SÌGÀ tṍó, gbò e ba beè emí Kpá Káí ólò òòa boo tã́á bel e ba beè lò. Nee taà kà nú ea beè láá naa kọ gbò e ba beè emí Kpá Káí á òòa boo tã́á bel e ba beè lòí:

Tṍó e ba beè emí Kpá Káí. Gã́bug nen ea beè di Ízràẹ̀l deè kéléá náa beè ié Kpá Log. Ba beè olòó dã́ tṍó e bà gé bugi Logí tṍó e bà bṍóná gbẹá tọ kàn káí. (Dìt. 31:​10-12) Àé láá dú kọọ̀ gbò nú ea é mááná ba bùlà beè olòó naaá vaá bà ólò elá èla mm̀ gã́bug ávà gbẹá kĩá. (Nìh. 8:​2, 3, 7) Vóà naa, ge òòa boo gbò bel ea dú bíi kọ bàá dã̀ ólò naa kọ bàá kẽea boo dọ̀ Kpá Káíá vaá tú siimá tóm. Ge olòó òòa boo sìgà moǹ bel beè palàge nvèè bá nèva kọ bàá kẽ̀èa boo gbò Log e Bàrì beè nèva.​—Lìv. 18:​4-22; Dìt. 5:1.

Bé e ba beè emí nu naa. Ba beè tú sọ́l emá nú ea é dú ene boo òb ketõ̀ò ea di mm̀ Kpá Káí​—dì belí kpá Psalm, Sọ́l Sólomòn, nè Làmèntéshìòn. Sìgà sọ́l ólò òòa boo sìgà moǹ bel, vaá níí ólò nvèè bá nè gbò e bà gé pãane tṍ kọ bàá dã́ ból ló nu e sọ́lá gé kọ́ vaá kẽ̀èa boo gbò bel ea di m. Dì belí nu dòòmà bá, nvèè kpíi ló gbò bel ea di mm̀ kpá Psalm 115:​9-11, ea kọ́ọ̀: “Dẹlẹi nyíé boo Jìhóvà, e Ízràẹ̀l​—Ẹlẹ ní ea dú ba neǹ nvèè bá nè ba gbọ ẹ́. Dẹlẹi nyíé boo Jìhóvà, e pá tọọ̀ Érọ̀n​—Ẹlẹ ní ea dú ba neǹ nvèè bá nè ba gbọ ẹ́. Dẹlẹi nyíé boo Jìhóvà, e boolo eo síìàì pọ̀ ló Jìhóvà​—Ẹlẹ ní ea dú ba neǹ nvèè bá nè ba gbọ ẹ́.” Ge òòa boo gbò tã́á bel ea di mm̀ sọ́lí beè naa kọ á tọá ló gbò e bà géè ọlí.

A beè dú bíi kọ bàá òòa boo gbò bel ea palàge dú bíi. Sìgà tṍó, gbò e ba beè emí Kpá Káí ólò òòa boo gbò bel ea palàge dú bíi. Dì belí nu dòòmà bá, tṍó e Jìhóvà beè kọ́ nè pá Ízràẹ̀l kọ bàá gá bà mii, a beè kọ́ nè Mózìs kọ á òòa boo bug ea náa vaá à kọ́ vó gã́bug tṍó. Bàrì beè gbĩ́ kọ bàá dã́ ból ló kọọ̀ dùm nú ea di dùm di mm̀ a mii​—níà gè kọọ̀ mii tõó dọ̀ dùm. (Lìv. 17:​11, 14) Tṍó e tṍó téní, gbò tóm nè gbò kànen e bà di Jèrúsalẹ̀m beè kòl béè gbò nú ea dú bíi kọ bàá kpòòlà lóó lọl ló, vaá ba beè kpáá nvèè kà m kọ bàá kpòòlà lóó lọl ló mii.​—Tóm 15:​20, 29.

Náa kal ló béè kọọ̀ Kpá Káí ooa boo sìgà tã́á bel, Jìhóvà náa gbĩ́ kọ á dú bẹẹ lóó nu gè olòó òòa boo tẽ̀ènè kà bel. Dì belí nu dòòmà bá, Jíízọ̀s beè kọọ̀: “Tṍó eo gé tãagãi ló Bàrì, ó gá ooaí boo tẽ̀ènè kà bel.” (Máát. 6:​7, NW.) Tṍó ea kọ́ vó lọ̀l, a beè gbóó kọ́ gbò nú ea bọ́ló kọ é nvee mm̀ bẹẹ tã̀àgã ló, ea gbááá ló bùlà Bàrì. (Máát. 6:​9-13) Vóà naa, náa dú bíi kọ é olòó ooa boo tẽ̀ènè kà moǹ bel tṍó e gé tãagã ló Bàrì, sõò èé láá òòa boo bel e beè kọ́ mm̀ bẹẹ tã̀àgã ló.​—Máát. 7:​7-11.

À íe gbò lé bug ea náa vaá Bàrì beè kọ bàá òòa boo sìgà gbò moǹ bel ea di mm̀ Kpá Káí. Níí dú enè sĩ́deè e bẹẹ pọ̀bkà neǹ dòbá ólò noomài nu kọbé è dọ bélè nèà bẹẹ bá.​—Àìz. 48:​17, 18.