛ, atĩɔ Mla lɛ mli wiemɔi ni he hiaa lɛ amli, ni no hãa efeɔ mlɛo ehãa maŋbii lɛ akɛ amɛbaakai ni amɛkɛtsu nii. Ekã shi faŋŋ akɛ, wiemɔi ni atĩ mli lɛ ekomɛi ye ebua amɛ waa ni amɛkai nibii komɛi ni he hiaa ni yɔɔ Nyɔŋmɔ Mla lɛ mli.—3 Mo. 18:​4-22; 5 Mo. 5:1.

Bɔ ni aŋma lɛ ahã. Biblia lɛ fãi komɛi yɛ ni lalai ni, tamɔ Lalai awolo lɛ, Solomon Lala lɛ, kɛ Yaafo wolo lɛ nɛkɛ. Lalai lɛ ekomɛi yɛ ni atĩɔ efãi komɛi amli. Enɛ ye ebua mɛi ni boɔ toi lɛ ni amɛkai lala lɛ mli wiemɔi lɛ kɛ emli otii lɛ. Wɔnaa enɛ he nɔkwɛmɔnɔ yɛ Lala 115:​9-11 lɛ. Jɛmɛ kɛɔ akɛ: “Ao Israel, okɛ ohiɛ afɔ̃ Yehowa nɔ—Lɛ ji amɛyelikɛbualɔ kɛ amɛtsɛŋ. Ao Aaron shĩa, nyɛkɛ nyɛhiɛ afɔ̃a Yehowa nɔ—Lɛ ji amɛyelikɛbualɔ kɛ amɛtsɛŋ. Nyɛ mɛi ni nyɛsheɔ Yehowa gbeyei, nyɛkɛ nyɛhiɛ afɔ̃a Yehowa nɔ—Lɛ ji amɛyelikɛbualɔ kɛ amɛtsɛŋ.” Ŋwanejee ko bɛ he akɛ, wiemɔi ni ji, “Lɛ ji amɛyelikɛbualɔ kɛ amɛtsɛŋ” lɛ mli ni atĩ shii abɔ lɛ ye ebua mɛi ni láa lɛ ni amɛkɛ oti ni he hiaa waa nɛɛ to amɛtsui kɛ amɛjwɛŋmɔ mli.

Koni akɛtĩ otii ni he hiaa amli. Bei komɛi lɛ, mɛi ni ŋma Biblia lɛ tĩɔ saji komɛi ni he hiaa lɛ amli. Akɛ nɔkwɛmɔnɔ lɛ, be ni Yehowa fã Israelbii lɛ akɛ amɛkaye lá lɛ, ehã Mose tĩ nɔ hewɔ ni esaaa akɛ amɛfeɔ nakai lɛ mli shii abɔ. No mli lɛ, Yehowa miisumɔ ni amɛnu shishi akɛ, heloo fɛɛ heloo wala ji elá lɛ, ejaakɛ no mli wala lɛ yɔɔ. (3 Mo. 17:​11, 14) Sɛɛ mli be ni bɔfoi lɛ kɛ onukpai lɛ ni yɔɔ Yerusalem lɛ tsɔɔ Kristofoi nibii ni kɛ́ amɛtsi amɛhe kɛje he lɛ Yehowa baaná amɛhe miishɛɛ lɛ, amɛ hu amɛwie akɛ ehe miihia ni atsi he kɛje lá he.—Bɔf. 15:​20, 29.

Eyɛ mli akɛ Yehowa hã atĩ wiemɔi komɛi ni yɔɔ Ŋmalɛ lɛ mli lɛ amli shii abɔ moŋ, shi no etsɔɔɔ akɛ eesumɔ ni wɔ hu wɔkɛfee wɔsu akɛ wɔbaatĩ Biblia mli wiemɔi amli kɛkɛ. Be ko lɛ, Yesu wie akɛ: “Kɛ́ oosɔle lɛ, kaawie wiemɔ kome too lɛ nɔŋŋ shii abɔ.” (Mat. 6:7) No sɛɛ lɛ, etsɔɔ wɔ saji komɛi ni wɔbaanyɛ wɔsɔle yɛ he. (Mat. 6:​9-13) Enɛ hewɔ lɛ, eyɛ mli akɛ kɛ́ wɔmiisɔle lɛ, wɔtĩii wiemɔi kome too lɛ nɔŋŋ amli shii abɔ moŋ, shi ejeee tɔmɔ akɛ wɔbaawie saji kome too lɛ nɔŋŋ ahe shii abɔ.—Mat. 7:​7-11.

No hewɔ lɛ, kɛ́ wɔna akɛ atĩ wiemɔi komɛi amli yɛ Biblia lɛ mli lɛ, ejeee efolo. Moŋ lɛ, eji gbɛ kome ni wɔ-Tsɔɔlɔ Kpele lɛ tsɔɔ nɔ etsɔɔ wɔ nii koni wɔná he sɛɛ.—Yes. 48:​17, 18.