BAIBEL torea taudia ese hereva haida idia torea lou. Mani unai bamona idia karaia ena badina toi ita herevalaia:

Idia torea negana. Guna Israela ai, taunimanima momo dekenai Taravatu bukana ena kopi ta ia noho lasi. Nega momo Israela besena be palai dubu dekenai idia haboua bona ta ese Taravatu bukana ia duahia neganai, idia kamonai. (Deu. 31:​10-12) Hutuma be hora haida idia gini bona kamonai lalonai, reana gau haida ese edia kamonai karana ia hadikaia. (Neh. 8:​2, 3, 7) Unai bamona negadiai, reana mai anina bada point idia gwauraia loulou, unai amo taunimanima ese idia laloatao bona badinaia diba. Hereva haida idia gwauraia loulou unai amo, mai anina bada gaudia idia laloatao, hegeregere Dirava ena taravatu bona ena hahemaoro herevadia.—Lev. 18:​4-22; Deu. 5:1.

Idia torea dalana. Baibel ena kahana haida be ane herevadia, hegeregere Salamo, Solomona Ena Ane, bona Lalohisihisi Ane. Nega haida ane herevadia lalonai, hereva haida be idia hedinarai loulou. Unai ese ane ena hereva badana ia hahedinaraia bona kamonai taudia ia durua unai hereva idia laloatao totona. Hegeregere, Salamo 115:​9-11 ena hereva ita laloa, ia gwau: “Israela e, Iehova umui abidadama henia, Ia be emui durua tauna bona emui kesi. Arona ena bese taudia e, Iehova umui abidadama henia, Ia be emui durua tauna bona emui kesi. Iehova umui gari henia taudia e, Iehova umui abidadama henia, Ia be emui durua tauna bona emui kesi.” Unai hereva gwauraia loulou karana ese ane abia taudia ia durua, edia lalona ai unai hereva badadia idia laloatao totona.

Idia torea ena badina. Baibel torea taudia ese mai anina bada herevadia idia torea loulou. Hegeregere, Iehova ese Israela taudia ia hamaoroa rara do idia ania lasi, bona Mose ia hamaoroa unai taravatu ena badina do ia gwauraia loulou. Bona Dirava ia ura hahedinaraia iseda mauri be rara lalonai, anina be, rara ese mauri ia laulaulaia. (Lev. 17:​11, 14) Gabeai, Ierusalema ai aposetolo taudia bona tatau badadia be Dirava ese ia moalelaia lasi gaudia idia herevalaia neganai, rara dadaraia karana idia gwauraia lou.—Kara 15:​20, 29.

Ena be Baibel ai hereva haida idia hedinarai loulou, to unai ese ia hahedinaraia lasi Iehova ia ura Baibel ena hereva gwauraia loulou karana ita manadalaia. Hegeregere, Iesu ia gwau: “Oi guriguri neganai, gau tamona oi gwauraia loulou lasi.” (Mat. 6:7) Bena ia ese Dirava ena ura hegeregerena ai ita gurigurilaia diba gaudia ia herevalaia. (Mat. 6:​9-13) Unai dainai, ena be iseda guriguri ai hereva tamona ita gwauraia loulou lasi, to topik ta ita gurigurilaia loulou diba.—Mat. 7:​7-11.

Badina namona dainai, Dirava ena hereva lalonai hereva haida idia hedinarai loulou. Bona unai be dala ta, iseda Hadibaia Tauna Badana ese ita ia hadibaia namo ita abia totona.—Isa. 48:​17, 18.