ANGỊLẸ kị da ịBayịbụụ kaa mẹ ẹla ookpokpo ya ụka ọhẹ. Kụ ẹhị yẹ ang ịta ịlẹ kị du ká angị dọọ ka họ ịnyị myị́ lẹe:

Ụka ọlẹ kị dọọ. Lụka nya ala Isirẹlụ onyogo, ụmụmẹ nya angịnyị á la ụpwụ nya Ehile la ịlaa ka. Ụka ká ẹpwụma lẹpwụ-lẹpwụ á tụguru ẹ-ẹga nya ọdụ lẹ ị kaa wo kị ja wa Ehile dodehe lẹ. (Ehile. 31:10-12) Ọ chịkpẹẹ yẹẹyẹẹ ká uyawụ ka ji ẹga ọlịịwẹ bala o-ri angịnyị ka dayịkọkọ lụka ọtata ẹ-ẹpwụ nya iru nya angịnyị ịlẹ kị ja ke ụrụ wo ẹla. (Neh. 8:2, 3, 7) Ẹ-ẹpwụ nya iwe-ahụrụ ọlịịwẹ, ẹhị nya ẹla ịlẹ kị baba ọ-ka ma ya ka da angịnyị ụbwọ nyọka jẹ́-ẹ kpịtịya nyaa bala ọ-kpa họ ụkụrwọ. Omyi ẹla ịhyẹ ọ-ma ya ka daa ụbwọ yẹẹyẹẹ nyọka kpịptịya nya ehile ịlẹ ká iJihova ya haa kpẹẹkpẹẹ.—Liv. 18:4-22; Ehile. 5:1.

Abwọlẹ kị bwu dọọ. Ị da ụpa nya ịBayịbụụ ịhyẹ lala eje. Ọ-chụ pwokwita ri apwụ nya Eje Ọnyịịla, Eje ọ-Gụ Eje, bala Ida Ọbaba. Omyi ẹla ịhyẹ kaa hyeehe mwụba-mwụba ụka ọhẹ. Ọọwa kaa du ká egbeju ẹla nya eje ọọwa kaa la gede-gede bala ọ-da ọngọ wẹẹ ke ụrụ wo eje ọọwa ụbwọ nyọka jẹ́-ẹ kpọọ e-egbeju. Ọ-chụ pwokwita, kụ ẹhị yẹ omyi ẹla ịla Eje Ọnyịịla 115:9-11: “Anụ ala Isirẹlụ ee, anụ dahịhile [iJihova] mẹ! Ọwa-à ri ọngọdụbwọ nyanụ lẹ. Ọwa-à ri ọkụmada nyanụ lẹ. Anụ angịkiliya alugbiyegu nya Erọn ee, anụ dahịhile [iJihova] mẹ! Ọwa-à ri ọngọdụbwọ nyanụ lẹ. Ọwa-à ri ọkụmada nyanụ lẹ. Anụ angị kaa gbịgba ha [iJihova] ee, anụ wuu, anụ dahịhile [iJihova] mẹ! Ọwa-à ri ọngọdụbwọ nyanụ lẹ. Ọwa-à ri ọkụmada nyanụ lẹ.” À yẹ jaabwọ ká ẹla ịwẹ ọ-ma ya ka da ụbwọ ká ẹlịlẹhị ịkpọnchị ịwẹ ka ju angị mwu eje ọwẹ ka ẹpwụ ọkịlẹtụ?

Ang odudu kị dọọ. Angịlẹ kị da ịBayịbụụ kaa mẹ ẹla ọlẹ kọ la kpọnchị ya ụka ọhẹ. Ọ-chụ pwokwita, ụka ká iJihova mẹjẹ ala Isirẹlụ nyị ri ịwọ ka, o byi iMosisi nyị ma ẹla ọọwa ya ugbabwọ lụmẹ-lụmẹ. Ohe tịtọ kị ka jẹ́ yẹẹyẹẹ nyori ịwọ à ri ọhịhị lẹ, ọọwa ri, ịwọ ku ọmwakpa nya ọhịhị. (Liv. 17:11, 14) Ụka ọkịla ọlẹ ká ọlẹrụ ịPọlụ bala angịgbahị ịla iJerusalẹm gu ẹnyị nya ang ịlẹ ká ọngịnyị baba nyọka chebwo hi kọ ka jẹ́-ẹ họ ẹla kpụ Ohe ịpyọ, ị myịmyị ya ẹla u-uhye nya ọbaba nyọka chebwo hi ịwọ.—Ụkụr. 15:20, 29.

Ịlẹhị lẹ ịBayịbụụ kaa ma ẹla ịhyẹ ya, ọọwa á mẹjẹ nyori iJihova tịtọ kahị ka la abwẹla nyọka kpa ala ịịwa ma ya ka. Ọ-chụ pwokwita, iJisọsị yẹkẹẹ: “Ụka kanụ juwa raabwọ ha Ohe Oluhye, anụ juwa ma ẹla ookpokpo ya gbegbegbe . . . ka.” (Mat. 6:7) Ọọwa lẹ o gu ẹnyị nya egbeju nya ẹla ịlẹ kahị ka jẹ́-ẹ raabwọ chajị nyaa myị́ pwoku irya nya Ohe lẹlẹ. (Mat. 6:9-13) Lẹ nanana nyori áhị kaa mẹ ẹla ookpokpo ya ẹ-ẹwpụ nya abwọ ọrịrị ka, ahị ka jẹ́-ẹ tịrẹkpẹ ka egbeju nya ẹla ịlẹ kahị raabwọ chajị nyaa ene lẹ ụka mwụba-mwụba myị́.—Mat. 7:7-11.

Ohe la ang odudu ọlẹ ka ya iwe da ká Omyi Ẹla nyamwụ kaa ma ẹla ịhyẹ ya. O ri ụgbẹyị ọhẹ ọlẹ ká Ọngọ Mẹ Ang Jẹ Ọtụka kaa bwu mẹ ang jẹẹhị chajị nya apyobwuna nya ịlọhị.—Ayị. 48:17, 18.