TO WHEDELẸNU, Biblu-kàntọ lẹ yí hogbe dopolọ lẹ zan nado vọ́ nuhe ko yin didọ de dọ. Lẹnnupọndo whẹwhinwhẹ́n atọ̀n he gán ko zọ́n bọ Biblu-kàntọ lẹ do wàmọ ji:

Ojlẹ he mẹ e yin kinkàn te. To Islaeli hohowhenu tọn, suhugan mẹlẹ tọn ma do vọkán owe Osẹ́n lọ tọn yetọn titi. Yé nọ saba sè bọ Osẹ́n lọ nọ yin hihia whenue akọta lọ pli dopọ to gòhọtúntún lọ mẹ, podọ to tẹmpli mẹ. (Deut. 31:10-12) E yọnbasi taun dọ ayihafẹsẹnamẹnu lẹ ni sù dile yé to todoai bosọ to ote na gànhiho susu lẹ to gbẹtọgun daho lọ mẹ. (Nẹh. 8:2, 3, 7) To ninọmẹ mọnkọ lẹ mẹ, hodidọ tangan he to yinyin vivọdọ lẹ na ko nọ hẹn ẹn bọawuna gbẹtọ lọ lẹ dogọ nado flin owe-wiwe lẹ bosọ yí yé do yizan mẹ. Na taun tọn, hogbe delẹ vivọdọ na ko gọalọna yé nado flin nudọnamẹ gigọ́ gando whẹho delẹ go, taidi aṣẹdai po nudide whẹdida tọn Jiwheyẹwhe tọn lẹ po.—Lev. 18:4-22; Deut. 5:1.

Aliho he mẹ e yin kinkàn te. Nudi 10 to kanweko ji kandai Biblu tọn lẹ tọn wẹ bẹ ohàn lẹ hẹn, di apajlẹ owe Salmu lẹ tọn, Ohàn Sọlomọni tọn po Avigbe Jelemia tọn po. To whedelẹnu, ohàn delẹ nọ bẹ hàngbèpli hẹn, ehe nọ zinnudo hosọ ohàn lọ tọn ji, bo nọ gọalọna mẹhe to todoai lẹ nado hẹn hogbe lọ lẹ do ayiha mẹ. Di apajlẹ, doayi hogbe he to Salmu lẹ 115:9-11 mẹ lẹ go, e dọmọ: “Islaeli E, mì dejido Jehovah go—Ewọ wẹ alọgọ po awọ̀yinu mìtọn po. Whédo Aalọn tọn E, mì dejido Jehovah go—Ewọ wẹ alọgọ po awọ̀yinu mìtọn po. Mì mẹhe nọ dibusi Jehovah lẹ emi, mì dejido Jehovah go—Ewọ wẹ alọgọ po awọ̀yinu mìtọn po.” Be a mọ lehe hogbe ehelẹ vivọdọ na ko gọalọna hanjitọ lẹ nado hẹn nugbo họakuẹ lẹ do ayiha po ahun yetọn lẹ po mẹ do ya?

Nado zinnudo whẹho titengbe lẹ ji. To whedelẹnu, Biblu-kantọ lẹ vọ́ hodidọ titengbe delẹ dọ. Di apajlẹ, whenue Jehovah na anademẹ Islaelivi lẹ ma nado dù ohùn, e hẹn ẹn diun dọ Mose vọ́ whẹwhinwhẹ́n lọ dọ whlasusu. Jiwheyẹwhe jlo na zinnudeji dọ ogbẹ̀ nutogbẹ̀ lọ tọn tin to ohùn lọ mẹ, enẹ wẹ yindọ ohùn lọ nọtena ogbẹ̀. (Lev. 17:11, 14) To nukọn mẹ, whenue apọsteli lẹ po mẹho he to Jelusalẹm lẹ po slẹ aliho titengbe delẹ nado dapana homẹ Jiwheyẹwhe tọn hinhẹngble, yé sọ zinnudo nujọnu-yinyin laninọ na ohùn tọn ji.—Owalọ 15:20, 29.

Jehovah ma jlo dọ hogbe Owe-wiwe lẹ tọn vivọdọ ni lẹzun aṣa. Di apajlẹ, Jesu dọmọ: ‘Eyin mì to dẹ̀ho, mì dọ dọvọdọ nudopolọ lẹ tọn blo.’ (Mat. 6:7) Enẹgodo, e donù nuhe go mí gán nọ hodẹ̀ gando bọ e na sọgbe hẹ ojlo Jiwheyẹwhe tọn lẹ go. (Mat. 6:9-13) Enẹwutu, eyin mí ma tlẹ dọ dọvọdọ nudopolọ lẹ tọn to odẹ̀ mítọn lẹ mẹ, mí vò nado hodẹ̀ gando whẹho dopolọ lẹ go whlasusu.—Mat. 7:7-11.

Enẹwutu, na whẹwhinwhẹ́n dagbe lẹ wutu, Ohó gbọdo Jiwheyẹwhe tọn dọ dọvọdọ hogbe po hodidọ delẹ po tọn. Ehe yin dopo to aliho susu he mẹ Nuplọnmẹtọ Daho mítọn nọ plọn mí lehe mí gán hẹn ale wá na míde do lẹ tọn mẹ.—Isa. 48:17, 18.