SAŊA ase’a Baabule gulesegɔdoma basɛba ni tɔɣɛ yɛla ase’a taɣesɛ mɛ. Geele yɛla atã n yuun ta’an basɛ ti ba eŋɛ bala:

Sansɛka ti ba yuun gulesɛ. Diimi Israel saŋa la, nɛreba la zo’e zo’e yuun ka tari bamea Lɔɔ gɔŋɔ. Saŋa zo’e zo’e, ba yuun ni laɣesɛ la suɣerɛ la poan ti ba kaala Lɔɔ la bɔ’ɔra ba. (Tɛɛ. 31:​10-12) Nɛreba la yuun ni ze’a mɛ kɛlesa ge ti voole me yuun ta’an bɔna bim. (Ne. 8:​2, 3, 7) Bɔnkaŋa poan la, la yele yuun ni pakɛ mɛ ti ba tɔɣera yelebɛa ase’a taɣesa lan wan eŋɛ se’em ti nɛreba la tɛ̃ra gulesegɔ la ge ta’an dekɛ tum tuuma. Ban yuun ni tɔɣera yɛla ase’a taɣesa la yuun soŋɛ nɛreba la mɛ ti ba tɛ̃ra yelese’a n pakɛ la, maɣesɛ wuu Yehowa Lɔɔ la a gãkerɛ yɛla la.—Mal. 18:​4-22; Tɛɛ. 5:1.

Ban yuun ni gulesa se’em. Baabule la tari la yuuma zo’e zo’e, maɣesɛ wuu Yooma gɔŋɔ la, Solomon gɔŋɔ la, la Fabelegɔ gɔŋɔ la. Saŋa ase’a ba ni tɔɣera yɛla ase’a taɣesa mɛ ti yuunɛ la ta’an naɛ taaba soŋa ti la soŋɛ nɛreba la ti ba tɛ̃ra yelebɛa la. Makerɛ, bisɛ yelebɛa se’a n boi Yooma 115:​9-11: ‘Israel yire delum la Naayinɛ wa, eŋa n soŋeri ba ge dɛna ba tɛ’ɛlega. Aron yire delum la Naayinɛ wa, eŋa n soŋeri ba ge dɛna ba tɛ’ɛlega. Sɛba n zoti en la delum la Naayinɛ wa, eŋa n soŋeri ba ge dɛna ba tɛ’ɛlega.’ Ban yuun gulesɛ yelebɛa la taɣesɛ se’em la yuun soŋɛ yuunyuuneba la mɛ ti yelebɛa la bɔna ba suuren.

La yuun nari ti ba tɔɣɛ taɣesɛ yelese’a n pakɛ. Saŋa ase’a Baabule gulesegɔdoma yuun ni taɣesɛ la ninmɔ’ɔrɛ yɛla. Makerɛ, Yehowa n yuun yele Israeldoma ti ba da di ziim la, a yuun basɛ ti Moses taɣesɛ yɛla la mɛ zo’e zo’e bo ba. Naayinɛ yuun boti a tɔɣɛ taɣesɛ ti ba baŋɛ ti bunvɔa vom boi la a ziim poan ti la pa’alɛ ti, ziim la dela vom. (Mal. 17:​11, 14) Pooren, tuuntuneba la, la keendoma la n boi Yerusalem la yuun pa’alɛ la ninmɔ’ɔrɛ yelese’a n ka nari ti ba tum sa’am Naayinɛ suure. Ba yuun le taɣesɛ lan de ninmɔ’ɔrɛ se’em ti ba da dita ziim.—Tm. 15:​20, 29.

La boi bim ti Baabule la tɔɣɛ yɛla ase’a taɣesɛ mɛ ge bala ka pa’alɛ ti Yehowa boti la to kɔ’ɔn tara Baabule gulesegɔ yɛla ase’a tɔɣera taɣesa. Makerɛ, Yezu yuun yeti: ‘Ya san zusa, ya da tɔɣeri ya yele yinɛ taɣesa.’ (Mt. 6:7) A yuun nyaa pa’alɛ to la ton wan zusɛ yelese’a ti la makɛ la Naayinɛ puti’irɛ n boti sɛla. (Mt. 6:​9-13) La boi bim ti to zusega poan, to ka tɔɣeri yɛla taɣesa ge to wan ta’an zusɛ yelese’a ti to bɔta sugumnɔɔrɛ zo’e zo’e.—Mt. 7:​7-11.

Bala la, la dela yelesonɛ la Baabule la n tɔɣeri yɛla ase’a taɣesa la. Sarɔtɔ seto ti to Pa’alekãtɛdaana la dɔla pa’ala to la ayima n bala—Isa. 48:​17, 18.