SOMTAIM di man dem we rait di Baibl rait di siem ting uova an uova agen. Wi a-go luk pan chrii riizn wa mek di man dem we rait di Baibl mait-a du dis:

Di taim wen dem did rait it. Bak iina Izrel dem taim de, nof piipl neehn av di Laa rait pan sitn we dem kuda riid it fi demself. So muor taim a wen dem go a Gad ous dem wuda ier sumadi a riid di Laa. (Dyuu. 31:10-12) An nof tingz mait-a wudaana gwaan wen dem tan op iina di kroud fi ou lang wen sumadi a riid we wuda mek dem no ier it so gud. (Nii. 8:2, 3, 7) So dem taim ya, wen di sumadi we a riid se di ting dem we dem waahn dem fi memba uova an uova agen, it wuda mek it iiziya fi di piipl dem memba wa di skripcha a se an du it. So wen dem ier Jeuova Laa uova an uova, dem wi memba dem.​—Liv. 18:4-22; Dyuu. 5:1.

Di wie ou dem rait it. Som paat a di Baibl mek op a sang, laik di buk a Saamz, Sang A Salaman, an Lamentieshan. Som a di sang dem av wan likl paat iina dem we dem se uova an uova agen, an dis elp di wan dem we a lisn fi memba di wod dem. Laik di wod dem we iina Saam 115:9-11 we se: “Mi a beg aal a unu we iina Izrel fi chos iina Jeuova​—a im a elp an protek dem. Mi a beg aal a unu we a Ieran fambili fi chos iina Jeuova​—a im a elp an protek dem. Mi a beg aal a unu we av nof rispek fi Jeuova fi chos iina Jeuova​—a im a elp an protek dem.” So yu kyan si ou wen di singa dem sing dem sitn ya uova an uova, it kyan mek dem memba dem gud sitn ya bout Jeuova iina dem aat an main.

It mek dem memba di impuotant ting dem. Somtaim di man dem we rait di Baibl did se som impuotant tingz uova an uova agen. Laik wen Jeuova did waahn di Izrelait dem nuo se dem no fi nyam blod, im mek Muoziz rait wa mek dem no fi dwi’it nof taim. Jeuova did waahn dem fi memba se blod a laif. (Liv. 17:11, 14) An afta dat, wen di apasl dem an di elda dem iina Jeruusilem did a rait di ting dem we Jeuova no waahn wi fi du, dem rait agen se wi fi kip we fram blod.​—Aks 15:20, 29.

Aalduo Jeuova did mek dem man ya rait som tingz uova an uova agen, it no miin tu se im waahn wi fi a se di siem ting uova an uova agen. Kaa memba Jiizas did se: “Yu si wen unu a prie, unu no fi se di siem ting uova an uova agen.” (Mat. 6:7) An den im tel wi som tingz we Jeuova waahn wi fi prie bout. (Mat. 6:9-13) So wi naa go se di siem wod dem uova an uova agen wen wi a prie, bot wi kyan prie bout di siem ting dem uova an uova agen.​—Mat. 7:7-11.

So wi si se a wan gud ting mek Gad Wod se som tingz uova an uova agen, kaaz dis a wan a di wie dem we Jeuova, di Wan we a tiich wi, a yuuz fi tiich wi ou fi mek wi laif gud.​—Aiz. 48:17, 18.