COV neeg sau phau Vajlugkub tej thaum siv tib co qub lus hais tas hais dua. Cia peb tham txog peb yam seb vim li cas lawv ua li no:

Txheej thaud. Cov Ixayees txheej thaum ub, tsis yog txhua tus muaj Txoj Kev Cai rau lawv nyeem. Ntau zaus lawv tsuas hnov Txoj Kev Cai thaum ib tsoom neeg sawv daws tuaj mloog ua ke ntawm lub Tsev Ntaub xwb. (2 Kevcai 31:10-12) Tej zaum muaj ntau yam los tab kaum lawv thaum lawv sawv ntsug mloog vim yuav tau sawv ntev ntev thiab muaj tib neeg coob coob ib ncig. (Nehemis 8:2, 3, 7) Thaum zoo li no, yuav tau hais tas hais dua thiaj yuav pab tau lawv khaws cov ntsiab lus tseem ceeb thiab coj los siv. Ua li no lawv thiaj li tsis hnov qab tej kev cai uas Yehauvas muab rau lawv.​—Levis Kevcai 18:4-22; 2 Kevcai 5:1.

Nkauj. Hauv phau Vajlugkub ib feem kaum yog nkauj, xws li Phau Ntawv Nkauj, Xalumoos Tej Nkauj, thiab Nkauj Quaj Ntsuag. Muaj tej thaum cov nqe hais tas hais dua los twb yog kom cov mloog nkag siab lub ntsiab thiab cov lus hauv zaj nkauj. Xws li nyob hauv Phau Ntawv Nkauj 115:9-11 uas hais tias: “Cov Yixalayees, nej cia li tso siab rau [Yehauvas]. Nws yog tus pab nej thiab tiv thaiv nej. Vajtswv cov povthawj, nej cia li tso siab rau [Yehauvas]; Nws yog tus pab nej thiab tiv thaiv nej. Txhua tus uas pehawm [Yehauvas], nej cia li tso siab rau [Yehauvas]; Nws yog tus pab nej thiab tiv thaiv nej.” Qhov uas hais tas hais dua no, yuav pab tau cov hu nkauj muab cov nqe ntawd khaws rau hauv nruab siab.

Hais kom meej. Cov sau phau Vajlugkub tej thaum siv cov qub lus hais tas hais dua. Xws li Yehauvas hais kom cov Ixayees txhob noj ntshav. Nws txib kom Mauxes hais tas hais dua. Vajtswv xav kom lawv nkag siab tias txhua yam ciaj sia, txoj sia nyob hauv cov ntshav. (Levis Kevcai 17:11, 14) Tom qab no thaum cov tub txib thiab cov txwj laus hauv Yeluxalees tuaj sab laj ua ke, lawv hais tas hais dua kom caiv ntshav.​—Tes Haujlwm 15:20, 29.

Txawm phau Vajlugkub hais mus hais los tib co qub lus, lub ntsiab tsis yog kom peb qog cov lus qub tas li thaum peb pe hawm Yehauvas. Xws li Yexus hais tias: “Thaum koj thov Vajtswv, tsis txhob hais mus hais los tib co qub lus.” (Mathais 6:7) Nyob hauv Mathais 6:9-13, Yexus qhia ntxiv tias peb thov tau txog dab tsi. Txawm tias peb tsis hais mus hais los tib co qub lus thaum peb thov Vajtswv los peb yeej meej taij tag taij thiab thov tag thov thiab.​—Mathais 7:7-11.

Txawm Vajtswv txoj lus hais tas hais dua los yeej muaj qab hau. Tus Xib Hwb Uas Loj Dua Ntais yeej muaj ntau txoj hau kev los cob qhia tej uas muaj nuj nqis rau peb xwb.​—Yaxayas 48:17, 18.