KEKADANG, sekeda penulis Bup Kudus ngulang rambai jaku ti sama. Peratika tiga kebuah ke engka ngasuh bala penulis Bup Kudus ngereja nya:

Ni maya utai nya ditulis. Ba jeman Israel kelia, mayuh orang nadai salinan Adat kediri empu. Kesuah iya, sida semina ninga Adat Petara dibacha lebuh sida begelumu enggau orang bukai ba Langkau Sembiang. (U-dat. 31:​10-12) Maya nya, seraya sida bediri sereta ningaka Adat nya dibacha pengelama bejam-jam, tentu bisi utai ke ngelimpangka sida. (Neh. 8:​2, 3, 7) Ba maya ke baka nya, enti orang ke macha nya ngulang rambai jaku ti penting, orang deka senang agi ingat sereta nitihka utai ti dibacha nya. Tu mega deka nulung sida ingatka utai enggau silik agi, baka utai ti bekaul enggau adat ke diberi Jehovah ngagai sida.​—Lew. 18:​4-22; U-dat. 5:1.

Nama utai ke ditulis. Kira-kira 10 peratus ari Bup Kudus nya lagu. Tu nyengkaum bup Masmur, Pelandai Solomon, enggau Sabak Kenang. Kekadang lagu ngembuan rambai jaku ke diulang. Tu deka nekanka tema lagu nya sereta nulung bala peninga ngafal lirik lagu nya. Ambika chunto, peratika rambai jaku ke bisi ba Masmur 115:​9-11: ‘Panggaika pengarap kita ba Jehovah, kita orang Israel. Iya nulung sereta nyaga kita. Panggaika pengarap kita ba Jehovah, kita imam Petara. Iya nulung sereta nyaga kita. Panggaika pengarap kita ba Jehovah, semua kita ke nangika Iya. Iya nulung sereta nyaga kita.’ Lebuh bala penyanyi ngulang rambai jaku tu, nya deka nulung sida ingatka pemendar ti berega nya ba ati sida.

Nama kebuah iya ditulis. Kekadang bala penulis Bup Kudus ngulang rambai jaku ti penting. Ambika chunto, lebuh Jehovah nagang orang Israel ari makai darah, Iya ngasuh Moses ngulang kebuah nya mayuh kali. Petara deka sida nemu, nyawa bisi dalam darah. Nyadi, darah nya ngambarka nyawa. (Lew. 17:​11, 14) Udah nya, lebuh bala rasul enggau bala tuai gempuru ba Jerusalem nulis pasal utai ti patut diseliahka ngambika ulih ngelantangka ati Petara, sida sekali agi nekanka poin pasal nyeliahka darah.​—SKR. 15:​20, 29.

Taja pan Bup Kudus kekadang ngulang utai ti disebut iya, tang Jehovah enggai kitai bisi tebiat ngulang rambai jaku ti sama ari ayat Bup Kudus. Ambika chunto, Jesus madahka: “Lebuh kita besampi, anang selalu ngulang leka jaku ti sama.” (Mat. 6:7) Udah nya, Jesus madahka sekeda utai ke ulih disampika kitai ke sejalai enggau peneka Petara. (Mat. 6:​9-13) Nyadi, taja pan kitai enda ngulang leka jaku ti sama lebuh besampi, tang kitai agi ulih besampika topik ti sama mayuh kali.​—Mat. 7:​7-11.

Nya alai, endang bisi kebuah ti manah Jaku Petara ngulang sekeda leka jaku tauka rambai jaku. Nya meh siti chara Jehovah, Pengajar kitai ti Pemadu Besai, ngajar kitai ngambika kitai bulih penguntung.​—Isa. 48:​17, 18.