MAY mga tion nga ginasulitsulit sang mga manunulat sang Biblia ang pila ka tinaga kag ekspresyon. Ari ang posible tatlo ka rason kon ngaa ginhimo nila ini:

Ang tion kon san-o ini ginsulat. Sa Israel sang una, wala sing personal nga kopya sang Kasuguan ang kalabanan nga tawo. Pero ginabasa ang Kasuguan kon nagatipon sila sa tabernakulo, kag amo ini ang paagi para matun-an nila ini. (Deut. 31:10-12) Samtang nagapamati sila kag nagatindog sing pila ka oras kaupod ang madamo nga tawo, posible gid nga may mga tion nga matublag sila. (Neh. 8:2, 3, 7) Sa sini nga mga tion, kon suliton ang importante nga mga tinaga kag ekspresyon, mas mahapos para sa ila nga matandaan ang mga kasulatan kag maaplikar ini. Ang pagsulit sa pila ka tinaga nakabulig sa ila nga matandaan ang mga detalye sang mga kasuguan nga ginhatag sang Dios sa ila.—Lev. 18:4-22; Deut. 5:1.

Ang estilo sang pagsulat sini. Mga 10 porsiento sang Biblia ang ambahanon. Nalakip sa sini ang libro sang Mga Salmo, Ambahanon ni Solomon, kag Mga Panalambiton. May mga ambahanon nga may mga tinaga kag ekspresyon nga ginasulitsulit. Paagi sa sini, mas matandaan kon parte sa ano ang ambahanon kag mas mahapos ini masaulo. Halimbawa, talupangda ang mga tinaga sa Salmo 115:9-11: “O Israel, magsalig kamo kay Jehova—Sia ang inyo bulig kag ang inyo taming. O panimalay ni Aaron, magsalig kamo kay Jehova—Sia ang inyo bulig kag ang inyo taming. Kamo nga nagakahadlok kay Jehova, magsalig kamo kay Jehova—Sia ang inyo bulig kag ang inyo taming.” Sigurado gid nga bangod ginasulitsulit ang ekspresyon nga “sia ang inyo bulig kag ang inyo taming” sa sini nga ambahanon, matandaan gid sang bisan sin-o nga magaamba sini ini nga kamatuoran.

Para padakuon ang importante nga mga punto. May mga tion nga ginsulit sang mga manunulat sang Biblia ang importante nga mga tinaga kag ekspresyon. Halimbawa, sang ginsugo ni Jehova ang mga Israelinhon nga indi pagkaunon ang dugo, madamo nga beses nga ginpasulit niya kay Moises kon ano ang rason. Gusto ipadaku sang Dios nga ang kabuhi sang unod ara sa dugo. Buot silingon, ang dugo nagarepresentar sa kabuhi. (Lev. 17:11, 14) Sang ulihi, sang ginsulat sang mga apostoles kag sang mga gulang sa Jerusalem ang mga dapat likawan sang mga Cristiano para malipay sa ila ang Dios, ginpadaku nila liwat ang parte sa paglikaw sa dugo.—Binu. 15:20, 29.

Bisan pa ginasulitsulit sang mga manunulat sang Biblia ang pila ka tinaga kag ekspresyon, indi buot silingon sini nga gusto ni Jehova nga himuon naton nga kinabatasan ang pagsulitsulit sang mga tinaga kag ekspresyon sa Biblia. Halimbawa, si Jesus nagsiling: “Kon magpangamuyo kamo, indi ninyo pagsulitsulita ang inyo ginasiling.” (Mat. 6:7) Dayon ginsambit niya ang pila ka butang nga puede naton ipangamuyo. (Mat. 6:9-13) Gani bisan pa wala naton ginasulitsulit ang aton ginasiling sa aton mga pangamuyo ukon pareho lang nga mga tinaga ang aton pirme ginagamit, puede naton sulitsuliton ang mga butang nga gusto naton ilakip sa aton mga pangamuyo.—Mat. 7:7-11.

Gani may maayo nga mga rason kon ngaa ginasulitsulit sang mga manunulat sang Biblia ang pila ka tinaga kag ekspresyon. Isa ini sa madamo nga paagi sang aton Daku nga Instruktor sa pagtudlo sa aton para sa aton kaayuhan.—Isa. 48:17, 18.