AHWO nọ ẹzi Ọghẹnẹ ọ wọ kere Ebaibol na a wariẹ eme jọ. Joma ta ẹme te eware esa nọ o sae jọ nọ o wha riẹ ze nọ a rọ wariẹ eme jọ.

Oke nọ a ro kere eme na. Evaọ oke anwae, ahwo Izrẹl buobu a wo obe Uzi na ha. Rekọ ahwo nana a jẹ hai yo eme nọ a bi se no obe Uzi na ze, nọ a te kpobọ uwou-udhu egagọ na, hayo etẹmpol nọ a bọ uwhremu na. (Izie. 31:10-12) Ahwo Izrẹl nọ a jẹ hae gaviezọ kẹ obe Uzi na a jọ buobu. Yọ esejọhọ emedo ọ jẹ hae jariẹ. Yọ a jẹ hai dikihẹ euwa buobu. (Neh. 8:2, 3, 7) Nọ a tẹ be wariẹ ẹme evaọ oria nọ ahwo a rrọ buobu u re woma gaga. Keme u re ru nọ a sae rọ kareghẹhọ ẹme nọ a se, a vẹ sai ru eware nọ a yo na. Yọ nọ a tẹ be wariẹ eme ere, u re ru nọ a rẹ rọ kareghẹhọ Uzi nọ Jihova o jie kẹ ae.—Izerẹ 18: 4-22; Izie. 5:1.

Oghẹrẹ nọ a ro kere eme na. A tẹ ghale Ebaibol na kpohọ abakpe, abọvo abakpe yọ ile ọvo. Wọhọ oriruo, ile ọvo e rrọ obe Ilezi, Ole nọ O Vi Ile, gbe Enuobro. A rẹ jọ ile jọ wariẹ eme jọ. Eme itieye na nọ a jẹ hae jọ ile jọ wariẹ na o rẹ lẹliẹ ohwo muẹrohọ uzedhe oware nọ ole na o be ta kpahe. Yọ u re ru nọ ahwo na a rẹ rọ kake riẹ ole na. Whọ rẹ jọ Olezi 115:9-11 ruẹ eme jọ nọ a wariẹ. Olezi yena o ta nọ: “O Izrẹl, wha fievahọ Jihova ọye họ ofiobọhọ rai gbe ojese rai. O uwou Erọn, wha fievahọ Jihova ọye họ ofiobọhọ rai gbe ojese rai. Whai enọ e be dhozọ Jihova, wha fievahọ Jihova ọye họ ofiobọhọ rai gbe ojese rai.” Kọ who muẹrohọ eme jọ nọ i wuzou gaga nọ a wariẹ unuẹse buobu, nọ u fo nọ ohwo nọ ọ be so ole na ọ rẹ kareghẹhọ?

U fo re a wariẹ eme jọ nọ i wuzou. Ahwo nọ a kere Ebaibol na a wariẹ eme jọ nọ i wuzou gaga. Oriruo jọ họ, uzi nọ Jihova o jie nọ a re azẹ vievie he na. Mosis ọ wariẹ oware nọ a rọ fiki riẹ jie uzi na unuẹse buobu. Ọghẹnẹ ọ gwọlọ nọ a kareghẹhọ nọ eva azẹ na uzuazọ o rrọ. (Izerẹ 17:11, 14) U je te oke ikọ gbe ekpako na, a tẹ jẹ wariẹ ẹme azẹ na. Evaọ okenọ a jẹ ta kpahe eware nọ a re siomano re eware i woma kẹ ae, a fodẹ azẹ.—Iruẹru 15:20, 29.

Orọnikọ thakpinọ u fo re a wariẹ ẹme, a rọ wariẹ eme jọ evaọ Ebaibol na ha. A re mu ẹme wariẹ hẹ, oyejabọ nọ Jesu ọ rọ ta nọ: “Nọ whọ tẹ be lẹ, who dhe eme evona ẹwẹwariẹ hẹ.” (Mat. 6:7) Nọ ọ ta ere no, ọ tẹ vuẹ omai epanọ a rẹ lẹ. Ọ tubẹ vuẹ omai eware jọ nọ Ọghẹnẹ ọ gwọlọ nọ ma hae lẹ kpahe ẹsikpobi. (Mat. 6:9-13) Fikiere dede nọ u fo re ma hai mu wariẹ eme evona evaọ olẹ mai hi, o thọ họ re ma lẹ kpahe oware ovona unuẹse buobu.—Mat. 7:7-11.

Eware nọ ma ta no na i dhesẹ nọ a mu wariẹ eme nọ e rrọ Ebaibol na ha. Eme nọ a wariẹ na yọ emamọ edhere jọ nọ Owuhrẹ Ologbo Oride mai na o bi ro wuhrẹ omai eware nọ e rẹ kẹ omai erere.—Aiz. 48:17, 18.