SAPYʼÁNTE umi oskrivi vaʼekue la Biblia, orrepeti jepi umi fráse térã umi palávra. ¿Mbaʼérepa? Jahechamína mbohapy mbaʼe:

Arakaʼépa ojeskrivi vaʼekue. Yma umi israelita ndorekói vaʼekue káda uno peteĩ kópia de la léi, upévare haʼekuéra oñembyatými vaʼerã pe tavernákulope térã pe témplope, ha péicha javénte ohendu hikuái pe léi heʼíva (Deut. 31:​10-12). Eñeimahinamína oñemboʼyha hikuái upépe heta órare ha hetaiterei voi oĩ hikuái, katuete ningo oĩta heta mbaʼe odistraéva chupekuéra (Neh. 8:​2, 3, 7). Upévare, ojerrepetírõ guare heta vése umi fráse iñimportantevéva, oipytyvõ vaʼekue chupekuéra imanduʼa ha ojapo hag̃ua pe léi heʼíva. Upéva ideprovécho vaʼekue chupekuéra koʼýte ojelee jave umi léi ha mandamiénto oñeʼẽva heta mbaʼére (Lev. 18:​4-22; Deut. 5:1).

Mbaʼéichapa ojeskrivi vaʼekue. La Bíbliape jatopa algúno purahéi, por ehémplo pe lívro de Salmos, Cantar de los Cantares, ha Lamentaciones. Oĩ umi purahéi orrepetíva umi mbaʼe heʼíva. Upéva oipytyvõ kuri umi ohendúvape, ohechakuaa hag̃ua mbaʼe rehepa oñeñeʼẽ pe purahéipe ha ifasilve hag̃ua chupekuéra oikuaa de memória. Por ehémplo jahechamína Salmo 115:​9-11: “Peẽ Israelgua, pejeroviákena Jehováre. Haʼe ningo penepytyvõ ha pendeprotehe peteĩ eskúdoicha. Peẽ Aarón rogaygua, pejeroviákena Jehováre. Haʼe ningo penepytyvõ ha pendeprotehe peteĩ eskúdoicha. Peẽ perrespetáva Jehovápe, pejeroviákena Jehováre. Haʼe ningo penepytyvõ ha pendeprotehe peteĩ eskúdoicha”. Ojerrepeti jave la heʼíva ko purahéi, oipytyvõ kuri umi ohendúvape imanduʼa hag̃ua umi mbaʼe porãite heʼívare.

Mbaʼérepa ojeskrivi vaʼekue. Sapyʼánte umi oskrivi vaʼekue la Biblia, orrepeti umi mbaʼe heʼíva iñimportanteterei rupi ha oipotágui oñentende porã. Por ehémplo, Jehová heʼírõ guare umi israelítape ani hag̃ua hoʼu tuguy, Moisés heʼi jey jey chupekuéra upéva. Jehová oipota kuri hesakã porã entéro mbaʼe oikovéva rekove oĩha huguýpe, térã pe tuguy orrepresentaha ñande rekove (Lev. 17:​11, 14). Tiémpo rire, umi apóstol ha ansianokuéra Jerusalengua, oskrivi jey umi kristiánope mbaʼépa omboyke vaʼerã opyta porãsérõ hikuái Jehovándi. Ha upépe orrepeti jey kuri chupekuéra tekotevẽha omboykete pe tuguy (Hech. 15:​20, 29).

La Bíbliape ojerrepetíramo jepe umi palávra, upéva ndeʼiséi Jehová oipotaha jarrepeti jey jey umi mbaʼe jaʼéva. Jesús heʼi vaʼekue voi: “Peñemboʼe jave ani perrepeti jey jey peteĩ mbaʼénte” (Mat. 6:7). Upéi haʼe heʼi vaʼekue unas kuánta kósa ikatúva jaʼe ñañemboʼe jave Jehovápe (Mat. 6:​9-13). Ñañemboʼe jave ndajarrepetipáiramo jepe umi mbaʼe jaʼéva, ikatu ñande ñañemboʼe Jehovápe peteĩ mbaʼére heta vése (Mat. 7:​7-11).

Javyʼaitépa oĩ haguére umi mbaʼe ojerrepetíva la Bíbliape, péicha ñane Mboʼehára Ijojahaʼỹva ñanemboʼe umi mbaʼe ideprovéchotava ñandéve (Is. 48:​17, 18).